দেওবাৰে চমৰীয়া অঞ্চলৰ অন্তৰ্গত কঠালগুৰি চৰত বিবাদিত চৰ মাটিক লৈ দুটা প্ৰতিদ্বন্দ্বী গোটৰ মাজত হিংসাত্মক সংঘৰ্ষ সংঘটিত হয়। এই সংঘাটত কমেও ১৪ জন লোক গুৰুতৰভাৱে আহত হয়।
স্থানীয় সূত্ৰ অনুসৰি, বিবাদিত চৰ মাটি টুকুৰাৰ মালিকীস্বত্ব কাক লৈ বছৰ বছৰ ধৰি চলি থকা বিবাদৰ পৰাই এই কাজিয়া আৰম্ভ হৈছিল। গাঁৱৰ মানুহে দাবী কৰে যে ওচৰৰ চহৰৰ কিছুমান শক্তিশালী লোকে প্ৰকৃত বসতিস্থাপনকাৰী লোকক নোসোধাকৈয়ে চৰ মাটি বিক্ৰী কৰিছিল। এই লোকসকলে বছৰ ধৰি সকলো নিয়ন্ত্ৰণ কৰি স্থানীয় লোকৰ অধিকাৰক আওকাণ কৰি আহিছে।
জানিব পৰা মতে, আমিৰ চান আলী আৰু সাদেক আলীৰ গোটৰ মাজত এই সংঘৰ্ষ সংঘটিত হয়। দুয়োপক্ষই মাটিখিনিৰ মালিকীস্বত্ব দাবী কৰি আহিছে। দুয়োপক্ষৰ মাজত হোৱা হিংসাত্মক সংঘৰ্ষত আৰক্ষীয়ে হস্তক্ষেপ কৰাৰ পূৰ্বে বহুকেইজন আঘাতপ্ৰাপ্ত হয়।
ততাতৈয়াকৈ আহত গাঁওবাসীক চিকিৎসাৰ বাবে গৰৈমাৰী সামূহিক স্বাস্থ্য কেন্দ্ৰলৈ প্ৰেৰণ কৰা হয়। সংকটজনক অৱস্থাত থকা এজনক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ (GMCH) প্ৰেৰণ কৰা হয়।
নামনি অসমৰ চৰ ভূমিত চলি থকা এই ভূমি কেন্দ্ৰিক সংঘাট ৰোধ কৰিবলৈ চৰকাৰে ক্ষিপ্ৰতাৰে ব্যৱস্থা গ্ৰহণৰ আহ্বান জনাইছে অঞ্চলবাসীয়ে। লগতে অবৈধ ভূমি বিক্ৰীৰ সন্দৰ্ভতো উচিত তদন্তৰ দাবী কৰিছে। ইতিমধ্যে ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
ব্ৰহ্মপুত্ৰ নদীৰ মাজত সৃষ্টি হোৱা চৰ ভূমিসমূহ উপত্যকাটোৰ বাবে এক ডাঙৰ সমস্যা হৈ পৰিছে। এই ভূখণ্ডৰ মালিকীস্বত্ব সম্পৰ্কে থকা অস্পষ্ট নিয়মৰ ফলত প্ৰায়ে কাজিয়া, মানুহৰ ঘৰ হেৰুওৱাৰ লগতে সামাজিক অস্থিৰতাৰ সৃষ্টি কৰিছে।
