উত্তৰ-পূবৰ লাখ লাখ ব্যৱহাৰকাৰীকে ধৰি সমগ্ৰ ভাৰতৰ ২০ কোটি ইউজাৰক অসুবিধাত পেলাই দেশত বন্ধ হৈ যাব পাৰে ৱটছএপ।
নৰেন্দ্ৰ মোদী চৰকাৰৰ চ’চিয়েল মিদিয়া সম্পৰ্কীয় প্ৰস্তাৱিত নিৰ্দেশনাই ভাৰতত অস্তিত্বৰ সংকট সৃষ্টি কৰিছে বিশ্বৰ সৰ্বাধিক ব্যৱহৃত বিনামূলীয়া মে’ছেঞ্জাৰ এপটোৰ।
কেন্দ্ৰীয় চৰকাৰে ব্যৱহাৰকাৰীৰ বাৰ্তাৰ “traceability” (জানিব পৰাৰ সুবিধা)ৰ সম্পৰ্কে দিয়া হেঁচাই আটাইতকৈ বিপদত পেলাইছে বিশ্বৰ ১৫০ কোটি লোকে ব্যৱহাৰ কৰা এপটোক।
“প্ৰস্তাৱিত বিধিসমূহে মেছেজৰ traceabilityৰ ওপৰত দিয়া জোৰে আমাক আটাইতকৈ চিন্তাত পেলাইছে,” ফে’চবুক মালিকানাধীন এপটোৰ যোগাযোগ বিভাগৰ মুৰব্বী কাৰ্ল ৱুঙৰ এই উদ্ধৃতি ইকনমিক টাইমছ-ৰ। ৱুং এসময়ত বৰাক অ’বামা প্ৰশাসনৰ মুখপাত্ৰ আছিল।
বিষয়াজনে লগতে কয় যে গোটেই পৃথিৱীৰ মানুহে নিজৰ বাৰ্তাৰ গোপনীয়তা ৰক্ষা হোৱাটো বিচাৰে। ৱটচএপ বাৰ্তাসমূহ End-to-end encryptionযুক্ত, অৰ্থাৎ কেৱল বাৰ্তা পঠাওঁতা আৰু গ্ৰহণ কৰোঁতাইহে তাক জানিব পাৰে, খোদ এপটোৰ নিৰ্মাতাসকলেও তাক গম পাব নোৱাৰে।
কিন্তু গোপনীয়তাৰ ওপৰত হস্তক্ষেপেৰে বিজেপি নেতৃত্বাধীন চৰকাৰে প্ৰস্তাৱ কৰা বিধিসমূহ কাৰ্য্যকৰী কৰিলে এপটোৰ সেই বিশেষত্বই নোহোৱা হ’ব।
ডেকা-ডেকেৰীৰ পৰা আৰম্ভ কৰি বয়সস্থ লোকলৈকে দৈনন্দিন যোগাযোগৰ সুচলতাৰ ক্ষেত্ৰত এপটোৱে অভূতপূৰ্ব সুবিধা আগবঢ়াইছে।
এপটোৱে ইমে’ইল আৰু পূৰ্বৰ ম’বাইল মে’ছেজৰ সংমিশ্ৰণেৰে ফট’, ভিদিঅ’ৰ বিনিময়ো সুচল কৰি তুলিছে।
