মেডিকেল প্ৰৱেশ পৰীক্ষা NEET UG 2024ত ‘অতিৰিক্ত নম্বৰ’ বা ‘গ্ৰেচ নম্বৰ’ পোৱা পৰীক্ষাৰ্থীৰ নম্বৰ বাতিল কৰা হ’ব। কেন্দ্ৰই উচ্চতম ন্যায়ালয়ত জনায় যে ইয়াৰ পৰিৱৰ্তে তেওঁলোকক পৰীক্ষাত বহিবলৈ আৰু এটা সুযোগ দিয়া হ’ব।
অল ইণ্ডিয়া মেডিকেল এন্ট্ৰেঞ্চ টেষ্ট নীটত একেলগে ৬৭ জন পৰীক্ষাৰ্থীয়ে শীৰ্ষস্থান দখল কৰাৰ লগে লগে সমগ্ৰ দেশতে বিতৰ্ক আৰম্ভ হয়। পিছত পোহৰলৈ আহিল যে প্ৰশ্নকাকত আৰু কিছুমান পৰীক্ষা কেন্দ্ৰত সময়ৰ সমস্যাৰ বাবে ১৫৬৩ গৰাকী পৰীক্ষাৰ্থীক অতিৰিক্ত নম্বৰ দিয়া হৈছিল।
কিন্তু যেতিয়া ৰেংকিঙৰ বিতৰ্ক পোহৰলৈ আহিল, তেতিয়া বিভিন্ন মহলে এই অতিৰিক্ত নম্বৰৰ যুক্তিযুক্ততাক লৈ প্ৰশ্ন উত্থাপন কৰি প্ৰতিবাদ সাব্যস্ত কৰে। বিৰোধী ৰাজনৈতিক দলসমূহেও কেন্দ্ৰৰ বিৰুদ্ধে সৰৱ হৈ পৰে।
লগতে পঢ়কঃ ৰাজ্যত পুনৰ উৎকোচ গ্ৰহণৰ অপৰাধত গ্ৰেপ্তাৰ জিলা আয়ুক্ত কাৰ্যালয়ৰ কৰ্মচাৰী
উচ্চতম ন্যায়ালয়তো গোচৰ ৰুজু কৰা হয়। সেই গোচৰত উচ্চতম ন্যায়ালয়ে এই বিষয়ত কেন্দ্ৰৰ বক্তৱ্য জানিব বিচাৰিছিল। বৃহস্পতিবাৰে এক শপতনামাযোগে কেন্দ্ৰই তেওঁলোকৰ বক্তৱ্য জনায়।
১৫৬৩ গৰাকী নীট পৰীক্ষাৰ্থীক প্ৰদান কৰা অতিৰিক্ত নম্বৰ বা গ্ৰেচ নম্বৰ বাতিল কৰা হ’ব বুলি উচ্চতম ন্যায়ালয়ত কেন্দ্ৰই জনাইছে। তাৰ পৰিৱৰ্তে কেন্দ্ৰই পৰীক্ষাৰ্থীসকলক পুনৰ পৰীক্ষা দিয়াৰ সুযোগ দিব। যিসকলে এই পৰীক্ষা দিব বিচাৰে, তেওঁলোকে ২৩ জুনত এই পৰীক্ষা দিব লাগিব। কিন্তু কোনোবাই বিচাৰিলে এই পৰীক্ষাত অৱতীৰ্ণ নহ’বও পাৰে। তেনে ক্ষেত্ৰত তেওঁলোকে লাভ কৰা গ্ৰেচ নম্বৰ বাদ দি লাভ কৰা নম্বৰৰ ওপৰত ভিত্তি কৰি ৰেংকিং কৰা ঠিক হ’ব।
লগতে পঢ়কঃ ৩০০ কোটি টকাৰ সম্পত্তিৰ বাবে শহুৰেকক হত্যা বোৱাৰীয়েকৰ! হিট এণ্ড ৰাণ ঘটনাৰ ৰূপ দিয়াৰ চেষ্টা
উল্লেখ্য যে এই অল ইণ্ডিয়া মেডিকেল এন্ট্ৰেঞ্চপৰীক্ষাৰ কাউন্সেলিং ইতিমধ্যে আৰম্ভ হৈছে। উচ্চতম ন্যায়ালয়ে অৱশ্যে বৃহস্পতিবাৰে এই প্ৰক্ৰিয়াত স্থগিতাদেশ জাৰি কৰা নাই। বৰঞ্চ আদালতে কয় যে কাউন্সেলিং পূৰ্বনিৰ্ধাৰিত সময় অনুসৰণ কৰিয়েই চলিব। পৰীক্ষা পুনৰ হ’লেও তাত কোনো বাধা নাথাকিব।
