ঐতিহাসিক চৰাইদেউ মৈদাম বিশ্ব ঐতিহ্য ক্ষেত্ৰ হিচাপে স্বীকৃতি লাভ কৰাৰ পাছৰ পৰাই অধিক পৰ্যটকৰ আকৰ্ষণৰ কেন্দ্ৰ হৈ পৰিছে। ঠিক এবছৰ আগতে, ২০২৪ চনৰ ২৬ জুলাইত, চৰাইদেউ মৈদামে ইউনেস্ক’ৰ বিশ্ব ঐতিহ্য ক্ষেত্ৰৰ স্বীকৃতি লাভ কৰিছিল।
‘বিশ্ব ঐতিহ্য সপ্তাহ ২০২৫’ উপলক্ষে দেশৰ লগতে বিদেশৰ বহু পৰ্যটকে চৰাইদেউ পৰিদৰ্শন কৰিবলৈ উপস্থিত হৈছে। ৬০০ বছৰীয়া আহোম শাসনৰ ঐতিহাসিক স্মৃতিৰে পৰিপূৰ্ণ এই স্থানটোৱে নতুন স্বীকৃতিৰ পাছত আৰু অধিক পৰ্যটকক আকৰ্ষণ কৰিবলৈ সক্ষম হৈছে।
অসম চৰকাৰৰ খিলঞ্জীয়া আৰু জনজাতীয় বিশ্বাস আৰু সংস্কৃতি বিভাগৰ অন্তৰ্গত অসম প্ৰত্নতত্ত্ব সঞ্চালকালয় আৰু স্বৰ্গদেউসকলৰ স্মৃতি তৰ্পণ সমিতিয়ে ১৯ নৱেম্বৰৰ পৰা ২৫ নৱেম্বৰলৈ চৰাইদেউ মৈদামত ‘বিশ্ব ঐতিহ্য সপ্তাহ ২০২৫’ আয়োজন কৰিছে। সপ্তাহজুৰি বিভিন্ন সাংস্কৃতিক, শিক্ষামূলক আৰু ঐতিহ্য সংৰক্ষণমূলক অনুষ্ঠান অনুষ্ঠিত হ’ব।
বৃহস্পতিবাৰে উদ্বোধনী দিনটোত স্বচ্ছতা অভিযানৰ লগতে পৰ্যটকৰ বাবে বিশেষ ফটো প্ৰদৰ্শনীৰ উদ্বোধন কৰা হয়। আয়োজকসকলে জনাইছে যে সপ্তাহটোৰ প্ৰতিটো দিনেই পৃথক পৃথক কাৰ্যসূচীৰে সমৃদ্ধ হ‘ব, ইয়াৰ জৰিয়তে চৰাইদেউৰ ঐতিহ্য আৰু ইতিহাস জনসাধাৰণলৈ অধিক বিস্তৃতভাৱে দাঙি ধৰিব।
আহোম সাম্ৰাজ্যৰ গৌৰৱোজ্জ্বল অতীত আৰু স্থাপত্যৰ অনন্য নিদৰ্শন চৰাইদেউ মৈদামে আজিও পৰ্যটকক আকৰ্ষণ কৰিছে। বিশ্ব ঐতিহ্য সপ্তাহৰ বিশেষ অনুষ্ঠানৰ বাবেই এই দিনকেইটাত পৰ্যটকৰ সংখ্যা আৰু বৃদ্ধি পোৱা পৰিলক্ষিত হৈছে।
