বঙাইগাঁও জিলাৰ বান পৰিস্থিতি অপৰিৱৰ্তিত হৈ আছে ৷ বৰং নতুন নতুন গাঁও বানৰ কবলতহে পৰিছে ৷ বৃহস্পতিবাৰে জিলাখনৰ ৮৬ খন গাঁও বানৰ কবলত পৰিছিল যদিও শুকুৰবাৰে এই সংখ্যা ১১০ খনলৈ বৃদ্ধি পাইছে ৷ জিলাৰ পাঁচোটা ৰাজহ চক্ৰ ক্ৰমে বঙাইগাঁও , মাণিকপুৰ, ডাংতল, বইটামাৰী আৰু সৃজনগ্ৰাম আটাইকেইটা ৰাজহ চক্ৰতে শুকুৰবাৰে প্লাবিত হৈছে গাঁও, খেতিপথাৰ আদি।
ফলত পাঁচটা ৰাজহ চক্ৰৰ অন্তৰ্গত মুঠ ১১০খন গাঁৱৰ ৮০,৫৮৬ গৰাকী লোক বানৰ কবলত পৰিছে। একেদৰে ২৯০৮ হেক্টৰ খেতিপথাৰ প্লাবিত হৈছে। পাঁচটা ৰাজহ চক্ৰত বৰ্তমানলৈ মুঠ ১৮ টা আশ্ৰয় শিবিৰ মুকলি কৰা হৈছে বানাক্ৰান্ত লোকৰ আশ্ৰয়ৰ বাবে ৷
এই আশ্ৰয় শিবিৰত ৪,৪৪১ গৰাকী বানাক্ৰান্ত লোকে আশ্ৰয় লৈ আছে। ইয়াৰ ভিতৰত ১১০ গৰাকী গৰ্ভৱতী মহিলা আৰু মাতৃদুগ্ধ পান কৰি থকা শিশুৰ মাতৃ আছে। সেইদৰে জিলাখনৰ সৰু-ডাঙৰ জন্তুৰ লগতে হাঁহ-কুকুৰা মিলি সৰ্বমুঠ ২০২৮১৭ টা জীৱ-জন্তু বানৰ কবলত পৰিছে ৷ বানাক্ৰান্ত লোকসকলক এছ ডি আৰ এফ,এন ডি আৰ এফ আৰু স্থানীয় লোকৰ দ্বাৰা সাধাৰণ নাও তথা মেচিন নাও ব্যৱহাৰ কৰি উদ্ধাৰ কৰা হৈছে। জিলাখনৰ মাণিকপুৰ ৰাজহ চক্ৰৰ অন্তৰ্গত অঞ্চল অধিক বানৰ কবলত পৰিছে ৷
মাণিকপুৰ ৰাজহ চক্ৰৰ অন্তৰ্গত মুঠ ৭৯ খন গাঁও বানৰ কবলত পৰাত ৭৫,৮৫০ জন লোক বানত আক্ৰান্ত হৈছে ৷ আনহাতে বঙাইগাঁও ৰাজহ চক্ৰৰ ৩ খন, বইটামাৰী ৰাজহ চক্ৰৰ ৩ খন , ডাংতল ৰাজহ চক্ৰৰ ৬ খন আৰু সৃজনগ্ৰাম ৰাজহ চক্ৰৰ ১৯ খন গাঁও বানৰ কবলত পৰিছে ৷
ইপিনে জিলা প্ৰশাসনে বানাক্ৰান্ত লোকৰ মাজত শুকুৰবাৰে ১৩০৩.৪৩ কুইন্টল চাউল, ২৩৬.৭০ কুইন্টল দাইল,৭১.১৬ কুইন্টল নিমখ, ৩৭৩.১৪ লিটাৰ মিঠাতেল, চিৰা ০.৮৪ কুইন্টল আৰু গুড় ০.১৫ কুইন্টলৰ লগতে শিশুখাদ্যও ৰিলিফ হিচাপে প্ৰদান কৰিছে ৷
পশুখাদ্য হিচাপে ৪৪৩৭.২৮ কুইন্টল গোমৰ ভুচিও বিতৰণ কৰে ৷ ইয়াৰ উপৰিও চেনিটাৰী নেপকিন, মমবাতি, দিয়াচলাই, ম’হ খেদা কইল, ত্ৰিপাল আদিও বানাক্ৰান্ত লোকৰ মাজত বিতৰণ কৰে ৷
