যোৱা ২৪ জানুৱাৰীত কেন্দ্ৰীয় তদন্তকাৰী সংস্থাই কলিকতা উচ্চ ন্যায়ালয়ত আবেদন দাখিল কৰি আৰ জি কৰ হাস্পতালৰ ধৰ্ষণ-হত্যাৰ গোচৰৰ দোষী সঞ্জয় ৰায়ক মৃত্যুদণ্ডৰ বাবে আবেদন দাখিল কৰে।
ন্যায়াধীশ দেবাংছু বাছাকৰ নেতৃত্বত অনুষ্ঠিত এখন সংমণ্ডল বিচাৰপীঠে ২৭ জানুৱাৰীত চিবিআইৰ আবেদনৰ শুনানি গ্ৰহণ কৰাৰ লগতে পশ্চিম বংগ চৰকাৰে দিয়া একেধৰণৰ আবেদনৰো শুনানি গ্ৰহণ কৰিব বুলি জানিবলৈ দিয়ে।
বিচাৰপীঠে ৰায়ক বিচাৰ আদালতে দিয়া শাস্তিৰ অপৰ্যাপ্ততাৰ দাবীৰ ওপৰত আবেদনৰ শুনানিৰ বাবে ন্যায়াধীশ এম ডি শ্বাব্বৰ ৰছিদীকো সামৰি লোৱা বিচাৰপীঠখনকো প্ৰস্তাৱ আগবঢ়ায়।
চিবিআইক প্ৰতিনিধিত্ব কৰি ডেপুটি ছলিচিটৰ জেনেৰেল ৰাজদ্বীপ মজুমদাৰে কয় যে গোচৰৰ তদন্ত কৰা কেন্দ্ৰীয় সংস্থাটোৱে শাস্তিৰ অপৰ্যাপ্ততাৰ দোহাই দি নিম্ন আদালতৰ নিৰ্দেশক উচ্চ ন্যায়ালয়ৰ সন্মুখত প্ৰত্যাহ্বান জনোৱাৰ অধিকাৰ আছে।
সকলোৰে মনত হয়তো আছে, ২০২৪ চনৰ ৯ আগষ্টত আৰ জি কৰ মেডিকেল কলেজ এণ্ড হাস্পতালত কৰ্তব্যৰত চিকিৎসকক ধৰ্ষণ আৰু হত্যা কৰাৰ অপৰাধত ২০ জানুৱাৰীত সত্ৰ আদালতে দোষীক যাৱজ্জীৱন কাৰাদণ্ডৰ শাস্তি প্ৰদান কৰিছিল।
বুধবাৰে সংমণ্ডল বিচাৰপীঠে কয় যে ৰাজ্য চৰকাৰে দাখিল কৰা আবেদন স্বীকাৰ কৰাৰ সিদ্ধান্ত লোৱাৰ পূৰ্বে চিবিআই, ভুক্তভোগীৰ পৰিয়াল আৰু দোষীৰ আবেদনৰ শুনানি গ্ৰহণ কৰা হ’ব।
