কেন্দ্ৰীয় শিক্ষা মন্ত্ৰণালয়ে ঘোষণা কৰিছে CBSEৰ দশম আৰু দ্বাদশ শ্ৰেণীৰ ব’ৰ্ড পৰীক্ষাৰ সূচী।
মংগলবাৰে মন্ত্ৰণালয়ৰ সূত্ৰই প্ৰকাশ কৰা অনুসৰি অহা ৪ মে’ৰ পৰা দশম আৰু দ্বাদশ শ্ৰেণীৰ ব’ৰ্ড পৰীক্ষাসমূহ আৰম্ভ হ’ব।
সূচী অনুসৰি দশম শ্ৰেণীৰ পৰীক্ষা অহা ৭ জুন আৰু দ্বাদশ শ্ৰেণীৰ পৰীক্ষা ১১ জুনত সমাপ্ত হ’ব।
ইফালে প্ৰক্টিকেল পৰীক্ষাসমূহ আৰম্ভ কৰা হ’ব ১ মাৰ্চৰ পৰা।
Date-sheet of @cbseindia29 board exams of class X.
Wish you good luck!#CBSE pic.twitter.com/o4I00aONmy— Dr. Ramesh Pokhriyal Nishank (@DrRPNishank) February 2, 2021
দ্বাদশ শ্ৰেণীৰ পৰীক্ষাসমূহ দুটা বেলাত অনুষ্ঠিত হ’ব। আগবেলাৰ পৰীক্ষা পুৱা ১০.৩০ৰ পৰা দিনৰ ১.৩০ বজালৈ আৰু পিছবেলাৰ পৰীক্ষা বিয়লি ২.৩০ বজাৰ পৰা সন্ধিয়া ৫.৩০ বজালৈ অনুষ্ঠিত হ’ব।
আনহাতে দশম শ্ৰেণীৰ সকলো পৰীক্ষা পুৱা ১০.৩০ বজাৰ পৰা দিনৰ ১.৩০ বজালৈ এটা বেলাতে অনুষ্ঠিত কৰা হ’ব।
মন্ত্ৰণালয়ৰ সূত্ৰই প্ৰকাশ কৰা অনুসৰি সকলো পৰীক্ষাই কোভিড প্ৰটক’ল ৰক্ষা কৰি অফলাইনতে অনুষ্ঠিত হ’ব। পৰীক্ষাৰ সময়ত পৰীক্ষাৰ্থীয়ে মাস্ক পৰিধান কৰা আৰু পৰীক্ষাৰ হলত সোমোৱাৰ পূৰ্বে হাত চেনিটাইজড্ কৰাৰ লগতে সামাজিক দূৰত্ব বৰ্তাই ৰখাতো বাধ্যতামূলক হ’ব।
ইফালে দুয়োটা পৰীক্ষাৰে ফলাফল অহা ১৫ জুলাইত ঘোষণা কৰা হ’ব বুলি জনাইছে মন্ত্ৰণালয়ৰ সূত্ৰটোৱে।
উল্লেখ্য যে যোৱা মাহত কেন্দ্ৰীয় শিক্ষামন্ত্ৰী ৰমেশ পখ্ৰিয়াল নিশাঙ্কে মাৰ্চ-এপ্ৰিল মাহতে সীমিত পাঠ্যক্ৰমেৰে পৰীক্ষা অনুষ্ঠিত কৰিবলৈ চেষ্টা কৰা হ’ব বুলি ঘোষণা কৰিছিল।
