নামনি মাজুলীৰ ভকত চাপৰিত জিঅ’ বেগ সংস্থাপনেৰে খহনীয়া প্ৰতিৰোধ আঁচনি ৰূপায়ণত অনিয়ম হোৱা বুলি উঠা অভিযোগ সন্দৰ্ভত শীঘ্ৰে তদন্তৰ ব্যৱস্থা কৰিব ব্ৰহ্মপুত্ৰ বোৰ্ডে। মুখ্য মন্ত্ৰীৰ অনুৰোধত এই সম্পৰ্কীয় ৰাজহুৱা অভিযোগৰ বুজ ল’বলৈ বৃহস্পতিবাৰে নতুন দিল্লীৰ পৰা জৰুৰী ভাবে মাজুলীলৈ অহা ব্ৰহ্মপুত্ৰ বোৰ্ডৰ অধ্যক্ষ ৰাজীৱ যাদৱে শুকুৰবাৰে নদীদ্বীপ জিলাখনৰ নাগৰিক সমাজৰ প্ৰতিনিধিসকলৰ আগত এই কথা ঘোষণা কৰে।
শুকুৰবাৰে সন্ধিয়া ভকত চাপৰি এলেকাৰ খহনীয়া প্ৰতিৰোধমূলক কাম-কাজ পৰিদৰ্শনৰ লগতে স্থানীয় ৰাইজৰ মতামত গ্ৰহণৰ পাছত আজি অধ্যক্ষগৰাকীয়ে গড়মূৰৰ আৱৰ্ত ভৱনত মাজুলীৰ বিভিন্ন দল-সংগঠনৰ প্ৰতিনিধি আৰু জ্যেষ্ঠ নাগৰিকৰ সৈতে বিষয়টো সন্দৰ্ভত আলোচনাত মিলিত হয়।
মাজুলীৰ ভাৰপ্ৰাপ্ত উপায়ুক্ত নৰেণ দাস, আৰক্ষী অধীক্ষক হীতেশ চন্দ্ৰ ৰায় আৰু মুখ্যমন্ত্ৰীৰ প্ৰতিনিধি ৰমেণ দত্তৰ উপস্থিতিত হোৱা আলোচনাত ব্ৰহ্মপুত্ৰ বোৰ্ডৰ অধ্যক্ষগৰাকীয়ে স্থানীয় নাগৰিক সমাজৰ প্ৰতিনিধিসকলৰ আগত জিঅ’ বেগৰ সংস্থাপনৰ ক্ষেত্ৰত হোৱা অনিয়মৰ শীঘ্ৰে তদন্ত কৰা হ’ব বুলি প্ৰতিশ্ৰুতি দিয়ে।
আনহাতে, এই তদন্ত ব্ৰহ্মপুত্ৰ বোৰ্ডৰ নিজৰ বিষয়াৰ দ্বাৰা নকৰি কেন্দ্ৰীয় জল আয়োগৰ উচ্চস্তৰীয় দলৰ দ্বাৰা স্বতন্ত্ৰভাৱে কৰিবলৈ ব্ৰহ্মপুত্ৰ বোৰ্ডে থিক কৰিছে বুলি উল্লেখ কৰি অধ্যক্ষগৰাকীয়ে এনে অনিয়মৰ ক্ষেত্ৰত দোষীৰ বিৰূদ্ধে বিহিত ব্যৱস্থা লোৱা হ’ব বুলি মন্তব্য কৰে।
মাজুলীবাসী ৰাইজৰ অভিযোগক অতি গুৰুত্ব সহকাৰে গ্ৰহণ কৰি যাদৱে কয় যে ব্ৰহ্মপুত্ৰ বোৰ্ডৰ অধীনত চলি থকা মাজুলীৰ স্থায়ী সুৰক্ষা প্ৰকল্পৰ কামৰ গুণগত মান নিশ্চিত কৰাৰ বাবে এতিয়াৰে পৰা নিৰীক্ষণ প্ৰক্ৰিয়াক অধিক ফলপ্ৰসু কৰি তোলা হ’ব।
জিঅ’ বেগ সংস্থাপন কাৰ্য যাতে সম্পূৰ্ণ সঠিক ভাৱে হয়, সেয়া সুনিশ্চিত কৰিব পৰাকৈ মাজুলীৰ নাগৰিক সমাজৰ প্ৰতিনিধিক লগত লৈ অতি শীঘ্ৰে স্থানীয় নিৰীক্ষণ গোট এটাও গঠন কৰা হ’ব বুলি ব্ৰহ্মপুত্ৰ বোৰ্ডৰ মূৰব্বীগৰাকীয়ে আলোচনাকালত অৱগত কৰে।
তদুপৰি, ভকত চাপৰিকে ধৰি খহনীয়া আক্ৰান্ত আন অংশসমূহত আসন্ন বাৰিষাৰ সময়ছোৱাত প্ৰয়োজনীয় জৰুৰী খহনীয়া প্ৰতিৰোধমূলক কাৰ্য্য ব্যৱস্থা গ্ৰহণৰ বাবেও ব্ৰহ্মপুত্ৰ বোৰ্ডে ব্যৱস্থা ল’ব বুলি অধ্যক্ষ যাদৱে উল্লেখ কৰে। ইয়াৰ বাবে বোৰ্ডৰ যোৰহাট চক্ৰৰ অধীক্ষক তথা অভিযন্তা গয়া প্ৰসাদ সিঙক কেইদিনমানৰ বাবে মাজুলীত বাহৰ পাতি ভকত চাপৰি অংশৰ লগতে আন অংশসমূহত বাৰিষাৰ সময়ত হ’ব পৰা খহনীয়া প্ৰতিৰোধৰ জৰুৰী কাৰ্য্যপৰিকল্পনা আৰু ব্যয়ৰ প্ৰাক্কলন প্ৰস্তুত কৰিবলৈ অধ্যক্ষ গৰাকীয়ে দায়িত্ব অৰ্পণ কৰে।
আকৌ, কামৰ লেহেমীয়া গতিৰ বাবে ইতিমধ্যে টি কে ইঞ্জিনিয়াৰিঙক নিয়ম অনুসৰি জৰিমণা বিহা হৈছে বুলি অধ্যক্ষ গৰাকীয়ে নাগৰিক সমাজৰ প্ৰতিনিধিসকলৰ আগত সদৰি কৰে।
ব্ৰহ্মপুত্ৰ বোৰ্ডৰ অধ্যক্ষগৰাকীৰ লগত আলোচনাত জ্যেষ্ঠ নাগৰিক সন্থা, পেন্সনাৰ্ছ সন্থা, অসম জাতীয়তাবাদী যুৱ ছাত্ৰ পৰিষদ, জিলা সাংবাদিক সন্থা, আপকুকে ধৰি কেইবাটাও সংগঠনৰ প্ৰতিনিধিয়ে ভাগ লয়।
