যোৱা নিশা অসম আৰুণাচল প্ৰদেশ সীমান্তত অৱস্থিত লখিমপুৰ জিলাৰ অন্তৰ্গত বান্দৰদেৱাৰ হিম্মৎসিংকাৰ চৌহদৰ নিকটস্থ ৭খন পতিতালয়ত অসামৰিক আৰু আৰক্ষী প্ৰশাসনে বুলডজাৰেৰে উচ্ছেদ অভিযান চলাইছে। এই পতিতালয়কেইখনে এলেকাটোত দীৰ্ঘ দিন ধৰি অনৈতিক কাৰ্য-কলাপ বৃদ্ধি কৰিছিল বুলি স্থানীয় ৰাইজে অভিযোগ কৰি আহিছিল।
চৰকাৰী ভূমিত গঢ় লৈ উঠা এই পতিতালয়কেইখনে অঞ্চলটোক মানৱ সৰবৰাহ, অবৈধ জুৱা, মদৰ আড্ডালৈ পৰ্যৱসিত কৰি তোলাৰ লগতে আনুষংগিক বিভিন্ন অপৰাধৰ কেন্দ্ৰবিন্দু কৰি তুলিছিল।
ৰাইজৰ অভিযোগৰ ভিত্তিত লখিমপুৰৰ অতিৰিক্ত আৰক্ষী অধীক্ষক শান্তনু কুমাৰ দত্ত, উপ আৰক্ষী অধীক্ষক ফাৰুখ আহমেদ আৰু এছ ভুঞাৰ লগতে নাৰায়ণপুৰ আৰু বিহপুৰীয়াৰ ৰাজহ চক্ৰ বিষয়া ক্ৰমে বিএছ ছাদ্দব আৰু দীপ্তি মৰাং সহ লখিমপুৰ আৰক্ষীৰ এটা দলে এই পতিতালয়বোৰৰ উচ্ছেদ অভিযানৰ নেতৃত্ব দিছিল।
অনৈতিক কাম-কাজৰ সৈতে লিপ্ত থকাৰ অভিযোগত আৰক্ষীয়ে ঘৰকেইটাৰ পৰা ৫গৰাকী মহিলাকে ধৰি ১৬গৰাকী ব্যক্তিক গ্ৰেপ্তাৰ কৰে। মহিলাসকলক লখিমপুৰৰ বাহিৰৰ পৰা সৰবৰাহ কৰা হৈছিল আৰু দেহ ব্যৱসায়ত জড়িত কৰোৱা হৈছিল আৰক্ষীয়ে জানিবলৈ দিয়ে।
প্ৰণিধানযোগ্য যে ইয়াৰ পূৰ্বে হাৰমতী, পথালি পাহাৰ আৰু বান্দৰদেৱাৰ ৰাইজৰ অভিযোগৰ ভিত্তিত যোৱা বছৰ একেই স্থানতেই জিলা প্ৰশাসনে পতিতালয় ধ্বংস কৰিছিল। কিন্তু সেইবোৰ পুনৰ ঠন ধৰি উঠি এলেকাটোৰ পৰিৱেশ বিনষ্ট কৰি তুলিছিল। এই উচ্ছেদ অভিযানটোৰ নেতৃত্ব দিছিল লালুক আৰু বিহপুৰীয়া আৰক্ষী থানাৰ ভাৰপ্ৰাপ্ত বিষয়া ক্ৰমে অজিত কুমাৰ ভুঞা আৰু লিণ্টু বৰা আৰু বান্দৰদেৱা আৰক্ষী চকীৰ ভাৰপ্ৰাপ্ত পৰিদৰ্শক ধনেশ্বৰ দাসে।
মন কৰিবলগীয়া যে মাত্ৰ এদিন পূৰ্বে ধেমাজি জিলাৰ গোগামুখত মানৱ সৰবৰাহকাৰীৰ হাতৰ পৰা এগৰাকী ১০ বছৰীয়া নাবালিকাক স্থানীয় ৰাইজৰ সক্ৰিয় সহযোগিতাত উদ্ধাৰ কৰা হয়। ভয়ংকৰ কথাটো হৈছে বালিকাগৰাকীক নিজৰ দেউতাকেই ক্ৰেতাৰ সৈতে এখন গাড়ীত লৈ আহিছিল। বছৰি ৩৬ হেজাৰ টকাৰ বিনিময়ত নাবালিকাগৰাকীক নিজৰ দেউতাকে কেংগো লোমী নামৰ লোকজনক লীজত দিছিল। লোকজনৰ সৈতে ষ্টাম্প পেপাৰত চুক্তিপত্ৰ পৰ্যন্ত স্বাক্ষৰ কৰা হৈছিল।
আৰক্ষীয়ে জনোৱা মতে নাবালিকাগৰাকীৰ ঘৰ নামনি অসমৰ নলবাৰী জিলাত আৰু তেওঁক লৈ অহা লোকজন তেওঁৰ আচল পিতৃ নহয়। আৰক্ষীয়ে ইতিমধ্যে ভুৱা পিতৃ আৰু মানৱ সৰবৰাহকাৰী কেংগো লোমীক গ্ৰেপ্তাৰ কৰিছিল যদিও শেহতীয়াভাৱে লোমীক মুকলি কৰি দিছে।
ঘটনাটোৱে অসম-অৰুণাচল সীমান্তৰ সমীপৱৰ্তী ধেমাজি আৰু লখিমপুৰ জিলাত চলি থকা মানৱ সৰবৰাহকাৰী চক্ৰৰ এখন ভয়াবহ চিত্ৰ তুলি ধৰাৰ লগতে নাবালিকা সৰবৰাহকাৰীজন নিৰাপদে সাৰি যোৱাৰ পৰা এই এলেকাটো যে মানৱ-সৰবৰাহকাৰীৰ ভূস্বৰ্গলৈ পৰ্যৱসিত হৈছে সেই কথাটোৱেই প্ৰতীয়মাণ হৈছে।
