POCSO গোচৰত দোষী সাব্যস্ত হোৱা এজন যুৱকৰ যাৱজ্জীৱন কাৰাদণ্ড ১২ বছৰলৈ হ্ৰাস কৰিছে বম্বে উচ্চ ন্যায়ালয়ে। নিম্ন আদালতৰ দোষী সাব্যস্ত হোৱাটো বাহাৰ ৰাখিয়েই শাস্তি হ্ৰাস কৰাৰ নিৰ্দেশ দিয়ে উচ্চ ন্যায়ালয়ে।
ইয়াৰ কাৰণ হ’ল অভিযুক্তৰ কাৰাগাৰত থকাৰ সময়ত ‘সংস্কাৰমূলক আচৰণ’, কেইবাখনো সাংস্কৃতিক প্ৰতিযোগিতাত সফলতা আৰু মহাত্মা গান্ধীৰ ওপৰত ৰচনা লিখাৰ দৰে কাৰ্যকলাপ।
মহাৰাষ্ট্ৰৰ ঘাটকোপাৰ চউলৰ বাসিন্দা যুৱকজনৰ বিৰুদ্ধে ২০১৬ চনৰ ডিচেম্বৰ মাহত চুবুৰীয়াৰ পাঁচ বছৰীয়া কন্যাক যৌন নিৰ্যাতন চলোৱাৰ অভিযোগ উত্থাপন হৈছিল। এজাহাৰৰ ভিত্তিত গ্ৰেপ্তাৰ হোৱাৰ পিছত চাৰি বছৰ ধৰি চলিছিল POCSO আদালতত বিচাৰ। ২০২০ চনত ন্যায়াধীশে তেওঁক যাৱজ্জীৱন কাৰাদণ্ডৰ শাস্তি প্ৰদান কৰিছিল। উচ্চ ন্যায়ালয়ত আপীল শুনানিত কোৱা হৈছিল যে দোষী সাব্যস্ত হোৱাত কোনো ভুল হোৱা নাই যদিও শাস্তি পুনৰ বিবেচনাৰ অৱকাশ আছে।
বিভাগীয় বিচাৰপীঠত শুনানিৰ সময়ত বাদী পক্ষই কয় যে অভিযুক্তই কাৰাগাৰত থকাৰ সময়ত কোনো ধৰণৰ অনুশাসনমূলক অপৰাধ কৰা নাছিল। বৰং তেওঁ বিভিন্ন সাংস্কৃতিক আৰু শৈক্ষিক কাম-কাজত অংশ লৈ সফলতা অৰ্জন কৰিছে।
পুনেৰ তিলক মহাৰাষ্ট্ৰ বিদ্যাপীঠৰ পৰা গ্ৰন্থ সমালোচনাৰ প্ৰমাণ পত্ৰ, মুম্বাইৰ ৰামচন্দ্ৰ ইনষ্টিটিউটত ৰচনা প্ৰতিযোগিতাত স্বীকৃতি আৰু সৰ্বোদয় মণ্ডলৰ দ্বাৰা আৰম্ভ কৰা গান্ধীৰ বিচাৰ আৰু চিন্তাৰ ওপৰত লিখাৰ প্ৰমাণ পত্ৰ আদালতৰ সন্মুখত দাখিল কৰা হয়। সেই পৰীক্ষাত তেওঁ সুখ্যাতিৰে উত্তীৰ্ণ হোৱা বুলিও জনোৱা হয়।
ন্যায়াধীশ সাৰং কোটৱাল আৰু ন্যায়াধীশ সন্দেশ পাটিলৰ বিচাৰপীঠে পৰ্যবেক্ষণ কৰে যে অভিযুক্তই এবাৰো জামিন লাভ কৰা নাই আৰু কোভিড কালতো কাৰাগাৰত আছিল। ইতিমধ্যে প্ৰায় ৯ বছৰ কাৰাগাৰত কটাবলগীয়া হৈছে।
যদিও গোচৰৰ গুৰুত্ব বিবেচনা কৰি নূন্যতম দহ বছৰৰ শাস্তি প্ৰযোজ্য, তথাপিও আদালতে কয় যে ১২ বছৰৰ কাৰাদণ্ডই শাস্তিৰ উদ্দেশ্য পূৰণ কৰিব। ফলত আজীৱন কাৰাদণ্ডৰ পৰিৱৰ্তে ১২ বছৰৰ কাৰাদণ্ডৰ নিৰ্দেশ দিয়া হ’ল আৰু দোষীক তিনি বছৰৰ পাছত মুকলি কৰি দিয়াৰ পথ প্ৰশস্ত হ’ল।
