ল’কডাউনৰ পিছত পুনৰ শিক্ষানুষ্ঠান খোলাৰ পূৰ্বে কেন্দ্ৰীয় মানৱ সম্পদ উন্নয়ন মন্ত্ৰালয়ে ৰাষ্ট্ৰীয় শিক্ষা গৱেষণা পৰিষদ( NCERT)ৰ সৈতে কিছুমান নতুন নীতি উদ্ভাৱন কৰিছে।
এই নীতিসমূহ ল’কডাউনৰ পিছত শিক্ষানুষ্ঠানসমূহ পুনৰ আৰম্ভ হোৱাৰ পিছত কাৰ্যকৰী কৰা হ’ব।
দ্য ইণ্ডিয়ান এক্সপ্ৰেছৰ বাতৰি অনুসৰি নৱম শ্ৰেণীৰ পৰা দ্বাদশ শ্ৰেণীসমূহ খোলাৰ লগে লগে সৰ্বপ্ৰথমে শিক্ষাৰ্থীসকলে সামাজিক দূৰত্ব বজাই ৰখাৰ লগতে অন্যান্য নিয়মসমূহ মানি চলিব লাগিব।
অন্যহাতে, প্ৰথম শ্ৰেণীৰ পৰা পঞ্চম শ্ৰেণীসমূহ পৰৱৰ্তী তিনি মাহৰলৈকে পুনৰ আৰম্ভ হোৱাৰ সম্ভাৱনা নাই।
‘ওপৰ শ্ৰেণীৰ শিক্ষাৰ্থীসকলক একেলগে পাঠদান কৰা নহয়। এজন বিষয়াৰ প্ৰতিবেদনত কোৱা হৈছে যে শিক্ষানুষ্ঠানৰ কৰ্তৃপক্ষই নতুন ব্যৱস্থা কৰাৰ পিছত কিছু দিনৰ বাবেহে শ্ৰেণীসমূহ আৰম্ভ কৰা হ’ব যাতে শিক্ষাৰ্থীসকলে নতুন নিয়ম সম্পৰ্কে অৱগত হ’ব পাৰে।’ এজন বিষয়াই এইদৰে কয়।
দুজন শিক্ষাৰ্থীৰ মাজৰ দূৰত্ব ছয় ফুটকৈ নিৰ্দিষ্ট কৰি সামাজিক ব্যৱধান ৰক্ষা কৰা হ’ব।
এটা শ্ৰেণীক ১৫ ৰপৰা ২০ জনীয়া গোটলৈ বিভক্ত কৰি পাঠদান কৰাৰ পৰিকল্পনা কৰা হৈছে বুলি জানিব পৰা গৈছে।
তদুপৰি প্ৰত্যেকটো শ্ৰেণীকে বিকল্প দিনত পৰিচালনা কৰাৰ পৰিকল্পনাও কৰা হৈছে।
শিক্ষাৰ্থীসকলে মাস্ক পৰিধান কৰাটো বাধ্যতামূলক কৰাৰ লগতে শিক্ষানুষ্ঠানৰ কেন্টিনসমূহ প্ৰথম সময়ছোৱাত বন্ধ থাকিব আৰু প্ৰত্যেক শিক্ষাৰ্থীয়ে ঘৰৰ নিজৰ মধ্যাহ্ন ভোজনৰ টিফিন আনিব লাগিব। বাতৰিটোত এইদৰে কোৱা হৈছে।
প্ৰথম কেইমাহ মানৰ বাবে প্ৰাতঃসভা বন্ধ থাকিব।
শিক্ষানুষ্ঠানৰ বিভিন্ন স্থানত হেণ্ড চেনিটাইজাৰ ব্যৱস্থা কৰিব লাগিব কৰ্তৃপক্ষই।
শিক্ষাৰ্থীসকলৰ অভিভাৱক শিক্ষানুষ্ঠানৰ চৌহদৰ ভিতৰ সোমোৱাটো নিষিদ্ধ কৰা হ’ব আৰু তেওঁলোকে শিক্ষানুষ্ঠানৰ গেটলৈকেহে শিক্ষাৰ্থীক আগবঢ়াই থৈ যাব পাৰিব।
আনহাতে শিক্ষানুষ্ঠানৰ চৌহদত উলোৱা সোমোৱাৰ বাবে বিভিন্ন স্থানত নতুন পথ খুলিব লাগিব যাতে উলোৱা-সোমোৱাৰ সময়ত শিক্ষাৰ্থীসকলৰ মাজত ভিৰ সৃষ্টি নহয়।
প্ৰতিদিনে শিক্ষাৰ্থীসকল শিক্ষানুষ্ঠানলৈ অহাৰ আগত আৰু ছুটিৰ পিছত প্ৰতিটো শ্ৰেণী কক্ষতে সম্পূৰ্ণৰূপে চেনিটাইজেশ্যন কৰিব লাগিব।