ছত্তীশগড়ৰ শক্তি জিলাত অৱস্থিত বেদান্তৰ তাপ বিদ্যুৎ প্ৰকল্পত সংঘটিত এক ভয়ংকৰ বিস্ফোৰণত নিহতৰ সংখ্যা ১৪ জনলৈ বৃদ্ধি পাইছে।
মঙলবাৰে আবেলি সিংতৰাই গাঁৱত থকা এই প্ৰকল্পটোত বয়লাৰৰ পৰা টাৰ্বাইনলৈ উচ্চ চাপৰ বাষ্প কঢ়িয়াই নিয়া এডাল তীখাৰ পাইপ ফাটি যোৱাৰ ফলতেই এই শোকাৱহ দুৰ্ঘটনাটো সংঘটিত হয়। ইয়াৰ পিছতে ৰাজ্যখনৰ মুখ্যমন্ত্ৰী বিষ্ণু দেও ছায়ে ঘটনাৰ দণ্ডাধীশ পৰ্যায়ৰ তদন্তৰ নিৰ্দেশ দিয়াৰ লগতে বিৰোধী দল কংগ্ৰেছে প্ৰকল্পটোৰ কৰ্তৃপক্ষৰ বিৰুদ্ধে ন্যায়িক তদন্তৰ দাবী উত্থাপন কৰিছে।
আৰক্ষী অধীক্ষক প্ৰফুল্ল ঠাকুৰে জানিবলৈ দিয়া মতে, বিস্ফোৰণৰ লগে লগে ঘটনাস্থলীতে চাৰিজন শ্ৰমিকৰ মৃত্যু হৈছিল আৰু পিছত চিকিৎসালয়ত দহজন শ্ৰমিকে আঘাতৰ ফলত প্ৰাণ হেৰুৱায়। বৰ্তমানো ২০ জন শ্ৰমিক গুৰুতৰভাৱে দগ্ধ হৈ চিকিৎসাধীন হৈ আছে। ইয়াৰে পাঁচজনক উন্নত চিকিৎসাৰ বাবে ৰায়পুৰলৈ প্ৰেৰণ কৰা হৈছে আৰু বাকী ১৫ জন ৰায়গড় জিলাৰ চিকিৎসালয়ত ভৰ্তি হৈ আছে।
এই মৰ্মান্তিক দুৰ্ঘটনাৰ পাছতে ৰাজ্যখনৰ মুখ্যমন্ত্ৰী বিষ্ণু দেও ছায়ে নিহতসকলৰ পৰিয়াললৈ পাঁচ লাখ টকা আৰু আহতসকলৰ বাবে পঞ্চাশ হাজাৰ টকাকৈ এককালীন আৰ্থিক সাহায্য ঘোষণা কৰিছে। মুখ্যমন্ত্ৰীগৰাকীয়ে বিলাসপুৰ সংমণ্ডলৰ আয়ুক্তক সমগ্ৰ ঘটনাটোৰ এক উচিত তদন্ত কৰিবলৈ নিৰ্দেশ দিছে আৰু দোষী সাব্যস্ত হোৱা লোকৰ বিৰুদ্ধে কঠোৰ ব্যৱস্থা গ্ৰহণৰ আশ্বাস প্ৰদান কৰিছে। ইয়াৰ উপৰিও জিলা প্ৰশাসনেও এক দণ্ডাধীশ পৰ্যায়ৰ তদন্তৰ নিৰ্দেশ দিছে। শক্তি জিলাৰ উপায়ুক্ত অমৃত বিকাশ টপ্নোৱে ডভ্ৰাৰ মহকুমাধিপতিক এই ঘটনাৰ কাৰিকৰী আৰু মানৱীয় ত্ৰুটিৰ লগতে সুৰক্ষা ব্যৱস্থাৰ দিশবোৰ পৰীক্ষা কৰি ৩০ দিনৰ ভিতৰত প্ৰতিবেদন দাখিল কৰিবলৈ দায়িত্ব অৰ্পণ কৰিছে। বেদান্ত কৰ্তৃপক্ষয়ো নিজাববীয়াকৈ এক আভ্যন্তৰীণ তদন্ত আৰম্ভ কৰিছে।
আনহাতে, প্ৰধান বিৰোধী দল কংগ্ৰেছে এই সমগ্ৰ ঘটনাক চৰকাৰ আৰু প্ৰকল্প কৰ্তৃপক্ষৰ চূড়ান্ত গাফিলতি বুলি অভিহিত কৰিছে। কংগ্ৰেছে প্ৰকল্পৰ পৰিচালনা সমিতিৰ বিৰুদ্ধে এজাহাৰ দাখিল কৰাৰ লগতে এক উচ্চ পৰ্যায়ৰ ন্যায়িক তদন্তৰ দাবী জনাইছে। ইয়াৰ লগতে তেওঁলোকে ভুক্তভোগী পৰিয়ালসমূহক বৰ্তমান ঘোষণাতকৈ অধিক ক্ষতিপূৰণ দিয়াৰো আহ্বান জনাইছে। উল্লেখযোগ্য যে সিংতৰাইৰ এই ১২০০ মেগাৱাট শক্তিসম্পন্ন কয়লাভিত্তিক তাপবিদ্যুৎ প্ৰকল্পটো ২০০৯ চনত এথেনা ছত্তীশগড় পাৱাৰ লিমিটেডৰ অধীনত আৰম্ভ কৰা হৈছিল। ২০১৬ চনৰ পৰা ২০২২ চনলৈ কাম বন্ধ হৈ থকাৰ পিছত বেদান্তই এই প্ৰকল্পটো অধিগ্ৰহণ কৰে আৰু যোৱা বৰ্ষৰ আগষ্টত ইয়াৰ ৬০০ মেগাৱাটৰ এটা গোট মুকলি কৰা হৈছিল।
