যোৰহাট জিলাৰ খনিকৰত টীয়ক নৈত উটি অহা অচিনাক্ত মৃতদেহ এটাৰ খবৰ প্ৰত্যক্ষদৰ্শী ৰাইজে জনোৱাৰ পিছতো চেলেংহাট চকীৰ আৰক্ষী ঘটনাথলীলৈ নাহি দেহটো টীয়ক আৰক্ষী থানা এলেকালৈ উটি যোৱাৰ বাবে অপেক্ষা কৰা বুলি উঠিছে ভয়ংকৰ অভিযোগ।
এটা মৃতদেহ উদ্ধাৰক লৈ আৰক্ষীয়ে কৰা ‘চৰম হেমাহিক তীব্ৰ গৰিহণা’ দি আটছাই উত্থাপন কৰিছে এই ভয়ংকৰ অভিযোগ। ‘চেলেংহাট আৰক্ষীয়ে দায়িত্বৰ পৰা হাত সাৰিবলৈকে মৃতদেহটো উদ্ধাৰ নকৰি টীয়ক আৰক্ষী থানা এলেকালৈ উটি যোৱালৈ বাট চাই ৰৈছিল,’ অভিযোগ আটছাৰ মৰিয়নি শাখাৰ সম্পাদক দীনেশ চাহুৰ।
অভিযোগ মতে যোৰহাট জিলাৰ চেলেংহাট আৰক্ষী চকীৰ অন্তৰ্গত খনিকৰত আজি ১০ আগষ্টৰ পুৱা টীয়ক নদীত এটা মৃতদেহ দেখি ৰাইজে চেলেংহাট আৰক্ষীক খবৰ দিছিল। কিন্তু চেলেংহাট আৰক্ষীয়ে মৃতদেহ উদ্ধাৰ হোৱা স্থান নিজা এলেকাত নপৰে বুলি গা এৰা দিয়ে বুলি অভিযোগ উত্থাপিত হৈছে।
উপায়ন্তৰ হৈ স্থানীয় ৰাইজে আৰক্ষীৰ জৰুৰী সেৱা ১০০ ডায়েল কৰি অৱগত কৰাৰ পিছতহে চেলেংহাট আৰু টীয়ক আৰক্ষী আহি মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে বুলি ৰাইজে অভিযোগ কৰিছে।
তাৰোপৰি ৰাইজৰ অভিযোগ মতে বৃহস্পতিবাৰে আবেলিয়েই খনিকৰৰ মাজেদি বৈ যোৱা টীয়ক নৈত একাংশ লোকে মৃতদেহটো দেখি চেলেংহাট আৰক্ষীক খবৰ দিছিল। কিন্তু চেলেংহাট আৰক্ষীয়ে মৃতদেহটো নদীত বিচাৰি নাপাই উদ্ধাৰ নকৰাকৈয়ে উভটি যায়।
তাৎপৰ্য্যপূৰ্ণভাৱে বৃহস্পতিবাৰে ৰাইজে দেখা ঠাইতে আজি পুৱা নদীৰ জাবৰত লাগি থকা অৱস্থাত পুনৰ মৃতদেহটো দেখা পায়।
উটি অহা অৱস্থাত উদ্ধাৰ কৰা মৃতদেহটো খনিকৰ চাহ বাগিচাৰে চাওনা মাঝিৰ বুলি পিছত পৰিয়ালৰ লোকে চিনাক্ত কৰে। লোকজন বিগত তিনি দিন ধৰি সন্ধানহীন হৈ আছিল।
চেলেংহাট চকীৰ ভাৰপ্ৰাপ্ত বিষয়াৰ নম্বৰ বুলি আৰক্ষীৰ নিয়ন্ত্ৰণ কক্ষই দিয়া ফ’ন নম্বৰটোত যোগাযোগ কৰাত ৰং নম্বৰত লগা বুলিহে উত্তৰ আহিল!