সকলোৱে মানি লৈছে যদিও একমাত্ৰ বাধা হৈ থিয় দিছে টুইটাৰ। কেন্দ্ৰীয় চৰকাৰ আৰু টুইটাৰৰ মাজৰ বিবাদে আনকি আদালত পৰ্যন্ত পাইছেগৈ।
কেন্দ্ৰৰ মোদী চৰকাৰে এইবাৰ টুইটাৰক শেষবাৰৰ বাবে সকীয়নি প্ৰদান কৰিছে।
শনিবাৰে টুইটাৰলৈ ‘চূড়ান্ত জাননী’ জাৰি কৰিছে কেন্দ্ৰই। মাইক্ৰ’ব্লগিং প্লেটফৰ্মটোক দেশৰ নতুন আইটি নীতি মানি লোৱাৰ আহ্বান জনোৱা হৈছে।
টুইটাৰৰ আইনী উপদেষ্টা জিম বেকাৰক সম্বোধন কৰি জাননীখন লিখা হৈছে। ইয়াত টুইটাৰে এতিয়াও নিয়ম অনুসৰি চীফ কমপ্লাইয়েল্স অ’ফিচাৰ, ৰেছিডেন্ট গ্ৰিভিয়েন্স অ’ফিচাৰ তথা ন’ডেল কনটেক্ট পাৰ্ছন নিয়োগ নকৰাৰ কথা উল্লেখ কৰা হৈছে।
জাননীখনত উল্লেখ কৰা হৈছে যে টুইটাৰে ভাৰতত ইয়াৰ কাৰ্যালয়ৰ ঠিকনা সম্পৰ্কেও একো জনোৱা নাই।
জাননীত কোৱা হৈছে যে আমেৰিকা যুক্তৰাষ্ট্ৰৰ বাহিৰে যিবোৰ দেশত টুইটাৰক বিনম্ৰতাৰে আদৰণি জনোৱা হৈছিল তাৰ ভিতৰত ভাৰত অন্যতম।
জাননীত কোৱা হৈছে যে ভাৰতত প্ৰায় ১০ বছৰৰো অধিক কাল ধৰি টুইটাৰ আছে। নতুন আইটি আইন নমনাটো ভাৰতীয় ব্যৱহাৰকাৰীসকলৰ প্ৰতি উদাসীনতাৰেই নামান্তৰ।
যোৱা ২৬ মে’ৰ পৰা কাৰ্যকৰী হোৱা এই আইন নামানিলে ব্যৱস্থা গ্ৰহণৰ কথাও উল্লেখ কৰা হৈছে জাননীখনত।
অৱশ্যে, টুইটাৰৰ ‘সদিচ্ছা’ৰ প্ৰতি লক্ষ্য ৰাখি শেষবাৰৰ বাবে সতৰ্ক কৰি দিয়া হৈছে বুলিও কোৱা হয় কেন্দ্ৰৰ জাননীখনত।
