আই পি এলৰ দুই প্ৰবল প্ৰতাপী দলৰ যুঁজত অসহায়ভাৱে আত্মসমৰ্পণ কৰিলে মুম্বাই ইণ্ডিয়ানছে। চেন্নাই ছুপাৰ কিংছৰ বিৰুদ্ধে হাৰ্দিক পাণ্ডিয়াৰ দলটো ১০৩ ৰানত পৰাস্ত হয়। ইয়াৰ পিছতে হাৰ্দিকৰ অধিনায়কত্ব আৰু মুম্বাইৰ বেটিংক লৈ পুনৰ প্ৰশ্ন উত্থাপন হৈছে।
মেচখনত প্ৰথমে বেটিং কৰিবলৈ নমা চেন্নাই ছুপাৰ কিংছে ২০ অভাৰত ৬টা উইকেট হেৰুৱাই ২০৭ ৰান সংগ্ৰহ কৰে। অ’পেনাৰ সঞ্জু চেমছনে ৫৪টা বলত অনবদ্য শতক অৰ্জন কৰে। এইটোৱেই আছিল জয়ৰ দিশত প্ৰথম সংকেত। তেওঁৰ বাহিৰে কোনেও ডাঙৰ ৰান কৰা নাছিল।
ঋতুৰাজে ১৪টা বলত ২২ ৰান সংগ্ৰহ কৰাৰ পিছত দেৱাল্ড ব্ৰেভিছে ১১টা বলত ২১ ৰান সংগ্ৰহ কৰে। চেন্নাইৰ ডাঙৰ ৰানৰ আঁৰত সঞ্জু চেমছনৰ ইনিংছ যিমান গুৰুত্বপূৰ্ণ আছিল তাতকৈ বেছি হতাশাজনক আছিল মুম্বাইৰ বলাৰৰ ব্যৰ্থতা।
এই মেচখনতো যশস্প্ৰীত বুমৰাহে ৩১ ৰান দি মাত্ৰ এটা উইকেটহে লাভ কৰে। শেষৰখন খেলৰ নায়ক অশ্বনী কুমাৰে এই খেলখনত ২টা উইকেট দখল কৰে। আল্লাহ গাজানফৰে ২টা উইকেট দখল কৰে। তেওঁ মাত্ৰ ২৫ ৰানহে দিয়ে। হাৰ্দিকে হতাশ কৰিলে।
২০৮ ৰানৰ লক্ষ্য অনুসৰণ কৰি ৰোহিতৰ ঠাইত অ’পেন কৰিবলৈ ওলাই অহা দানিছ মালেৱাৰে শুন্য ৰানতে ওভতে। আকিল হোছেইনৰ বলত সঞ্জুৱে কেচ লৈ পেভিলিয়নলৈ উভতাই পঠিয়ায়। কুইণ্টন ডি ককে ছয়ৰে আৰম্ভণি কৰিছিল যদিও ১০ বলত মাত্ৰ ৭ ৰান সংগ্ৰহ কৰিয়েই আউট হয়। তিনি নম্বৰত নমা নমন ধীৰো ফ্লপ হয়। আৰু ইয়াৰ ফলত মুম্বাই ইণ্ডিয়ানছৰ কঁকাল ভাঙি পৰে।
সূৰ্যকুমাৰ যাদৱ (৩৬) আৰু তিলক ভাৰ্মাই (৩৭) একমাত্ৰ কিছু যুঁজ দি ৰান সংগ্ৰহ কৰে। তেওঁলোকৰ বাহিৰে আন কোনোৱে দুটা অংক লাভ কৰিব নোৱাৰিলে।
মুম্বাই ইণ্ডিয়ানছক বিধ্বস্ত কৰাৰ আঁৰত আছিল আকিল হোছেইন। তেওঁ অকলে চাৰিটা উইকেট দখল কৰে। কেৱল চাৰিটা উইকেট লোৱাই নহয়, ৪ অভাৰত ১৭ ৰান দিয়াৰ লগতে এটা অভাৰ মেডেন দিয়ে । তেওঁৰ আধিপত্যৰে মুম্বাই দিশহাৰা হৈ পৰে। আকিলক বাদ দি নুৰ আহমেদে দুটা উইকেট দখল কৰে। মুকেশ চৌধুৰী, অংশুল কামোজ, জেমী অভাৰটন আৰু গুৰজাপনীত সিঙে এটাকৈ উইকেট দখল কৰে। মুম্বাই ইণ্ডিয়ানছে ১৯ অভাৰত ১০৪ ৰান সংগ্ৰহ কৰি অল আউট হয়।
এই মেচখনৰ অন্তত মুম্বাই ইণ্ডিয়ানছ অষ্টম স্থানলৈ নামি আহে। ৭খন মেচ খেলি দুখনত জয়ী হৈ ৪ পইণ্টত থাকে। আনহাতে, বেয়া আৰম্ভণিৰ পৰা উধাই চেন্নাই ছুপাৰ কিংছ পঞ্চম স্থানলৈ উন্নত হয়। তেওঁলোকে সাতখন মেচৰ তিনিখনত জয়লাভ কৰে।
