আগন্তুক লোকসভা নিৰ্বাচনত অগপ আৰু বি পি এফে বিজেপিক আটাইকেইখন আসন এৰি দিব বুলি ৰাজ্যিক বিজেপিৰ সভাপতি ৰঞ্জিৎ দাসে কৰা মন্তব্যৰ বিপৰীতে আজি বি টি চি প্ৰধান হাগ্ৰামা মহিলাৰীয়ে আগন্তুক লোকসভা নিৰ্বাচনত বি পি এফ দলে কোকৰাঝাৰ আৰু মঙলদৈ লোকসভা সমষ্টিত এককভাৱে প্ৰতিদ্বণ্ডিতা কৰিব বুলি ঘোষণা কৰে।
উল্লেখযোগ্য যে যোৱা ৩১ আগষ্টত ৰঞ্জিত দাসে তেজপুৰত সংবাদ মাধ্যমৰ আগত অগপ আৰু বি পি এফে বিজেপিক আটাইকেইখন আসন এৰি দিব পাৰে বুলি মন্তব্য কৰিছিল।
আজি কোকৰাঝাৰ ডনবস্ক’ উচ্চতৰ মাধ্যমিক বিদ্যালয় প্ৰাংগণত নৱনিৰ্মিত আটকধুনীয়া চেইণ্ট ডনবস্ক’ কেথোলিক গীৰ্জাঘৰৰ মুকলি অনুষ্ঠানত মুখ্য অতিথি হিচাপে উপস্থিত থাকি হাগ্ৰামাই উক্ত সমষ্টি দুটাত এককভাৱে প্ৰতিদ্বণ্ডিতা কৰাৰ ক্ষেত্ৰত কোনো আপোচ কৰা নহয় বুলি ঘোষণা কৰে। অৱশ্যে বাকী সমষ্টি কেইতাত বিজেপিৰ সতে মিত্ৰতা অব্যাহত থাকিব বুলি তেওঁ মত প্ৰকাশ কৰে।
ইয়াৰ উপৰি ২০২০ চনৰ পৰিষদীয় নিৰ্বাচনত বি পি এফ দলেই পুনৰাই বি টি চি দখল কৰিব বুলিও মহিলাৰীয়ে মন্তব্য প্ৰকাশ কৰে।
সমাজকল্যাণ মন্ত্ৰী প্ৰমীলাৰাণী ব্ৰহ্মৰ উপস্থিতিত আজি উক্ত গীৰ্জাঘৰটো আনুষ্ঠানিকভাৱে মুকলি কৰে বঙাইগাঁও ডায়োচিজৰ বিশ্বপ ৰেভাৰেণ্ট টোমাজ ফুলোপিলিয়ে। এই অনুষ্ঠানতে মহিলাৰীয়ে ৰাজ্যৱাসীলৈ দুৰ্গা পূজাৰ শাৰদীয় ওলগ আৰু শুভেচ্ছা জ্ঞাপন কৰে।