মেট্ৰ’ৰ ভিতৰত এটা বিজ্ঞাপন। আৰু ইয়াক লৈয়ে চৰম বিতৰ্কৰ সৃষ্টি হৈছে। ইন্টাৰনেটত প্ৰতিক্ৰিয়াৰ জোৱাৰ। চেন্নাই মেট্ৰ’ৰ এটা ডবাত থকা সেই বিজ্ঞাপনৰ পোষ্টাৰখনো ছ’চিয়েল মিডিয়াত বিয়পি পৰিছে।
সেই বিজ্ঞাপনটোত কি লিখা আছে? ইয়াত লিখা আছে, ‘গাৰ্লফ্ৰেণ্ডে হয়তো ০% সুত দিয়ে, আৰু আমাৰ এফ ডিয়ে দিয়ে ১৪.৪%’।
এই বিজ্ঞাপনটো THECOS নামৰ এখন সমবায় ক্ৰেডিট ছ’চাইটিৰ ফিক্সড ডিপ’জিট আঁচনিৰ প্ৰচাৰৰ বাবে দিয়া হৈছিল। ৰাজহুৱা পৰিবহণৰ ভিতৰত এনে বিজ্ঞাপন প্ৰদৰ্শনৰ অনুমতি দিয়াৰ ক্ষেত্ৰতো থাংগাপাণ্ডিয়ানে চেন্নাই মেট্ৰ’ কৰ্তৃপক্ষৰ ওচৰত প্ৰশ্ন উত্থাপন কৰিছে।
সমবায় সমিতিখনে চেন্নাই মেট্ৰ’ ৰে’লৰ ভিতৰত বিজ্ঞাপনটো দিছে। ইতিমধ্যে ডি এম কেৰ সাংসদ থামিজাচি থাংগাপাণ্ডিয়ানে বিজ্ঞাপনটোৰ বাৰ্তাক ‘অতি আপত্তিজনক’ আৰু মহিলাৰ প্ৰতি অসন্মানজনক বুলি অভিহিত কৰিছে।
ছ’চিয়েল মিডিয়াত এটা পোষ্টত থাংগাপাণ্ডিয়ানে লিখিছে, ‘চেন্নাই মেট্ৰ’ ৰে’লৰ ভিতৰত এটা বিজ্ঞাপন প্ৰদৰ্শিত হৈছে যিয়ে নাৰীক হেয়জ্ঞান কৰি তেওঁলোকক উপভোগৰ বস্তু হিচাপে চিত্ৰিত কৰিছে—এয়া অতি চিন্তনীয়। ৰাজহুৱা স্থানত প্ৰদৰ্শিত বিজ্ঞাপনত যাতে মহিলাৰ মৰ্যাদাৰ প্ৰতি লক্ষ্য ৰখাটো বিবেচনা কৰা হয়, সেইটো নিশ্চিত কৰাটো জৰুৰী।’
তেওঁ পোষ্টটোত লিখিছে যে চেন্নাই মেট্ৰ’ ৰে’ল কৰ্তৃপক্ষই বিজ্ঞাপনটো আঁতৰোৱাৰ কথা চিন্তা কৰিব লাগে। থামিজাচি থাংগাপাণ্ডিয়ানেও লিখিছে যে প্ৰতিদিনে লাখ লাখ লোকে চেন্নাই মেট্ৰ’ ব্যৱহাৰ কৰে। তেওঁ কয় যে এনে বাৰ্তা কঢ়িয়াই অনা বিজ্ঞাপনে জনমানসত প্ৰভাৱ পেলাব পাৰে।
