বিশ্বকাপত অভিষেক ঘটোৱাৰ সময়তে কেপ ভাৰ্ডেই লিখিছে নতুন কাহিনী। প্ৰথম দুখন মেচত স্পেইন আৰু উৰুগুৱেক স্তব্ধ কৰি তেওঁলোকে আচৰিত কৰি তুলিছিল। এটা সময়ত বিশ্বাস কৰিবলৈকে টান আছিল যে মাত্ৰ ছয় লাখ জনসংখ্যাৰ এই দেশখনে বিশ্বকাপ খেলিব। সকলো বাধা অতিক্ৰম কৰি বিশ্বকাপৰ মূল মঞ্চত কেপ ভাৰ্ডেৰ স্থান আছিল এক ডাঙৰ আশ্চৰ্য।
এইবাৰ সেই সাধুকথাৰ দৰে কাহিনীটোত সংযোজন হ’ল এক নতুন অধ্যায়। কেপ ভাৰ্ডেই গ্ৰুপ পৰ্যায় অতিক্ৰমি বিশ্বকাপৰ নকআউট পৰ্যায়ত প্ৰৱেশ কৰি ইতিহাস ৰচনা কৰিলে। শনিবাৰে ছৌদি আৰৱৰ বিৰুদ্ধে গ’লবিহীন ড্ৰ’ হোৱাৰ পাছতো ‘ব্লু শ্বাৰ্কছ’ বাহিনী গ্ৰুপ ‘আই’ৰ দ্বিতীয় দল হিচাপে ৩২ ৰাউণ্ডত প্ৰৱেশ কৰে। এইবাৰ লিয়নেল মেছিৰ নেতৃত্বত আৰ্জেণ্টিনাৰ প্ৰত্যাহ্বানৰ সন্মুখত ভোজিনহাৰ দল।
কেপ ভাৰ্ডেই অসম্ভৱক সম্ভৱ কৰি তুলিলে, যিটো প্ৰতিযোগিতা আৰম্ভ হোৱাৰ আগতে বহুতে কল্পনাও কৰা নাছিল। শনিবাৰে গ্ৰুপৰ অন্তিমখন খেলত ছৌদি আৰৱৰ বিৰুদ্ধে ০-০ গ’লত ড্ৰ’ হয়।
প্ৰথম দুখন খেলত কেপ ভাৰ্ডেই স্পেইনৰ বিৰুদ্ধে ০-০ আৰু উৰুগুৱেৰ বিৰুদ্ধে ২-২ গ’লত ড্ৰ’ কৰিছিল। আনহাতে, শনিবাৰে স্পেইনৰ হাতত পৰাস্ত হৈ উৰুগুৱেই তিনিখন মেচৰ পৰা দুটা পইণ্টেৰে খেলখন সামৰে। সেয়েহে ছৌদি আৰৱৰ বিৰুদ্ধে ড্ৰ’ হোৱাৰ পাছতো কেপ ভাৰ্ডেই ৩ পইণ্টেৰে ৰানাৰ্ছ আপৰ স্থান দখল কৰে। ফলত দুবাৰৰ বিশ্ব চেম্পিয়ন উৰুগুৱে আৰু ২০৩৪ চনৰ বিশ্বকাপৰ আয়োজক ছৌদি আৰব বাহিৰ হয়।
হিউষ্টনত চৌদি আৰৱৰ বিৰুদ্ধে খেলখনৰ প্ৰথমাৰ্ধত কেপ ভাৰ্ডে সামান্য আগবাঢ়ি আছিল। ছৌদি আৰৱৰ অভিজ্ঞ ডিফেণ্ডাৰ হাছান আল তাম্বাকাটিয়ে ৩৩ মিনিটত আঘাতপ্ৰাপ্ত হৈ ষ্ট্ৰেচাৰত খেলপথাৰ এৰিবলৈ বাধ্য হয়, যিটো দলৰ বাবে এক বৃহৎ আঘাত। আন এখন মেচত যেতিয়া প্ৰথমাৰ্ধৰ শেষৰ ফালে উৰুগুৱেৰ বিৰুদ্ধে স্পেইনে অগ্ৰগতি লাভ কৰিছিল, তেতিয়া হিউষ্টনৰ গেলেৰীত থকা কেপ ভাৰ্ডেৰ অনুৰাগীসকলে এই খবৰ শুনি উল্লাসিত হৈ পৰিছিল।
অৱশ্যে খেলখনৰ প্ৰথমাৰ্ধত দুয়োটা দলে কোনো উল্লেখযোগ্য গ’ল দিয়াৰ সুযোগ সৃষ্টি কৰিবলৈ সক্ষম নহ’ল। অন্তিম ১৫ মিনিটত উত্তেজনাই শিখৰত উপনীত হয়। কিন্তু জয়ৰ বাবে হাহাকাৰ কৰা ছৌদি আৰবে আক্ৰমণ বৃদ্ধি কৰিব নোৱাৰিলে। বৰঞ্চ মেচখনৰ শেষৰ মুহূৰ্তত কেপ ভাৰ্ডেই গ’ল দিয়াৰ অধিক সুযোগ লাভ কৰিছিল। কিন্তু গ’লবিহীন ড্ৰ’ৰ মাজতো কেপ ভাৰ্ডেৰ বাবে তেওঁলোকৰ সপোন পূৰণৰ বাবে এই এটা পইণ্টেই যথেষ্ট আছিল।
প্ৰথমবাৰৰ বাবে বিশ্বকাপত অংশগ্ৰহণ কৰাটো কেপ ভাৰ্ডেৰ বাবে ইতিহাস আছিল। কিন্তু কেৱল অংশগ্ৰহণ কৰিয়েই তেওঁলোক সন্তুষ্ট নাছিল। শক্তিশালী প্ৰতিদ্বন্দ্বী দলৰ বিৰুদ্ধে দুৰন্ত যুঁজ দি ফুটবল জগতখনক আচৰিত কৰি তুলিলে ‘ব্লু শ্বাৰ্কছ’য়ে।
প্ৰথমখন খেলতে স্পেইনৰ বিৰুদ্ধে ড্ৰ’ কৰি বিশ্বক আচৰিত কৰি তোলে কেপ ভাৰ্ডেই। কেইবাটাও ছেভ কৰি চকু কপালত তোলে গ’লৰক্ষক ভোজিনহাই। পৰৱৰ্তী মেচত কেপ ভাৰ্ডে দুবাৰৰ বিশ্ব চেম্পিয়ন উৰুগুৱেৰ বিৰুদ্ধে উত্তেজনাপূৰ্ণ মেচত ২-২ গ’লত ড্ৰ’ কৰে। শনিবাৰে চৌদি আৰৱৰ বিৰুদ্ধে ০-০ গ’লত সমতা স্থাপন কৰি কেপ ভাৰ্ডেই অন্তিম ৩২ ৰ স্থান দখল কৰে। এইবাৰ তেওঁলোকে বিশ্ব চেম্পিয়ন আৰ্জেণ্টিনাৰ বিৰুদ্ধে ইতিহাস ৰচাৰ অপেক্ষাত।
