প্ৰেমৰ চহৰ’ আগ্ৰাত অদ্ভুত প্ৰতাৰণাৰ কাহিনী। বিয়াসম্পন্ন হৈছে মাত্ৰ। ফুলশয্যাৰ নিশা নৱবিবাহিতা পত্নীৰ ওৰণিখন আঁতৰাবলৈ চেষ্টা কৰিয়েই চৰম বিপাঙত পৰে স্বামী। বিয়াৰ প্ৰথম নিশা ওৰণি গুচোৱাৰ সময়ত স্বামীৰ পৰা ৯০ লাখ টকা দাবী কৰে কইনাই! নিদিলে যুৱতীগৰাকীয়ে কোনো ধৰণৰ শাৰীৰিক সম্পৰ্ক স্থাপন কৰিবলৈ অস্বীকাৰ কৰে। পৰৱৰ্তী কাহিনীভাগ আৰু অধিক ভয়ংকৰ।
আগ্ৰাৰ বাসিন্দা গৌৰৱ আৰু কল্পনাৰ বিবাহ বিবাহ হৈছিল যোৱা বছৰৰ ২৯ এপ্ৰিলত। কিন্তু সেই বিবাহ এদিনো স্থায়ী নহ’ল। গৌৰৱৰ ভগ্নী মুস্কানে দাখিল কৰা এফ আই আৰ অনুসৰি কল্পনাই স্বামীৰ সৈতে শাৰীৰিক সম্পৰ্ক স্থাপন কৰিবলৈ অস্বীকাৰ কৰি তাৰ পৰিৱৰ্তে তেওঁক অপমান কৰে।
অভিযোগ মতে, কল্পনাই ভায়েকহঁতৰ সহায়ত নিজৰ সকলো গহনা আৰু শাহুৱেকৰ গহনা (পিন্ধাৰ অজুহাতত) লৈ গুচি যায়। কল্পনাই বাৰে বাৰে গৌৰৱ আৰু তেওঁৰ পৰিয়ালক “স্বেচ্ছাই” ৯০ লাখ টকা দেউতাক আৰু ভাতৃৰ হাতত গতাই দিবলৈ চাপ দিয়ে।
জুলাই মাহৰ প্ৰথম সপ্তাহত কল্পনাই মাক-দেউতাকৰ ঘৰলৈ গৈছিল আৰু যাওঁতে তেওঁ ভাবুকি দি গৈছিল – “মোক ৯০ লাখ টকা দিয়ক নহ’লে মৰিবলৈ সাজু থাকক।” ইয়াৰ পিছত কল্পনা কেতিয়াও শহুৰেকৰ ঘৰলৈ উভতি নাহিল। কইনাৰ পৰিয়ালে গৌৰৱৰ পৰিয়ালক জীৱন্তে জ্বলাই দিয়াৰ ভাবুকি দিয়াৰ অভিযোগো উঠিছে।
যোৱা বছৰৰ ৩ ছেপ্টেম্বৰত কল্পনাৰ ভাতৃ ৰাহুলে পিতৃৰ বেংক একাউণ্টৰ সবিশেষ মুস্কানৰ সৈতে শ্বেয়াৰ কৰি দাবী কৰা ধন শহুৰেকৰ ঘৰৰ পৰা সেই একাউণ্টলৈ ট্ৰেন্সফাৰ কৰিবলৈ নিৰ্দেশ দিয়ে।
কেইমাহমানৰ পিছত (২০২৬ চনৰ ২৫ মাৰ্চ) কল্পনা হঠাতে গৌৰৱৰ ঘৰত পিতৃ (নৰেন্দ্ৰ), ভাতৃদ্বয় (বিকাশ আৰু ৰাহুল) আৰু এজন ঘটক (মুন্না মাষ্টৰ)ৰ সৈতে উপস্থিত হয়। তেওঁলোকে গৌৰৱৰ পৰিয়ালৰ লোকক ঘৰৰ ভিতৰতে আবদ্ধ কৰি ৰাখে আৰু তেওঁলোকক লক্ষ্য কৰি অশ্ৰাৱ্য গালি-গালাজ আৰু মৃত্যুৰ ভাবুকি দি থাকে।
অভিযোগ অনুসৰি, কল্পনাৰ পৰিয়ালে গৌৰৱক ৯০ লাখ টকা সংগ্ৰহৰ বাবে দুঘণ্টাৰ সময়সীমা দি কয় যে যদি তেওঁ জীয়াই থাকিব বিচাৰে তেন্তে সেই সময়ৰ ভিতৰতে ধনৰ ব্যৱস্থা কৰিব লাগিব। গৌৰৱৰ পিতৃ ৬৭ বছৰীয়া উম্মেদ সিং হৃদৰোগী আৰু দৃষ্টিশক্তিহীন। তেওঁ অপৰাধীৰ চৰম অপমান আৰু মৌখিক গালি-গালাজৰ বলি হয়। আনকি অপৰাধীসকলে তেওঁলোকক উদ্দেশ্যি মন্তব্য কৰিছিল যে “আপোনালোক মৰি যোৱাই উচিত।”
অভিযুক্তই ঘটনাটো দুৰ্ঘটনাৰ দৰে দেখাবলৈ ঘৰৰ গেছ পাইপ ক্ষতিগ্ৰস্ত কৰে । অৱশেষত আৰক্ষীৰ সহযোগত পৰিয়ালটোক উদ্ধাৰ কৰিবলৈ সক্ষম হয়।
অভিযোগকাৰীয়ে দাবী কৰা মতে, তাৰপিছতো কল্পনা আৰু তেওঁৰ পৰিয়ালৰ লোকক প্ৰায়ে তেওঁলোকৰ ঘৰৰ আশে পাশে ঘূৰি ফুৰা দেখা যায়। তেওঁলোকে দাবী-ভাবুকি দি সন্ত্ৰস্ত পৰিস্থিতিৰ সৃষ্টি কৰি আহিছে। খবৰ অনুসৰি ঘটক মুন্না মাষ্টৰে স্বীকাৰ কৰিছে যে তেওঁ সুপৰিকল্পিত ষড়যন্ত্ৰ ৰচনা কৰিছিল, যাৰ মূল উদ্দেশ্য আছিল বিয়াৰ আয়োজন কৰি ধন আহৰণ কৰা।
এই ঘটনাত গোচৰ ৰুজু কৰা হৈছে আৰু আৰক্ষীৰ তদন্ত অব্যাহত আছে।
