পঞ্জাৱৰ মুখ্যমন্ত্রী ভগৱন্ত মানৰ বিৰুদ্ধে শেহতীয়াকৈ এক চাঞ্চল্য্যকৰ অভিযোগ উত্থাপন হৈছে যাৰ ফলত ৰাজ্যখনৰ ৰাজনৈতিক মহলত তীব্র উত্তেজনাৰ সৃষ্টি হৈছে। বিৰোধী দলৰ বিধায়কসকলে অভিযোগ কৰিছে যে মুখ্যমন্ত্রীয়ে মদ্যপান কৰি পঞ্জাৱ বিধানসভাৰ বিশেষ অধিবেশনত অংশগ্ৰহণ কৰিছে। এই গোটেই ঘটনাক কেন্দ্ৰ কৰি বিধানসভাৰ ভিতৰত এক উত্তপ্ত পৰিস্থিতিৰ উদ্ভৱ হয় যদিও মুখ্যমন্ত্রীয়ে সকলোকে শান্ত থাকিবলৈ অনুৰোধ জনায়। তেওঁ বিৰোধী বিধায়কসকলক অহেতুক তৰ্কাতৰ্কি এৰি বিধানসভাৰ মর্যদা আৰু শৃংখলা বজাই ৰাখিবলৈ আহ্বান জনাইছে।
পঞ্জাৱৰ এজন কংগ্ৰেছ বিধায়কে প্রথমতে এই অভিযোগ উত্থাপন কৰাৰ পিছতেই সদনত বিতৰ্কৰ সূত্রপাত হয়। বিৰোধী দলপতি প্রতাপ সিং বাজৱাই এই বিষয়টোক আৰু অধিক গুৰুত্ব দি দাবি কৰে যে বিধানসভাৰ প্ৰতিগৰাকী বিধায়কৰে এলকোহল মিটাৰৰ জৰিয়তে পৰীক্ষা কৰা উচিত। তেওঁ যুক্তি দিছে যে যিহেতু ৰাজ্যৰ মূৰব্বী তথা মুখ্যমন্ত্রীৰ বিৰুদ্ধেই এনে গুৰুতৰ অভিযোগ উঠিছে, সেয়েহে সত্যটো জানিবৰ বাবে সকলোৰে স্বাস্থ্য পৰীক্ষা কৰাটো প্রয়োজনীয় হৈ পৰিছে।
কেৱল কংগ্ৰেছেই নহয়, শিৰোমণি আকালি দলেও মুখ্যমন্ত্রীৰ বিৰুদ্ধে তীব্র আক্রমণাত্মক স্থিতি গ্ৰহণ কৰিছে। দলটোৱে বিধানসভাৰ ভিতৰৰ এক ভিডিঅ’ মুকলি কৰি মুখ্যমন্ত্রীৰ বিৰুদ্ধে গুৰুতৰ অভিযোগ উত্থাপন কৰিছে। শ্রমিক দিৱসৰ দিনা ভগৱন্ত মানে এনে আচৰণ কৰাটো অত্যন্ত লজ্জাজনক বুলি তেওঁলোকে অভিহিত কৰিছে। বিৰোধী বিধায়কসকলে ৰাইজক মুখ্যমন্ত্রীৰ আচৰণ লক্ষ্য কৰিবলৈ অনুৰোধ জনোৱাৰ লগতে তেওঁৰ এনে কার্যকলাপক তীব্র ভাষাৰে গৰিহণা দিছে।
ইমানতে ক্ষান্ত নাথাকি আকালি দলে মুখ্যমন্ত্রীক এক প্ৰত্যাহ্বান জনাইছে। তেওঁলোকে দাবি কৰিছে যে জনসাধাৰণৰ আগত নিজৰ স্বচ্ছতা প্রমাণ কৰিবলৈ ভগৱন্ত মানে অতি শীঘ্ৰে ‘ডোপ টেষ্ট’ বা মাদক দ্রব্যৰ পৰীক্ষা কৰাব লাগে। তেওঁলোকৰ মতে ইয়াৰ দ্বাৰাহে প্রকৃত সত্যটো সকলোৰে সন্মুখলৈ আহিব।
বিৰোধীৰ এই সকলোবোৰ হুলস্থূল আৰু অভিযোগৰ মাজতে মুখ্যমন্ত্রী ভগৱন্ত মানে নিজৰ পক্ষ সমৰ্থন কৰি কয় যে বিধানসভাৰ সেই বিশেষ অধিবেশনখন শ্রমিক দিৱসৰ সন্মানত আয়োজন কৰা হৈছিল। সেইবাবে তেওঁ বিৰোধীৰ অভিযোগক বিশেষ গুৰুত্ব নিদি সকলো সদস্যকে সদনৰ পবিত্ৰতা ৰক্ষা কৰিবলৈ আৰু গঠনমূলক কামত মনোনিৱেশ কৰিবলৈ আহ্বান জনায়। তেওঁৰ মতে এনে বিতৰ্কই বিধানসভাৰ মর্যদাহানি কৰে।
