দেশত কৰ’না মহামাৰী চলি থকা সময়ত কৰ বৃদ্ধিৰ পৰামৰ্শ সম্পৰ্কীয় ফোৰ্চ ৰিপ’ৰ্টৰ ঘটনাত তিনিগৰাকী জ্যেষ্ঠ ভাৰতীয় ৰাজহ সেৱাৰ বিষয়াক পদৰ পৰা আঁতৰোৱা হৈছে।
সূত্ৰ অনুসৰি, বিষয়া তিনিগৰাকীৰ বিৰুদ্ধে অভিযোগ পত্ৰ প্ৰস্তুত কৰা হৈছে আৰু তেওঁলোকক এই অভিযোগ পত্ৰৰ ১৫দিনৰ ভিতৰত উত্তৰ দিবলৈ কোৱা হৈছে।
বিষয়া তিনিগৰাকীক কেন্দ্ৰীয় লোক সেৱাৰ নিয়ম উলংঘা কৰাৰ কাৰণে অভিযোগ পত্ৰ জাৰি কৰা হৈছে।
কেন্দ্ৰীয় প্ৰত্যক্ষ কৰ পৰিষদৰ মতে এই বিষয়াকেইজনে ফোৰ্চ নামেৰে কৰ বৃদ্ধিৰ প্ৰস্তাৱ সম্পৰ্কে প্ৰতিবেদন প্ৰস্তুত কৰাৰ ক্ষেত্ৰত অগ্ৰণী ভূমিকা গ্ৰহণ কৰিছিল।
তেওঁলোকে প্ৰতিবেদনত সম্পদ কৰা, কৰ’না উপ কৰ লগোৱাৰ প্ৰস্তাৱ আগবঢ়াইছিল। বিভাগৰ মতে, এই প্ৰতিবেদনৰ জৰিয়তে কৰ আইনক লৈ বৰ্তমান বিত্তীয় পৰিস্থিতিত অনিশ্চয়তাৰ বাতাবৰণ সৃষ্টি হৈছে।
বিষয়াকেইজনৰ মাজত ১৯৮৮বৰ্ষৰ আই আৰ এছ প্ৰশান্ত ভূষণো আছে যি আই আৰ এছ এছোচিয়েশ্যনৰ সাধাৰণ সম্পাদক পদত আছে। তেওঁৰ বিৰুদ্ধে কৰ্তৃত্বহীনভাৱে প্ৰতিবেদন ৰাজহুৱা কৰাৰ অভিযোগ কৰা হৈছে।
সেইদৰে ২০০১বৰ্ষৰ আই আৰ এছ বিষয়া তথা এছোচিয়েশ্যনৰ যুটীয়া সম্পাদক আৰু ডি অ’ পি টিৰ সঞ্চালক প্ৰকাশ ডুবেই কৰ্কৃত্বহীনভাৱে কনিষ্ঠ বিষয়াৰ দ্বাৰা প্ৰতিবেদন প্ৰস্তুত কৰাই আই আৰ এছ এছোচিয়েশ্যনক দাখিল কৰিছিল।
সেইদৰে, ১৯৮৯বৰ্ষৰ আই আৰ এছ বিষয়া সঞ্জয় বাহাদুৰৰৰ বিৰুদ্ধেও কনিষ্ঠ বিষয়াক ব্যৱহাৰ কৰি প্ৰতিবেদন প্ৰস্তুত কৰাৰ অভিযোগ উঠিছে।
চৰকাৰী সূত্ৰৰ মতে, বিষয়াকেইগৰাকী বহু অভিজ্ঞতাসম্পন্ন প্ৰধান আয়ুক্ত পৰ্যায়ৰ বিষয়া আছিল আৰু তেওঁলোকে কনিষ্ঠ বিষয়াসকলক বিপথে পৰিচালিত কৰিছে।
উল্লেখযোগ্য যে বিষয়াকেইজনে ‘FORCE’ শীৰ্ষক এক প্ৰতিবেদনৰ জৰিয়তে চৰকাৰলৈ এলানি প্ৰস্তাৱ আগবঢ়াইছিল।
দেশৰ জ্যেষ্ঠ এই কৰ বিষয়াসকলে অলপতে আগবঢ়োৱা এই প্ৰস্তাৱলানিত কেবল সৎ আৰু নিয়মানুৱৰ্তী লোক তথা যিসকলে সঠিক সময়ত ৰিটাৰ্ণ জমা দিয়ে সেইসকলকৰ মাজতে কৰ ৰেহাই সীমিত ৰখাৰ প্ৰস্তাৱ দিছিল।
বৰ্তমান ১কোটি টকাৰ অধিক আয়ৰ লোকসকলে ৩০ শতাংশ হাৰত আয়কৰ দিবলগীয়া হয়। দেশত এইটোৱে হৈছে আয়কৰ সৰ্বোচ্চ মাত্ৰা। এইক্ষেত্ৰত তেওঁলোকে আয়কৰ বৃদ্ধি কৰি ৪০শতাংশ কৰাৰ প্ৰস্তাৱ আগবঢ়াইছিল।
তেওঁলোকে যিসকলৰ আয় ৫কোটি টকাৰ অধিক তেওঁলোকৰ সম্পদ কৰ পুনৰ হ্ৰাস কৰাৰ প্ৰস্তাৱ দিছিল।
তেওঁলোকে ৩মাহৰ পৰা ৬ মাহ পর্যন্ত এই কৰ আৰোপৰ প্ৰস্তাৱ আগবঢ়াইছিল।