অহা ২২ জুনৰ পৰা ২৬ জুনলৈ পাঁচদিনীয়া বৰ্ণাঢ্য কাৰ্য্যসূচীৰে শক্তিপীঠ কামাখ্যাত অনুষ্ঠিত কৰা হ’ব মহা অম্বুবাচী মেলা। ইতিমধ্যে অম্বুবাচী মেলাৰ প্ৰস্তুতি আৰু নিৰাপত্তা ব্যৱস্থাক লৈ অসম চৰকাৰ আৰু কামৰূপ মহানগৰ জিলা প্ৰশাসন সষ্টম হৈ পৰিছে।
আজি কামৰূপ মহানগৰৰ উপায়ুক্ত বিশ্বজ্যিৎ পেগুৱে অম্বুবাচী মেলাৰ প্ৰস্তুতি সম্পৰ্কত বিভিন্ন দিশ সাংবাদিকক অৱগত কৰে।
পেগুৱে প্ৰকাশ কৰা অনুসৰি বিগত বৰ্ষৰ অম্বুবাচী মেলাত ভক্তৰ বাবে নিৰ্মাণ কৰা শিবিৰৰ তুলনাত এইবাৰ ভক্তৰ শিবিৰৰ সংখ্যা হ্ৰাস কৰা হৈছে। বৰ্তমানলৈ চাৰিটা শিবিৰ জিলা প্ৰশাসনে ঘোষণা কৰিছে।
আনহাতে, ২২ জুনত সোণাৰাম খেলপথাৰত মেলাৰ উদ্বোধনী অনুষ্ঠান অনুষ্ঠিত কৰা হ’ব। এইবাৰ অনুষ্ঠান উদ্বোধন কৰিব বলীউদৰ জনপ্ৰিয় কন্ঠশিল্পী কৈলাশ খেৰে।
আকৌ নিৰাপত্তাৰ খাতিৰত কামাখ্যা ৰে’ল ষ্টেচনত প্ৰতিবছৰে নিৰ্মাণ কৰি অহা ভক্তৰ শিবিৰটো এইবাৰ উঠাই দিয়া হৈছে। তাৰ পৰিবৰ্তে ফাঁচীবজাৰ পুৰণি জেল ৰোডত এই বৰ্ষৰ আটাইতকৈ ডাঙৰ শিবিৰটো নিৰ্মাণ কৰা হ’ব বুলি উপায়ুক্ত পেগুৱে সংবাদ মাধ্যমৰ আগত সদৰি কৰে।
আনহাতে, শ্ৰীলংকাৰ ধৰ্মীয় স্থানত সন্ত্ৰাসবাদীৰ আক্ৰমণৰ পাছত ভাৰতীয় চোৰাংচোৱা বাহিনীয়ে উত্তৰ-পূবৰ ৰাজ্যসমূহতো এনেধৰণৰ কূটাঘাত সংঘটিত হোৱাৰ সন্দেহত আগতীয়াকৈ চৰকাৰক সতৰ্কতা অৱলম্বন কৰাৰ বাবে অৱগত কৰিছিল।
এনে সতৰ্কতাৰ পৰিপ্ৰেক্ষিতত এইবাৰ অম্বুবাচী মেলাত নিৰাপত্তা ব্যৱস্থা অধিক কটকটীয়া কৰি তোলা হ’ব বুলি উপায়ুক্তগৰাকীয়ে কয়।