কোভিড১৯ৰ বাবে সমগ্ৰ বিশ্বৰ লগতে লকডাউনত বিধ্বস্ত হৈ পৰিছিল সৰ্বসাধাৰণ ৰাইজৰ জনজীৱন।
কোভিড১৯ৰ সংক্ৰমণ কিছু হ্ৰাস পোৱাৰ পিছত নৱবৰ্ষক আদৰিবলৈ চহৰ-নগৰ, গ্ৰামঞ্চলৰ লোকসকলৰ মাজত দেখা গৈছে ব্যাপক উছাহ। এই ব্যাপক উছাহ দেখা গৈছে ভূটান সীমান্ত বাক্সাৰ বগামাটিত।
এসময়ত বোমা-গুলি-বৰুদৰ শব্দত ৰাতি পুওৱা বাক্সাৰ ভাৰত-ভূটান সীমান্তৰ বৰনদী আৰু অৰঙা নদীৰ সংযোগস্থল বগমাটি পৰ্যটনস্থলী হিচাপে গঢ় লৈ উঠাৰ পিছত বগামাটিলৈ এইবাৰ বৈছে পৰ্য্টকৰ লানি নিছিগা সোঁত।
অসমৰ বিভিন্ন জিলাৰ পৰা জানুৱাৰী মাহৰ প্ৰথমটো দেওবাৰে প্ৰকৃতিৰাণী বগামাটিলৈ বহু বনভোজকাৰী দল আহি উপস্থিত হয়।
পুৱাৰে পৰা দুই সহস্ৰাধিক বাছ, চাৰিচকীয়া বাহন, দুচকীয়া বাহনেৰে বগামটিত আহি উপস্থিত হয় বনভোজকাৰীৰ দল।
সৰ্বকালৰ অভিলেখ ভংগ কৰি এইবাৰ বগামাটিত উপস্থিত হয় প্ৰায় ডেৰ লক্ষাধিক লোক।
বগামাটিৰ সেউজ নীলাভ পাহাৰৰ নান্দনিক দৃশ্যই মোহিত কৰে বনভোজকাৰীসকলক।
শিশু-পুৰুষ-মহিলা, আৱাল-বৃদ্ধ-বণিতাৰ লানি নিছিগা সোঁতে উৎসৱমুখৰ কৰি তুলিলে সীমান্তৰ বগামাটিক।
কোভিড আতংকত দীৰ্ঘদিন ধৰি গৃহবন্দী হৈ অতিষ্ঠ হৈ পৰা লোকসকলে যে বগামাটিত লাভ কৰিলে জীৱনৰ নতুন উছাহ! যাৰ ফলত বনভোজকাৰী তথা পৰ্যটকসকলৰ বিহু, বাগৰুম্বা নৃত্যত প্ৰাণ পাই উঠে বগামাটি।
পৰ্যটকৰ এই উছাহত হোৱাইট ৱাটাৰ ৰাফটিং, জীপ লাইনিংৰ সুবিধা থকা বগামাটিৰ পাহাৰ-গছ-লতা-নদীয়েও যেন নাচি উঠে পৰ্য্টকৰ সৈতে।
বিটিচিৰ প্ৰাক্তন কাৰ্যবাহী সদস্য গণেশ কছাৰী আৰু ৰাজ্যসভাৰ প্ৰাক্তন সাংসদ বিশ্বজিৎ দৈমাৰীৰ পৰিকল্পনা আৰু তত্বাৱধানত অধিক প্ৰাণ পাই উঠা বগামাটি এতিয়া অসমৰ চুইজাৰলেণ্ড হিচাপে খ্যাতি লাভ কৰাৰ পিছত ৰাজ্যৰ পৰ্যটন ক্ষেত্ৰখনত এক অনন্য মাত্ৰা লাভ কৰিবলৈ সক্ষম হৈছে।
জৈৱ বৈচিত্ৰৰে পৰিপূৰ্ণ বগামাটিত দেশী-বিদেশী পৰ্যটকক আকৰ্ষণ কৰিবলৈ নিৰ্মাণ কৰা হৈছে পাহাৰৰ ওপৰত এটি বৌদ্ধ মঠ।
ৰাজ্যসভাৰ প্ৰাক্তন সাংসদ বিশ্বজিত দৈমাৰীয়ে নিজাববীয়াকৈ নিৰ্মাণ কৰা বাথৌ ঠাঁনচলি হৈ পৰিছে পৰ্য্টকৰ অন্যতম আকৰ্ষণৰ কেন্দ্ৰ বিন্দু।
বগামাটিৰ বৰনদীৰ দুইপাৰে থকা বগা বগা শিল, আৰু সেউজ নীল পাহাৰৰ দৃশ্যই আকৰ্ষণ কৰিবলৈ সক্ষম হৈছে পৰ্যটকসকলক।
ভূটান পাহাৰৰ বুকু ভেদি বৈ অহা বৰনদীৰ হিম শীতল জলৰাশি স্পৰ্শ কৰি আনন্দত মতলীয়া হৈ পৰে যুৱক-যুৱতী, কিশোৰ-কিশোৰী। বৈ অহা নদীৰ পানীৰ সৈতে সকলোৰে প্ৰাণোছচ্ছল হাঁহিত প্ৰাণ পাই উঠে বগামাটি।
বনৰীয়া হাতীৰ জাক, ময়ূৰ, অন্যান্য পৰিভ্ৰমী পক্ষী, বন গাহৰিৰ বিচৰণ ভূমি বগামাটি বিদ্যালয়, মহাবিদ্যালয়ৰ ছাত্র-ছাত্ৰীৰ অধ্যয়নৰ বাবে আছে বিশেষ সমল।
বগামাটিৰ ৰূপ-সৌন্দৰ্যৰ প্ৰতি আকৰ্ষিত হৈ অসমৰ ভিন্ন প্ৰান্তৰ পৰা বনভোজ খাবলৈ আহি ৰাবিবাৰে অথন্তৰত পৰে হেজাৰ হেজাৰ লোক। হেজাৰ হেজাৰ বাহনৰ বাবে প্ৰচণ্ড যানজঁটৰ সন্মুখীন হ’বলগীয়া হয় বনভোজকাৰী দল।
প্ৰায় পাঁচ কিলোমিটাৰ দূৰৈৰ পৰা সৃষ্টি হোৱা যানজঁটৰ বাবে বহু বনভোজকাৰীৰ দলে বগামাটিলৈ আহিব নোৱাৰাৰ বাবে পথৰ দাঁতিত, পথাৰত বনভোজ খোৱা পৰিলক্ষিত হয়।
ইফালে বহুলোকে ৫-৬ ঘন্টা ধৰি গাড়ীৰ ভিতৰত আবদ্ধ হৈ থাকি বনভোজ নোখোৱাকৈ উভতি যোৱাও পৰিলক্ষিত হয়।
