চাপৰৰ ধীৰবিলত এক ভয়ংকৰ নাওঁ দুৰ্ঘটনা সংঘটিত হৈছে।
জানিব পৰা মতে চাপৰ থানাৰ অন্তৰ্গত ফলিমাৰী ২য় খণ্ড কলবাৰী গাঁৱৰ ৰহিম বক্স(৫০) আৰু তেওঁৰ পত্নী ৰহিমা খাতুনে(৪৫) নাতিনীয়েক মাছুমা খাতুন (৬)ক লগত লৈ ধীৰবিলেৰে নাঁৱেৰে কলবাৰীলৈ যাত্ৰা আৰম্ভ কৰিছিল।
কিন্তু নাও খন ধীৰবিলৰ মাজভাগ পোৱাৰ পিছতে প্ৰচণ্ড ধুমুহাৰ কৱলত পৰি নাওখন পানীত ডুব যায় আৰু নাওখনত থকা তিনিওজন যাত্রী নিখোজ হৈ পৰে।কিছু সময়ৰ পিছতে স্থানীয় লোকে নাওঁ দুৰ্ঘটনাৰ বিষয়ে জানিব পাৰে।
স্থানীয় ৰাইজে দুৰ্ঘটনা সন্দৰ্ভত চাপৰ থানাৰ ভাৰপ্ৰাপ্ত বিষয়া ৰঞ্জিত কাকতিক অৱগত কৰাত ভাৰপ্ৰাপ্ত বিষয়াগৰাকীয়ে ততাতৈয়াকৈ চাপৰ আৰক্ষীৰ দল এটাক ঘটনাস্থলীলৈ প্ৰেৰণ কৰে।
আৰক্ষীয়ে ৰাইজৰ সহযোগত নাওঁ খন উদ্ধাৰ কৰে। আৰক্ষীয়ে ৰাইজৰ সহযোগত ধীৰবিলত সলিল সমাধি ঘটা কণমানি মচুমা খাতুনৰ মৃতদেহ উদ্ধাৰ কৰে যদিও ৰহিম বক্স আৰু ৰহিমা খাতুন নিখোজ হৈ থাকে।
এছ ডি আৰ এফৰ এটা দল ঘটনাস্থলীত উপস্থিত হৈ উদ্ধাৰ অভিযান চলাই নিখোজ হৈ থকা ৰহিম বক্সৰ পত্নী ৰহিমা খাতুনৰ মৃতদেহ উদ্ধাৰ কৰিছে বুলি চাপৰ থানাৰ উপ- পৰিদৰ্শক দ্বিজেন্দ্ৰ মেধিয়ে জানিবলৈ দিছে ।
বাতৰি লিখা পৰলৈকে ৰহিম বক্স নিখোজ হৈ আছে বুলি জানিব পৰা গৈছে ।
