ইউক্ৰেইনৰ চেৰ্নোবিল পাৰমাণৱিক শক্তি কেন্দ্ৰৰ আশে-পাশে থকা ‘নিষিদ্ধ অঞ্চল’ত হঠাতে দেখা গৈছে নীলা ৰঙৰ নোমৰ অস্বাভাৱিক কুকুৰৰ এটা দল! স্থানীয় বাসিন্দাৰ লগতে বিজ্ঞানীসকলও এই ঘটনা দেখি আচৰিত আৰু শংকিত হৈ পৰিছে।
১৯৮৬ চনত সংঘটিত হোৱা ভয়ংকৰ পাৰমাণৱিক দুৰ্ঘটনাৰ পিছত চেৰ্নোবিল অঞ্চল পৰিত্যক্ত হৈ পৰে। সেই সময়ৰ পোহনীয়া জন্তুৰ বংশধৰহে এতিয়া ইয়াত জীয়াই আছে। এই কুকুৰবোৰে দীৰ্ঘদিন ধৰি চেৰ্নোবিল বৰ্জন মণ্ডলত বাস কৰি আহিছে, যিটো এতিয়া এক অদ্ভুত জৈৱ বৈচিত্ৰ্যৰ প্ৰতীক হৈ পৰিছে।
‘ডগছ অৱ চেৰ্নোবিল’ নামৰ এটা সংস্থাই বহু বছৰ ধৰি এই অঞ্চলত ৭০০ৰো অধিক কুকুৰৰ যত্ন লৈ আহিছে। সংস্থাটোৱে ছ’চিয়েল মিডিয়াত নীলা নোমৰ কুকুৰকেইটাৰ ছবি প্ৰকাশ কৰাৰ পিছতে ভাইৰেল হৈ পৰে বিষয়টো।
সংস্থাটোৰ বিষয়াসকলে জনোৱা মতে, শেহতীয়াকৈ এটা নিয়মীয়া চিকিৎসা আৰু বন্ধ্যাকৰণ কাৰ্যসূচীৰ সময়ত তেওঁলোকে তিনিটা কুকুৰৰ নোমত এক অস্বাভাৱিক নীলা ৰং লক্ষ্য কৰিছিল। স্থানীয় ৰাইজৰ মতে, এসপ্তাহ পূৰ্বে কুকুৰকেইটা সম্পূৰ্ণ স্বাভাৱিক আছিল। হঠাৎ হোৱা এই পৰিৱৰ্তনত কেয়াৰ টিমটোও স্তম্ভিত হৈ পৰিছে।
তেওঁলোকৰ প্ৰাৰম্ভিক ধাৰণা হ’ল কুকুৰকেইটা পৰিত্যক্ত কাৰখানাৰ পৰা ৰাসায়নিক আৱৰ্জনা বা গধুৰ ধাতুৰ সংস্পৰ্শলৈ আহিব পাৰে। গৱেষকসকলে কয় যে অঞ্চলটোৰ পুৰণি উদ্যোগিক কাৰখানাৰ ৰাসায়নিক পদাৰ্থ এতিয়াও সক্ৰিয় হৈ থাকিব পাৰে।
ডগছ অৱ চেৰ্নোবিল সংস্থাটোৱে কয় যে, ‘আমি এতিয়াও নিশ্চিত নহয় যে কিয় এনেকুৱা হ’ল। ‘আমি জানিবলৈ তেওঁলোকক ধৰিবলৈ চেষ্টা কৰিছো। আমি কুকুৰবোৰৰ নোম, ছাল আৰু তেজৰ নমুনা সংগ্ৰহ কৰি পৰীক্ষা কৰিবলৈ আৰম্ভ কৰিছো।’
কিন্তু আটাইতকৈ আচৰিত কথাটো হ’ল এই নীলা নোমৰ কুকুৰবোৰ একেবাৰে বেমাৰী যেন নালাগিল। ইয়াৰ বিপৰীতে সিহঁত “অতি সক্ৰিয় আৰু সুস্থ” আছিল বুলি সংস্থাটোৱে কয়।
এই ঘটনাই চেৰ্নোবিলৰ ইতিহাসত এক নতুন অধ্যায় সংযোজন কৰিছে। বিকিৰণ প্ৰভাৱিত অঞ্চলৰ এনে পৰিৱৰ্তন প্ৰকৃতিৰ নতুন অভিযোজন নে অজ্ঞাত ৰাসায়নিক পদাৰ্থৰ প্ৰভাৱ সেই বিষয়ে এতিয়া বিজ্ঞানীসকলে অনুসন্ধান চলাইছে।
