এইবাৰ বিজয়ৰ শপত গ্ৰহণক লৈ ছ’চিয়েল মিডিয়াত কংগ্ৰেছ-বিজেপিৰ অৰিয়াঅৰি। তামিলনাডুৰ মুখ্যমন্ত্ৰী চন্দ্ৰশেখৰ জোচেফ বিজয় আৰু কংগ্ৰেছ সাংসদ ৰাহুল গান্ধীৰ এটা ইনষ্টাগ্ৰাম ৰিলক লৈ সৃষ্টি হৈছে এক নতুন ৰাজনৈতিক বিতৰ্কৰ।
কংগ্ৰেছে অভিযোগ কৰে যে ৰাহুল গান্ধীৰ অফিচিয়েল ইনষ্টাগ্ৰাম একাউণ্টত টেগ কৰা ৰিলটো ‘ব্লক’ কৰা হৈছে। তেওঁলোকে কেন্দ্ৰৰ নিৰ্দেশত এই কাম কৰা বুলি দাবী কৰে। কিন্তু কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ে এই অভিযোগ সম্পূৰ্ণৰূপে নাকচ কৰিছে।
দীৰ্ঘ সময় ধৰি চলা নাটকৰ অন্তত দেওবাৰে বিজয়ে তামিলনাডুৰ মুখ্যমন্ত্ৰী হিচাপে শপত গ্ৰহণ কৰে। এই অনুষ্ঠানত মিত্ৰজোঁটৰ অংশীদাৰ কংগ্ৰেছৰ প্ৰতিনিধি হিচাপে উপস্থিত থাকে ৰাহুল গান্ধী। কংগ্ৰেছৰ অফিচিয়েল হেণ্ডেলৰ পৰা তেওঁলোকৰ সাক্ষাৎ আৰু শপত গ্ৰহণৰ দৃশ্যৰে প্ৰস্তুত কৰা ৰিল এটা পোষ্ট কৰা হৈছিল। সেই ৰিলক কেন্দ্ৰ কৰিয়েই ঘটিছে বিতৰ্ক। অভিযোগ অনুসৰি কেই মুহূৰ্তমানৰ ভিতৰতে ৰিলটো ব্লক কৰি দিয়া হৈছে।
কংগ্ৰেছৰ সূত্ৰই দাবী কৰিছে যে তামিলনাডুৰ ৰাজনীতিত টিভিকেৰ মহাৰাজকীয় উত্থান আৰু ৰাহুল গান্ধীৰ সৈতে বিজয়ৰ ঘনিষ্ঠ ৰাজনৈতিক সম্পৰ্ক পোহৰলৈ অহাৰ পিছত এই পদক্ষেপ গ্ৰহণ কৰা হৈছে। ইনষ্টাগ্ৰামত পোষ্ট কৰা ৰিলটোত ৰাহুল গান্ধী আৰু বিজয়ৰ কেইবাটাও মুহূৰ্ত সন্নিবিষ্ট কৰা হৈছিল। কিন্তু পিছত ৰিলটো ব্যৱহাৰকাৰীয়ে দেখা নাপালে, কিয়নো পোষ্টটোত ‘আইনী প্ৰয়োজনীয়তাৰ বাবে নিষিদ্ধ’ৰ দৰে বাৰ্তা দেখা গৈছিল। ইয়াকে লৈ সৰৱ হৈছে কংগ্ৰেছ।
বিৰোধী নেতাৰ কণ্ঠ ৰুদ্ধ কৰাৰ লগতে ছ’চিয়েল মিডিয়াত তেওঁলোকৰ জনপ্ৰিয়তা আৰু প্ৰসাৰ হ্ৰাস কৰিবলৈ কেন্দ্ৰই বিভিন্ন ডিজিটেল প্লেটফৰ্মত হেঁচা প্ৰয়োগ কৰা বুলি দাবী কৰিছে কংগ্ৰেছ শিবিৰে। দলটোৰ এটা অংশই দাবী কৰিছে যে তামিলনাডুত বিজয়ৰ জনপ্ৰিয়তা আৰু ৰাহুল গান্ধীৰ সৈতে তেওঁৰ ৰাজনৈতিক বুজাবুজি বিজেপিৰ বাবে অস্বস্তিৰ কাৰণ হৈ পৰিছে।
আনহাতে, কেন্দ্ৰীয় চৰকাৰে এই অভিযোগ লগে লগে অস্বীকাৰ কৰি কয় যে, পোষ্টটো ব্লক বা আঁতৰোৱাৰ কোনো নিৰ্দেশ দিয়া নাই। মন্ত্ৰালয়ে দাবী কৰে যে ছ’চিয়েল মিডিয়া প্লেটফৰ্মসমূহে নিজৰ নীতি আৰু আইনী কাঠামোৰ ভিত্তিত কন্টেন্ট নিষিদ্ধ কৰিব পাৰে। কিন্তু এই ক্ষেত্ৰত চৰকাৰৰ কোনো হস্তক্ষেপ হোৱা নাছিল। একে সময়তে কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ে দাবী কৰিছিল যে ইনষ্টাগ্ৰামৰ আভ্যন্তৰীণ ব্যৱস্থাই ভুলকৈ পোষ্টটো ব্লক কৰাৰ বাবে চিহ্নিত কৰিছিল। অৱশ্যে এতিয়া পুনৰ উদ্ধাৰ হৈছে।
এক্সত কৰা এটা পোষ্টত কংগ্ৰেছ নেতা তথা গান্ধীৰ সহায়ক শ্ৰীবাত্সে দাবী কৰে যে ‘ইনষ্টাগ্ৰামে শপত গ্ৰহণ অনুষ্ঠানত ৰাহুল আৰু বিজয়ৰ ৰিল আৰু ফটো পোষ্ট ব্লক কৰিছিল।’ ইয়াতেই শেষ নহয়, কংগ্ৰেছ নেতা শ্ৰীবাত্সে অভিযোগ কৰে যে কেন্দ্ৰৰ বিজেপি চৰকাৰে দীৰ্ঘদিন ধৰি লোকসভাৰ বিৰোধী নেতা ৰাহুল গান্ধীৰ এক্স, ইউটিউব আৰু ইনষ্টাত অনুগামীৰ সংখ্যা হ্ৰাস কৰাৰ চেষ্টা চলাই আহিছে।
ব্লকৰ পূৰ্বে ভাইৰেল ৰিলটোৱে এঘণ্টাৰো কম সময়ৰ ভিতৰতে ১ কোটি ২০ লাখ ভিউ লাভ কৰাৰ বিপৰীতে ভাইৰেল ফটো পোষ্টটো ইতিমধ্যে ৪ কোটি ৬০ লাখ লোকৰ কাষ চাপিছিল বুলি শ্ৰীবাত্সে জানিবলৈ দিয়ে।
