বাজেট বহিৰ্ভুত ব্যয় ৩৫৪১ কোটি টকা। এই বৃহৎ পৰিমাণৰ ধন ক’ত খৰচ হ’ল? মহাৰাষ্ট্ৰ চৰকাৰে সন্তোষজনক উত্তৰ দিয়া নাই। বিজেপি নেতৃত্বাধীন মহাযুতি চৰকাৰৰ ‘মুখ্যমন্ত্ৰী মাঝি লড়কি বহিন যোজনা’ক লৈ বৃহৎ অনিয়মৰ ইংগিত দিছে CAG-য়ে।
ৰাজ্যিক বিত্ত নিৰীক্ষণ প্ৰতিবেদনত কেগে কয় যে ২০২৪-২৫ চনত মহিলাসকলক মাহেকীয়া ভাট্টা প্ৰদানৰ বাবে এই আঁচনিৰ বাজেট অনুমান, ব্যয় নিয়ন্ত্ৰণ আৰু বিত্তীয় ব্যৱস্থাপনাত ‘উল্লেখযোগ্য বিসংগতি’ আছে। ৩৫৪১ কোটি টকাৰ অতিৰিক্ত ব্যয়ৰ কোনো বিশেষ ব্যাখ্যা নাই।
কেগৰ এই ‘বিপদ সংকেত’ যে কেৱল কাকতলীয়া নহয়, সেই কথাই খোদ মহাৰাষ্ট্ৰ চৰকাৰৰ পৰীক্ষণ প্ৰক্ৰিয়াত চৰ্চালৈ আহিছে। অনিয়মৰ অভিযোগক লৈ সৃষ্টি হোৱা হুলস্থুলৰ মাজতে এইবাৰ ৯২ লাখৰো অধিক নাম (বেছিভাগেই বিড জিলাত) এই আঁচনিৰ পৰা বাদ দিয়া হৈছে।
বিতৰ্কৰ আৱৰ্তত পৰীক্ষণ প্ৰক্ৰিয়াত দেখা গৈছে যে মুঠ হিতাধিকাৰীৰ (২৪ লাখ) আনুমানিক ৩৮ শতাংশই ‘অযোগ্য আৰু ভুৱা’ একাউণ্ট! চৰ্ত উলংঘা কৰি মাহৰ পিছত মাহ অসংখ্য চৰকাৰী কৰ্মচাৰীৰ একাউণ্টত, আনকি প্ৰায় ২৯ হাজাৰ পুৰুষৰ একাউণ্টত ধন জমা হৈ আহিছে।
ইফালে কংগ্ৰেছে কেগৰ প্ৰতিবেদনক কেন্দ্ৰ কৰি দুৰ্নীতিৰ অভিযোগত সৰৱ হৈছে। এক্স হেণ্ডেলত কংগ্ৰেছে কৈছে- ‘লড়কি বহিন যোজনাৰ নামত মহাৰাষ্ট্ৰৰ বিজেপি চৰকাৰে কোটি কোটি টকাৰ দুৰ্নীতি সংঘটিত কৰিছে। কেগৰ প্ৰতিবেদনত যোজনাৰ বিত্তীয় ব্যৱস্থাপনাৰ তত্বাৱধানত ডাঙৰ বিসংগতি ধৰা পৰিছে। এই প্ৰকল্পৰ বাবে ২৯,৬৯৩ কোটি টকা অনুমোদন কৰা হৈছিল। কিন্তু চৰকাৰে ৩৫৪১ কোটি টকা অধিক ব্যয় কৰিছে। বাজেট বহিৰ্ভুত এই ব্যয়ৰ কোনো হিচাপ চৰকাৰৰ হাতত নাই।’
উল্লেখ্য যে ২০২৪ চনৰ বিধানসভা নিৰ্বাচনৰ পূৰ্বে মহাৰাষ্ট্ৰৰ এন ডি এ চৰকাৰে ‘লড়কি বহিন যোজনা’ আৰম্ভ কৰিছিল। এই প্ৰকল্পত ২১ৰ পৰা ৬৫ বছৰ বয়সৰ ভিতৰৰ মহিলাৰ একাউণ্টত মাহিলী ১৫০০ টকা প্ৰদান কৰা হয়।কিন্তু আঁচনিখনৰ চৰ্ত অনুসৰি চৰকাৰী কৰ্মচাৰী, আয়কৰদাতা, আন কিছুমান আঁচনিৰ হিতাধিকাৰী আৰু বাৰ্ষিক ২.৫ লাখ টকাতকৈ অধিক আয়ৰ পৰিয়ালে এই ভাট্টা নাপায়।
পিচে, পৰীক্ষণ প্ৰক্ৰিয়াৰ সময়ত বৃহৎ সংখ্যক বিসংগতি পোহৰলৈ আহিছে। দেখা গৈছে যে বাদ পৰা ৯২ লাখৰ ভিতৰত অধিকাংশক্ষেত্ৰতে (প্ৰায় ৬২ লাখ বা ৬৭ শতাংশ) বাধ্যতামূলক ই-কেৱাইচি নাই। এই ‘ভুৱা’ একাউণ্টৰ লগতে প্ৰায় ২৯ হাজাৰ (০.৩১ শতাংশ) ‘পুৰুষ’ লড়কি ধৰা পৰিছে।
যিসকলৰ পৰিয়ালৰ আয় ২.৫ লাখ টকাতকৈ অধিক, তেওঁলোকৰ সংখ্যা ১৬ লাখ (১৭ শতাংশ)। পৰীক্ষণ প্ৰক্ৰিয়াৰ সৈতে জড়িত বিষয়াসকলে জনোৱা মতে, আঁচনিখন আৰম্ভ হোৱাৰ পৰা বন্ধ হোৱাৰ আগলৈকে এই একাউণ্টসমূহত মুঠ প্ৰায় ১৪ হাজাৰ কোটি টকা জমা হৈছে।
