ছয় ৰাজ্যৰ বিধানসভাৰ উপ নিৰ্বাচনৰ আজি ফলাফল ঘোষণা কৰিছে নিৰ্বাচন আয়োগে। ঘোষিত ফলাফলত মিশ্ৰিত সঁহাৰি লাভ কৰিছে কেন্দ্ৰৰ শাসকীয় বিজেপি আৰু বিৰোধী দলসমূহে।
নিৰ্বাচন অনুষ্ঠিত হোৱা ত্ৰিপুৰাৰ দুখন বিধানসভাৰ আসন ক্ৰমে ধনপুৰ আৰু বক্সানগৰ – দুয়োটা সমষ্টিতে চিপিআই(এম)ক পৰাস্ত কৰি বিজেপিয়ে জয়লাভ কৰিছে।
একেদৰে উত্তৰাখণ্ডৰ বাগেশ্বৰ বিধানসভাৰ আসনখনো দলটোৱে অক্ষুণ্ণ ৰাখিছে। আনহাতে কেৰালাৰ পুথুপল্লীত কংগ্ৰেছ প্ৰাৰ্থী তথা প্ৰাক্তন মুখ্যমন্ত্ৰী ওমমেন চাণ্ডীৰ পুত্ৰ চাণ্ডী ওমমেনে অভিলেখ ব্যৱধানত জয়লাভ কৰে।
ইফালে পশ্চিমবংগৰ ধুপগুৰি বিধানসভাৰ আসনত তৃণমূল কংগ্ৰেছে বিজেপিক ৪৩০০ ৰো অধিক ভোটত পৰাস্ত কৰে। ঝাৰখণ্ডৰ ডুমৰীত জেএমএমৰ প্ৰাৰ্থী বেবি দেৱীয়ে ১৭ হাজাৰৰো অধিক ভোটত জয়লাভ কৰে।
উপ নিৰ্বাচন অনুষ্ঠিত হোৱা উত্তৰ প্ৰদেশৰ ঘৌষীত সমাজবাদী পাৰ্টিয়ে জয়লাভ কৰে।
বিৰোধী মিত্ৰজোঁট INDIA গঠনৰ পিছত অনুষ্ঠিত হোৱা এই উপ নিৰ্বাচনৰ ফলাফল ৰাজ্য আৰু ৰাষ্ট্ৰীয় উভয় পৰ্যায়তে অতি তাৎপৰ্যপূৰ্ণ বুলি বিবেচিত হৈছে।
