অসমত এতিয়া কোনোবাই খিলঞ্জীয়া মানুহৰ হৈ মাত মাতিলেই টাৰ্গেট হয় নেকি বিজেপি দল আৰু চৰকাৰৰ? এই প্ৰশ্ন উত্থাপিত হৈছে খিলঞ্জীয়া মানুহৰ হৈ মাত মতা ইজনৰ পিছত সিজন নেতাক বিজেপি দল আৰু চৰকাৰে ধাৰাবাহিকভাৱে ‘টাৰ্গেট’ কৰি লোৱা দেখি।
তিনিচুকীয়াৰ ধলাত সংঘটিত বৰ্বৰ কাণ্ডৰ পিছতেই আৰক্ষীয়ে ইতিমধ্যে আলফা নেতা মৃণাল হাজৰিকা আৰু জিতেন দত্তক গ্ৰেপ্তাৰ কৰি জেইল হাজোতলৈ প্ৰেৰণ কৰিছে।
ঘটনাটোৰ লগত আলফা নেতাকেইজনৰ কোনো সম্পৰ্ক নাথাকিলেও ইয়াৰ পৃষ্ঠভূমিক ব্যৱহাৰ কৰি তেওঁলোকৰ পূৰ্বৰ মন্তব্যৰ বাবে গ্ৰেপ্তাৰ কৰা হৈছে দুয়োজনকে।
শেহতীয়া খবৰ মতে, আন এজন আলোচনাপন্থী নেতা প্ৰবাল নেওগৰ বিৰুদ্ধেও এই ‘অভিযান’ৰ অনুশীলন ইতিমধ্যে সম্পূৰ্ণ হৈছে। জানিব পৰামতে, আজি নেওগৰ বিৰুদ্ধে হোজাই থানাত এটা গোচৰ ৰুজু হৈছে। সুদীপ দেব নামৰ এজন বিজেপি কৰ্মীয়ে দিয়া এজাহাৰৰ ভিত্তিত আৰক্ষীয়ে ভাৰতীয় দণ্ডবিধিৰ ১৫৩(এ) ধাৰাত ৮৯৮/২০১৮ নম্বৰত এই গোচৰটো ৰুজু কৰিছে। উল্লেখযোগ্য যে, ভাৰতীয় দণ্ডবিধিৰ ১৫৩(এ) এটা জামিনবিহীন ধাৰা।
তাৎপৰ্য্যপূৰ্ণ যে আটাইকেইটা ঘটনাত বিজেপিৰ কৰ্মী বা সমৰ্থকে গোচৰ ৰুজু কৰে আৰু একেই বিজেপি চৰকাৰে তাৎক্ষণিকভাৱে এই নেতাসকলক গ্ৰেপ্তাৰ কৰে। আনহাতে নিজৰ দলৰ মানুহে (উদাহৰণ : বিধায়ক শিলাদিত্য দেব) কৰা খিলঞ্জীয়া বিৰোধী তথা উচটনিমূলক মন্তব্যৰ বিৰুদ্ধে আনে গোচৰ ৰুজু কৰিলেও চৰকাৰে কোনো ব্যৱস্থা নলয়। গতিকে প্ৰশ্ন উঠে –বিজেপি দল আৰু চৰকাৰে বুজাবুজিৰে খিলঞ্জীয়া মানুহৰ অস্তিত্ব ৰক্ষাৰ যুঁজক শেষ কৰিব বিচাৰিছে নেকি?
আনহাতে যোৱা কিছুদিন ধৰি ৰাজ্যিক বিজেপিৰ মুখপাত্ৰ আৰু সভাপতিয়ে অখিল গগৈক ‘বিশেষ টাৰ্গেট’ কৰি লোৱা দেখা গৈছে। ধাৰাবাহিকভাৱে দলটোৰ কেইবাজনো মুখপাত্ৰই কেৱল অখিল গগৈক লৈয়ে কেইবাখনো সংবাদমেল দিছে যোৱা ৮/১০ দিনৰ ভিতৰত। ইয়াৰ মাজত দল আৰু চৰকাৰৰ পৰৱৰ্তী ‘টাৰ্গেট’ অখিল গগৈ হোৱাটোকে ইংগিত দিয়ে নেকি?
উল্লেখযোগ্য যে নাগৰিকত্ব সংশোধনী বিধেয়কখনক লৈ যোৱা প্ৰায় এমাহ ধৰি খিলঞ্জীয়া অসমীয়াৰ কিছু সংগঠন আৰু অসমৰ বাঙালী সংগঠনবোৰৰ নেতাসকলৰ মাজত বেচ যুক্তিযুদ্ধ চলি আহিছে। তৰ্ক-বিতৰ্ক আৰু ধমকা-ধমকিৰ পৰ্য্যায়ো পাইছে কেতিয়াবা এই অৰিয়াঅৰিয়ে। সমান্তৰালভাৱে বিভিন্ন পক্ষৰ কেইবাজনো ব্যক্তিয়ে কিছুমান আপত্তিজনক আৰু বিতৰ্কিত মন্তব্য প্ৰক্ষেপ কৰি থকাও দেখা গৈছে।
কিন্তু ইয়াৰ মাজতে তিনিচুকীয়াৰ ধলাত ৫জনকৈ থলুৱা বাঙালী লোকক অচিনাক্ত বন্দুকধাৰীয়ে নিৰ্মমভাৱে গুলীয়াই হত্যা কৰা ঘটনাটো ঘটে আৰু ই জ্বলা জুইত ঘিউ ঢালে।
ইয়াৰ পাছতেই বিতৰ্কিত মন্তব্যৰ বাবে পূৰ্বৰ গোচৰৰ ভিত্তিত আৰক্ষীয়ে মৃণাল হাজৰিকা আৰু জিতেন দত্তক গ্ৰেপ্তাৰ কৰে।
ইপিনে, তেনে সময়তে বিটিচিৰ বেংগলী য়ুথ ষ্টুডেণ্টছ ফেডাৰেইশ্যনৰ সভাপতি সুজিত সৰকাৰে অসমীয়াক লৈ এক আপত্তিজনক মন্তব্য প্ৰকাশ কৰে। সুজিত সৰকাৰে “অসমীয়াক ঘৰে ঘৰে সোমাই পিটিম” বুলি সাংবাদিকৰ আগত ৰাজহুৱাকৈ মন্তব্য কৰিছিল। ইয়াৰ পাছতেই প্ৰৱাল নেওগে যোৱা ২৯ অক্টোবৰত সাংবাদিকৰ আগত অসমীয়াক লৈ সুজিত দেবে কৰা তেনে মন্তব্যৰ প্ৰত্যুত্তত ‘কাপুৰুষ আৰু পলৰীয়াৰ জাত’ বুলি দি ধমকি প্ৰদান কৰে। লগতে তেওঁ যোৱা ৩ নৱেম্বৰত সুজিত চৰকাৰৰ বিৰুদ্ধে তিনিচুকীয়া থানাত এটা গোচৰো ৰুজু কৰে।
অৱশ্যে, নেওগে সেই একে সময়তে, “মই কোনো গোষ্ঠী বিদ্বেষী নহয়” আৰু “বাঙালী সকলৰ সাহিত্য-সংস্কৃতিৰ চৰ্চাক মই সন্মান জনাওঁ” বুলিও মন্তব্য কৰিছিল।
পৰবৰ্তী সময়ত নেওগক মৃণাল হাজৰিকা আৰু জিতেন দত্তক গ্ৰেপ্তাৰ কৰা বিষয়টোক লৈও চৰকাৰৰ বিৰুদ্ধে সৰৱ হোৱা দেখা গৈছিল। লগতে বিতৰ্কিত মন্তব্য কৰি থকা বিজেপি বিধায়ক শিলাদিত্য দেবকো গ্ৰেপ্তাৰ কৰাৰ দাবী জনাই আহিছিল।
আনহাতে কেৱল জিতেন দত্ত আৰু মৃণাল হাজৰিকা বা প্ৰৱাল নেওগেই নহয়, বিতৰ্কিত মন্তব্য কৰা শিলাদিত্য দেব, সুকুমাৰ বিশ্বাস, প্ৰদীপ দত্ত ৰয় আদিৰ বিৰুদ্ধে আৰক্ষী তথা চৰকাৰে এই পৰ্যন্ত কোনো ব্যৱস্থা গ্ৰহণ কৰিব পৰা নাই। ইয়াৰ পৰাই দল আৰু চৰকাৰৰ খিলঞ্জীয়া লোকৰ বিৰুদ্ধে থকা ষড়যন্ত্ৰ ওলাই পৰে।
