অষ্ট্ৰেলিয়া ক্ৰিকেট দলৰ বৰ্তমানৰ অন্যতম সফলতম বেটছমেন ষ্টিভ স্মিথ অনাগত দিনত ডন ব্ৰেডমেনৰ দৰে মহান বেটছমেন হ’ব পাৰিব বুলি মন্তব্য কৰিছে দেশৰে প্ৰাক্তন বেগী বলাৰ ব্ৰেট লীয়ে।
ব্ৰেট লীক ষ্টিভ স্মিথ আৰু ভাৰতীয় ক্ৰিকেট দলৰ অধিনায়ক বিৰাট কোহলীৰ মাজত কোন শ্ৰেষ্ঠ বুলি সোধা এক প্ৰশ্নৰ উত্তৰত উক্ত মন্তব্য কৰে।
জিম্বাব’ৱেৰ বেগী বলাৰ মাংগৱাই ইনষ্টা লাভত লীক কোহলী আৰু স্মিথৰ মাজৰ যিকোনো এজনক নিৰ্বাচিত কৰিবলৈ কওতে তেওঁ কয়, ‘দুয়োজন বেলেগ বেলেগ ক্ৰিকেটাৰ। টেকনিকৰ ফালৰ পৰা কোহলী বঢ়িয়া বেটছমেন’।
তেওঁ লগতে কয়, ‘কোহলীয়ে কেৰিয়াৰৰ আৰম্ভণিৰে পৰা সুন্দৰ প্ৰদৰ্শন কৰি আহিছে। দুয়োজনে বহুত ভাল বেটছমেন। কোহলী নিজৰ দলৰ এগৰাকী মহান অধিনায়কো’।
ইফালে ষ্টিভ স্মিথ সন্দৰ্ভত লীয়ে কয়, ‘স্মিথে যোৱা ১২ মাহত যেনেধৰণে খেলিছে, তেওঁ সাংঘাটিক। বৰ্তমান সময়ত মই কোহলীতকৈ স্মিথক ওপৰত স্থান দিম কিয়নো বেয়া দিনৰ পিছতো স্মিথে সাংঘাটিকভাৱে কামবেক কৰিছে’।
ইয়াৰ উপৰি লীয়ে কয়, ‘দুয়োজন ক্ৰিকেটাৰে মহান। মোৰ অনুভৱ হয় যে স্মিথ ডন ব্ৰেডমেনৰ দৰে মহান বেটছমেন হ’ব পাৰিব’।
উল্লেখ্য যে যোৱা কেইবছৰ মানৰ পৰা স্মিথ আৰু কোহলীয়ে সুন্দৰ প্ৰদৰ্শন আগবঢ়াই আছে। সেয়ে অনুৰাগী আৰু ক্ৰিকেট বিশেষজ্ঞ সকলে সময়ে সময়ে দুয়োৰে মাজত তুলনা কৰা পৰিলক্ষিত হয়।
