নিৰ্বাচনৰ সময়ত প্ৰচাৰ চলাবলৈ দুই তিনিবাৰকৈ অসমলৈ ঢাপলি মেলিছিল প্ৰধান মন্ত্ৰী নৰেন্দ্ৰ মোদী।
এ ফৰ আছাম বুলিও ভাষণৰ মাজত কোৱা প্ৰধানমন্ত্ৰীয়ে অসমক অষ্ট লক্ষ্মীৰে তুলনা কৰিছিল।
কিন্তু এতিয়া বলিয়া বানে ধুই নিছে ৰাজ্যৰ ২৫ খনকৈ জিলাৰ বিভিন্ন প্ৰান্ত। বানত ককবকাই আছে ২৬০৮ খন গাঁওৰ ২৯,৮০,৪৯৩ গৰাকী লোক। বৰ্তমানলৈকে ১৪১ গৰাকী লোকে বানৰ ফলত মৃত্যুক আঁকোৱালি লৈছে।
কিন্তু বানৰ এই বিভীষিকাৰ সময়ত এ ফৰ আসাম কোৱা প্ৰধান মন্ত্ৰীয়ে বান পৰিস্থিতিৰ বুজ লোৱাৰ উদ্দেশ্যে অসমলৈ আহিবলৈ বৰ্তমানলৈকে আহৰি নাপালে। আনকি মুখ্যমন্ত্ৰী ড০ হিমন্ত বিশ্ব শৰ্মালৈ ফোন কৰি কেন্দ্ৰীয় গৃহ মন্ত্ৰী অমিত শ্বাহেহে খবৰ লোৱা দেখিবলৈ পোৱা গ’ ল।
অৱশ্যে আনুষ্ঠানিকতা ৰক্ষা কৰি কেন্দ্ৰৰ পৰা এটা দল কালি নিশা গুৱাহাটীত উপস্থিত হৈ আজিৰে পৰা ৰাজ্যৰ বিভিন্ন প্ৰান্তত বান পৰিস্থিতি পৰ্য্যবেক্ষণৰ বাবে ৰাওনা হৈছে।
কেন্দ্ৰীয় চৰকাৰৰ প্ৰতিনিধি দলটোৱে দুটা ভাগত বিভক্ত হৈ অহা ৩ জুলাইলৈকে পৰ্য্যবেক্ষণ কৰিব।
ৰাজ্যিক দুৰ্যোগ প্ৰশমন বিভাগৰ পৰা প্ৰেৰণ কৰা এক বিজ্ঞপ্তিৰ জৰিয়তে এই কথা জনাইছে।
NCRMP ৰ যুটীয়া সচিব হৰ্ষ গুপ্তাৰ নেতৃত্বত প্ৰথম দলটোৱে কাছাৰ, কৰিমগঞ্জ আৰু হাইলাকান্দি জিলাত বান পৰিস্থিতি পৰ্য্যবেক্ষণ কৰিব।
কেন্দ্ৰীয় বিত্ত মন্ত্ৰণালয়ৰ উপ সঞ্চালক মহেশ ঠাকুৰৰ নেতৃত্বৰ দ্বিতীয় দলটোৱে ১ আৰু ২ জুলাইৰ দিনা নলবাৰী, বজালী, বৰপেটা, কামৰূপ আৰু মৰিগাঁও জিলাত বান পৰিস্থিতি পৰ্য্যবেক্ষণ কৰিব।
তাত্পৰ্য্যপূৰ্ণভাৱে, উজনি অসমতো বান পৰিস্থিতিয়ে ভয়াবহ ৰূপ ধাৰণ কৰিছে। কিন্তু পৰ্য্যবেক্ষণৰ বাবে দুটাকৈ দল অসমলৈ আহিলেও বিজ্ঞপ্তিত উজনি অসমৰ এখনো জিলাৰ নাম উল্লেখ নকৰিলে দুৰ্যোগ প্ৰশমন বিভাগটোৱে।
অহা ৩ জুলাইৰ দিনা কেন্দ্ৰীয় চৰকাৰৰ প্ৰতিনিধিৰ দলটো দিল্লীলৈ উভতি যাব।
এইখিনিতে উল্লেখ কৰিব লাগিব যে, মুখ্যমন্ত্ৰী ড০ হিমন্ত বিশ্ব শৰ্মাই বৰাক উপত্যকাৰ শিলচৰত এতিয়ালৈকে তৃতীয়বাৰলৈ উপস্থিত হৈ বান পৰিস্থিতি পৰ্য্যবেক্ষণ কৰিলে তথা নামনি অসমৰো বিভিন্ন জিলাত বান পৰিস্থিতি পৰ্য্যবেক্ষণৰ বাবে গ’ ল।
কিন্তু আজি পৰ্য্যন্ত উজনি অসমৰ বান পৰিস্থিতি পৰ্য্যবেক্ষণৰ বাবে মুখ্যমন্ত্ৰীগৰাকীৰো সময় নহ’ল।
