তেওঁ হেনো গৌতম গম্ভীৰৰ লবীৰ বলি হৈছিল! কিন্তু প্ৰতিভাক কেতিয়াবা লুকুৱাই ৰাখিব পাৰিনে? নিশ্চয় নোৱাৰি। আৰু সেই কথাকে বাৰে বাৰে প্ৰমাণ কৰিছে ভাৰতীয় দলৰ অধিনায়ক শুভমন গিলে। আফগানিস্তানৰ বিৰুদ্ধে পুনৰ এবাৰ জিলিকি উঠিল তেওঁৰ বেট। এক দুৰ্দান্ত শতক অৰ্জন কৰিলে গিলে। একে সময়তে শতক অৰ্জন কৰিলে ঈশান কিষাণেও। ৰাষ্ট্ৰীয় দললৈ উভতি অহাৰ পিছৰে পৰা বাওঁহতীয়া উইকেটৰক্ষক বেটছমেনগৰাকীয়ে যিদৰে খেলিছে, সেয়া সঁচাকৈয়ে প্ৰশংসনীয়।
আফগানিস্তানৰ বিৰুদ্ধে টেষ্ট মেচতো তেওঁ শতক অৰ্জন কৰিছিল। ধৰমশালাত অনুষ্ঠিত প্ৰথমখন এদিনীয়াত ৮৪ ৰান কৰাৰ পিছত এইবাৰ একানা ষ্টেডিয়ামত ৭৭ টা বলত শতকৰ দেখা পালে শুভমন গিলে। তেওঁৰ এই ইনিংছটোত ১৩ টা চাৰি আৰু ২ টা ছয় অন্তৰ্ভুক্ত আছিল। এয়া তেওঁৰ খেলুৱৈ জীৱনৰ নৱমটো এদিনীয়া শতক। ইয়াৰ পূৰ্বে প্ৰথমখন এদিনীয়াত ভাৰতীয়সকলৰ ভিতৰত দ্ৰুততম অৰ্থাৎ ৬২ টা ইনিংছত ৩০০০ ৰান কৰাৰ অভিলেখ গঢ়িছিল গিলে। এই তালিকাত আটাইতকৈ ওপৰত আছে দক্ষিণ আফ্ৰিকাৰ কিংবদন্তি খেলুৱৈ হাছিম আমলাৰ নাম। তেওঁ ৫৭ টা ইনিংছত এই অভিলেখ গঢ়িছিল।
শুভমনৰ পিছতে এক সুন্দৰ শতক উপহাৰ দিলে ঈশান কিষাণেও। ৭১ টা বলত ১৪ টা চাৰি আৰু ৪ টা ছয়ৰ সহায়ত তেওঁ নিজৰ শতক সম্পূৰ্ণ কৰে। ইয়াৰ পিছত বাওঁহতীয়া বেটছমেনগৰাকী অধিক আক্ৰমণাত্মক হৈ পৰে। অৱশেষত ৭৯ টা বলত ১২৫ ৰান কৰি নাঙ্গিয়ালিয়া খাৰোটেৰ বলত ছয় মাৰিবলৈ গৈ তেওঁ আউট হয়। মিড উইকেটত ভাৰতীয় উইকেটৰক্ষকগৰাকীৰ কেচ ধৰে অতিৰিক্ত ফিল্ডাৰ ইকৰাম আলিখিলে। সামগ্ৰিকভাৱে তেওঁ খেলখনত ৭ টা ছয় মাৰে।
একানা ষ্টেডিয়ামত নিজৰ দ্বিতীয়টো শতক অৰ্জন কৰাৰ পূৰ্বে তেওঁ ২৬ টা ইনিংছত ১০০০ ৰানৰ ঘৰ অতিক্ৰম কৰে। এয়াও এক অভিলেখ। এদিনীয়াত দ্ৰুততম ১০০০ ৰান কৰা ভাৰতীয় ক্ৰিকেটাৰৰ তালিকাত প্ৰথম স্থানত আছে শুভমন গিল। তেওঁ ১৯ টা ইনিংছতে এই সফলতা লাভ কৰিছিল। ইয়াৰ পিছতে আছে ক্ৰমে বিৰাট কোহলী আৰু শিখৰ ধাৱান। তেওঁলোক দুয়োৱে ২৪ টা ইনিংছত ১০০০ ৰান স্পৰ্শ কৰিছিল। ২৫ টা ইনিংছত নৱজোত সিং সিধু আৰু শ্ৰেয়স আয়াৰে এই অভিলেখ গঢ়াৰ বিপৰীতে ২৬ টা ইনিংছত এই সফলতা অৰ্জন কৰিলে ঈশানে।
