আজি শিৱসাগৰত অনুষ্ঠিত যোগ উৎসৱত অংশ গ্ৰহণ কৰি ঐতিহাসিক ৰংঘৰ বাকৰিত শিৱসাগৰ সমষ্টিৰ বিধায়ক অখিল গগৈক কাষত ৰাখি বহু কেইটা নতুন প্ৰকল্পৰ কথা ঘোষণা কৰে মুখ্যমন্ত্ৰী হিমন্ত বিশ্ব শৰ্মাই।
শিৱসাগৰৰ উন্নয়নৰ বাবে তিনিটা বৃহৎ প্ৰকল্প ঘোষণা কৰে মুখ্যমন্ত্ৰী শৰ্মাই।
ৰংঘৰৰ বাকৰিত এক সংবাদ মেলত মুখ্যমন্ত্ৰী হিমন্ত বিশ্ব শৰ্মাই টাই যাদুঘৰক বিশ্ব মানৰ মিউজিয়াম হিচাপে গঢ়ি তোলা হ’ব বুলি আশ্বাস দিয়ে।
ৰংঘৰৰ সৌন্দৰ্যবৰ্দ্ধনৰ বাবে প্ৰকল্প ঘোষণা কৰে মুখ্যমন্ত্ৰী গৰাকীয়ে। সংবাদ মেলত তেওঁ ৰংঘৰত বিশ্বমানৰ অডিটৰিয়ামৰ লগতে লাইট এণ্ড চাউণ্ডৰ ব্যৱস্থা কৰা হ’ব বুলি ঘোষণা কৰে।
লগতে শিৱসাগৰবাসীৰ খোৱাপানীৰ সমস্যা দূৰ কৰাৰো প্ৰতিশ্ৰুতি প্ৰদান কৰে মুখ্যমন্ত্ৰী হিমন্ত বিশ্ব শৰ্মাই।
শিৱসাগৰক বিশ্ব ঐতিহ্য ক্ষেত্ৰত অন্তভুক্ত কৰিবলৈ গৱেষণাৰ বাবে এটা গঠন কৰা হৈছে বুলিও উল্লেখ কৰে মুখ্যমন্ত্ৰী গৰাকীয়ে।
শিৱসাগৰৰ উন্নয়নৰ বাবে মুখ্যমন্ত্ৰীয়ে ঘোষণা কৰা বিভিন্ন প্ৰকল্পক লৈ সন্তুষ্টি প্ৰকাশ কৰে শিৱসাগৰ সমষ্টিৰ বিধায়ক অখিল গগৈয়ে।
মুখ্যমন্ত্ৰীৰ আজিৰ এই ভ্ৰমণক শিৱসাগৰবাসীৰ বাবে অত্যন্ত গুৰুত্বপূৰ্ণ বুলি মন্তব্য কৰে বিধায়ক গগৈয়ে।
শিৱসাগৰৰ ঐতিহ্যক সন্মান কৰাৰ বাবে, শিৱসাগৰৰ ঐতিহাসিক সম্পাদ সমুহক সংৰক্ষণ কৰা আৰু শিৱসাগৰৰ পৰ্যটন ক্ষেত্ৰৰ উন্নয়নৰ বাবে আঁচনি গ্ৰহণ কৰাৰ বাবে মুখ্যমন্ত্ৰী ডঃ হিমন্ত বিশ্ব শৰ্মাক ধন্যবাদ জনায় অখিল গগৈয়ে।