কিছুমান পুৰণি আইন দেশৰ বাবে বোজা স্বৰূপ হৈ পৰিছে, এইবোৰৰ সংশোধন কৰাৰ সময় আহিছে। কিয়নো কিছুমান পুৰণি আইন বিগত শতিকাটোৰ বাবেহে আছিল। কৃষক বিদ্ৰোহে দেশৰ ৰাজধানী আগুৰি থকাৰ সময়তে আজি সোমবাৰে প্ৰধানমন্ত্ৰী নৰেন্দ্ৰ মোদীয়ে এইদৰে কয়।
দেশৰ কেবাখনো ৰাজ্যৰ কৃষকে কেন্দ্ৰীয় চৰকাৰে প্ৰণয়ন কৰা তিনিখন কৃষি আইন বাতিল কৰাৰ দাবীত যোৱা ১১ দিন ধৰি দিল্লী আৰু ইয়াৰ সীমান্তৰ সংগোযী এলেকাবোৰত নিৰন্তৰ প্ৰতিবাদ সাৱ্স্ত্য কৰি থকাৰ সময়তে প্ৰধানমন্ত্ৰীৰ এই মন্তব্যই বিশেষ তাৎপৰ্য বহন কৰিছে।
উল্লেখ্য যে ইতিমধ্যে কৃষক সংগঠনসমূহ আৰু চৰকাৰৰ মাজত অনুষ্ঠিত হোৱা পাঁচলানিকৈ আলোচনা ব্যৰ্থ হৈছে আৰু কৃষক সংগঠনসমূহে ৮ ডিচেম্বৰত দেশজুৰি ভাৰত বন্ধৰ আহ্বান জনাইছে।
লগতে পঢ়ক : কৃষকৰ আহ্বানত কাইলৈ দেশ জুৰি ভাৰত বন্ধ : কেই বজাত আৰম্ভ হৈ কেইবজাত সামৰণি পৰিব এই বন্ধ?
এনে সময়তে প্ৰধানমন্ত্ৰীয়ে সোমবাৰে কয় “দেশৰ উন্নয়নৰ বাবে আইনসমূহ সংশোধন কৰাৰ প্ৰয়োজন আছে। নতুন নিৰ্দেশনাৰে নতুন নতুন সুবিধা অন্তভুৰ্ক্ত কৰি আইনসমূহ সংশোধন কৰাৰ অতি প্ৰয়োজন। পুৰণি শতিকাৰ আইনেৰে আমি নতুন শতিকাক গঢ়িব নোৱাৰিম।”
কিছু আইন যোৱা শতিকাৰ বাবে উপযুক্ত আছিল যদিও চলিত শতিকাৰ বাবে সেইবোৰ বোজা হৈ উঠিছে বুলিও প্ৰধানমন্ত্ৰীয়ে কয়।
কৃষকে আহ্বান জনোৱা ভাৰত বন্ধৰ এদিন পূৰ্বে প্ৰধানমন্ত্ৰী মোদীয়ে কৰা মন্তব্যই কৃষক আন্দোলনতো প্ৰভাৱ পেলাব বুলি ধাৰণা কৰা হৈছে।
প্ৰধানমন্ত্ৰীৰ এই মন্তব্যৰ পিছত আন্দোলনৰত কৃষক সংগঠনসমূহে কি প্ৰতিক্ৰিয়া কৰিছে এই প্ৰতিবেদন প্ৰস্তুত কৰি থকা পৰ্যন্ত জানিব পৰা হোৱা নাই।
ইফালে কৃষকে আহ্বান জনোৱা ভাৰত বন্ধৰ প্ৰতি কংগ্ৰেছ, ৰাষ্ট্ৰীয়তাবাদী কংগ্ৰেছ, ডিএমকে, সমাজবাদী পাৰ্টি, তেলেংগাণা ৰাষ্ট্ৰ সমিতিসহ দেশৰ সকলোবোৰ বামপন্থী দলেই সমৰ্থন আগবঢ়াইছে।