ক’ৰ’না ভাইৰাছৰ ভয়াৱহতাৰ প্ৰতি লক্ষ্য ৰাখি সমগ্ৰ দেশজুৰি ঘোষণা কৰা লকডাউনৰ ফলত ৰাজ্যৰ বৃহৎ-বৃহৎ চাহ বাগিচা সমূহৰ সমান্তৰালভাৱে বিপদৰ সন্মুখীন হৈছে ৰাজ্যৰ ক্ষুদ্ৰ চাহ বাগিচা সমূহ তথা ক্ষুদ্ৰ চাহ খেতিয়ক সকল।
লকডাউনৰ বাবে বাগিচাৰ পাত চিঙিব নোৱাৰি এতিয়া ৰাজ্যৰ অন্যান্য প্ৰান্তৰ লগতে নগাঁও জিলাৰ পুৰণিগুদামৰ নিকটৱৰ্ত্তী চাপানালাৰ ক্ষুদ্ৰ খেতিয়ক সকলো বিপদ তথা বৃহৎ লোকচানৰ সন্মুখীন হৈছে।
আনহাতে সমগ্ৰ ৰাজ্যজুৰি ক্ষুদ্ৰ চাহ খেতিয়ক সকলে সময়মতে পাত চিঙিব নোৱাৰা বাবে বহু কোটি টকাৰ লোকচানৰ সন্মুখীন হৈছে বুলি জানিবলৈ দিছে চাপানালাৰ ক্ষুদ্ৰ চাহ খেতিয়ক সকলে।
তদুপৰি লকডাউনৰ বাবে পাত চিঙিব নোৱাৰাত চাহ গছ সমূহ দুবাৰকৈ কলম দিব লগা হোৱাৰ লগতে পাত সমূহ সময়মতে চিঙিব নোৱাৰাত ব্যৱহাৰ অনুপযোগী হৈ পৰাৰ লগতে বৃহৎ লোকচানৰ সন্মুখীন হৈছে ক্ষুদ্ৰ চাহ খেতিয়ক সকল।
লোকচানৰ সন্মুখীন হোৱাত এতিয়া অৰ্থৰ অভাৱত এক হাহাকাৰপূৰ্ণ পৰিস্থিতিৰ সৃষ্টি হৈছে একাংশ ক্ষুদ্ৰ চাহ খেতিয়কৰ মাজত।
ইফালে ক্ষুদ্ৰ চাহ খেতিয়ক সকলক সকাহ প্ৰদান কৰিবৰ বাবে শীঘ্ৰে চৰকাৰে বিহিত ব্যৱস্থা গ্ৰহণৰ জৰিয়তে চাপানালাৰ দৰে গ্ৰাম্যাঞ্চলৰ ক্ষুদ্ৰ চাহ উদ্যোগটো পুনৰাই সজীৱ কৰি তুলিবলৈ ৰাজ্যৰ মুখ্য মন্ত্ৰী গৰাকীক সংবাদ মাধ্যমৰ যোগেদি আহ্বান জনাইছে সমূহ ক্ষুদ্ৰ চাহ খেতিয়কে।
