বানপানীৰ সময়ছোৱাত বিদ্যুৎস্পৃষ্ট হৈ কোনো লোকে যাতে মৃত্যুমুখত পৰিবলগীয়া নহয়, তাৰ বাবে শক্তি বিভাগক আগতীয়া সকলোধৰণৰ পদক্ষেপ গ্ৰহণ কৰিবলৈ মুখ্যমন্ত্ৰী সৰ্বানন্দ সোণোৱালে আজি নিৰ্দেশ দিয়ে।
বিপদসংকুল ট্ৰেন্সফৰ্মাৰ, বৈদ্যুতিক খুটা, তাঁৰ ইত্যাদিৰ উপযুক্ত নিৰীক্ষণ কৰি শীঘ্ৰে যথোচিত পদক্ষেপ গ্ৰহণ কৰাৰ বাবেও মুখ্যমন্ত্ৰীয়ে নিৰ্দেশ দিয়ে।
আজি মহানগৰীৰ পল্টনবজাৰস্থিত বিজুলী ভৱনত ৰাজ্যখনৰ সাম্প্ৰতিক বানপানী আৰু ধুমুহাৰ পৰিপ্ৰেক্ষিতত শক্তি বিভাগৰ কাম-কাজ পৰ্যালোচনা কৰাৰ উদ্দেশ্যৰে এপিডিচিএল, এইজিচিএল আৰু এপিজিচিএলৰ শীৰ্ষ বিষয়াসকলৰ সৈতে হোৱা এক বৈঠকত মুখ্যমন্ত্ৰী সৰ্বানন্দ সোণোৱালে এই নিৰ্দেশ দিয়ে।
মুখ্যমন্ত্ৰীয়ে এতিয়াও যিবোৰ গাঁও বিদ্যুৎ সংযোগৰ পৰা বঞ্চিত হৈ আছে, সেই গাঁওসমূহৰ জনসাধাৰণে যাতে এপিডিচিএলক অৱগত কৰিব পাৰে তাৰ বাবে অতিশীঘ্ৰে ৰাজহুৱা জাননী প্ৰকাশ কৰাৰ বাবেও নিৰ্দেশ দিয়ে।
বৈঠকত শক্তি বিভাগৰ তৰফৰ পৰা মুখ্যমন্ত্ৰীক অৱগত কৰে যে বৰ্তমানলৈকে ৪৭ হাজাৰ বাঁহৰ খুটা আঁতৰ কৰি তাৰ ঠাইত পকী খুটা দি বিদ্যুৎ সংযোগ প্ৰদান কৰা হৈছে।
বিভাগে মুখ্যমন্ত্ৰীক লগতে অৱগত কৰে যে জনসাধাৰণে যাতে নিজৰ অভিযোগসমূহ অৱগত কৰিব পাৰে তাৰ বাবে কল চেণ্টাৰত অভিযোগ, ‘মাই বিজুলী এপ’, কাষ্টমাৰ কেয়াৰ, ই মেইল, হোৱাটছ্ এপ ইত্যাদি সন্নিৱিষ্টকৰণেৰে গ্ৰাহক সম্পৰ্কৰক্ষী বিভাগ এটা মুকলি কৰিছে।
মুখ্যমন্ত্ৰীয়ে ৰাজ্যত নতুনকৈ স্থাপন কৰিবলগীয়া উদ্যোগে যাতে প্ৰয়োজনীয় বিদ্যুৎ লাভ কৰাটো সুনিশ্চিত কৰিব পৰা যায় তাৰ বাবে উদ্যোগ বিভাগৰ লগত আলোচনাত মিলিত হ’বলৈ এপিডিচিএলৰ শীৰ্ষ বিষয়াসকলক নিৰ্দেশ দিয়ে।
মুখ্যমন্ত্ৰীয়ে কয় যে ৰাজ্যখনত শীতল ভঁৰাল স্থাপনৰ জৰিয়তে কৃষিখণ্ডৰ উন্নয়ন সাধন আৰু কৃষিজাত সামগ্ৰীৰ প্ৰকৃত মূল্য লাভ কৰাৰ ক্ষেত্ৰত সুনিশ্চিত কৰাৰ বাবে ৰাজ্য চৰকাৰে অগ্ৰাধিকাৰ দিছে।
সেইবাবে শীতল ভঁৰাললৈ অবিৰত বিদ্যুৎ যোগান সুনিশ্চিত কৰিবলৈ পদক্ষেপ ল’বলৈও এপিডিচিএলক মুখ্যমন্ত্ৰীয়ে নিৰ্দেশ দিয়ে। মুখ্যমন্ত্ৰীয়ে লগতে বানপানী তথা ধুমুহাৰ লেখীয়া প্ৰাকৃতিক দুৰ্যোগৰ সময়ত যদিহে কোনো অঞ্চলৰ বিদ্যুৎ যোগান ব্যাহত কৰিবলগীয়া পৰিস্থিতি সংশ্লিষ্ট অঞ্চলৰ জনসাধাৰণক যথাসম্ভৱ আগতে জাননী দিয়াৰ পদক্ষেপ লোৱাৰ উপৰি বিদ্যুৎ মাচুল যাতে উপভোক্তাসকলে নিয়মীয়াকৈ পৰিশোধ কৰে সেই সন্দৰ্ভত জনসচেতনতা সৃষ্টিৰ পদক্ষেপ ল’বলৈও এপিডিচিএলক নিৰ্দেশ দিয়ে।
জনসাধাৰণক অবিৰত বিদ্যুৎ যোগানৰ দিশত যাতে এপিডিচিএলে সম্পূৰ্ণ পেছাদাৰী মানসিকতাৰে কৰ্মত অৱতীৰ্ণ হয় সেই সন্দৰ্ভত উপযুক্ত পদক্ষেপ ল’বলৈও এপিডিচিএল কৰ্তৃপক্ষক মুখ্যমন্ত্ৰীয়ে নিৰ্দেশ দিয়ে।
মুখ্যমন্ত্ৰীয়ে উপ-সংমণ্ডল পৰ্যায়ত নিৰীক্ষণ আৰু তদাৰকী সমিতিৰ বৈঠক নিয়মিতভাৱে অনুষ্ঠিত কৰা আৰু এই ক্ষেত্ৰত স্থানীয় বিধায়কসকলক লগত লৈ যথোপযুক্ত পদক্ষেপ গ্ৰহণ কৰাৰ বাবেও নিৰ্দেশ দিয়ে। ক’ভিড-১৯ ৰ সময়ছোৱাত শক্তি বিভাগে আগবঢ়োৱা সেৱাৰ বাবে মুখ্যমন্ত্ৰীয়ে বিভাগটোক ধন্যবাদ জ্ঞাপন কৰে।
ইয়াৰ পিছতে বিজুলী ভৱন চৌহদত উপস্থিত থকা সংবাদিকসকলৰ সৈতে হোৱা কথা-বতৰাত মুখ্যমন্ত্ৰীয়ে কয় যে বৰ্তমান ৰাজ্যখনৰ কেইবাখনো জিলা বানপানীৰ কৱলত পৰাৰ উপৰি ‘আম্ফান’ ঘূৰ্ণী বতাহৰ প্ৰভাৱত নামনি অসমৰ কেইবাখনো জিলা বেয়াকৈ ক্ষতিগ্ৰস্ত হৈছে।
তদুপৰি এই দুৰ্যোগৰ ফলত বিদ্যুৎ যোগান ব্যৱস্থাৰো যথেষ্ট ক্ষতি হৈছে। বৰ্তমান ৰাজ্য চৰকাৰে উপৰ্যুপৰি কেইবাটাও সমস্যাৰ বিৰুদ্ধে যুঁজ দিবলগীয়া হৈছে। এই মূহূৰ্তত বানপানী, ধুমুহা, ক’ভিড-১৯ আৰু চোৱাইন ফ্লুৰ বিৰুদ্ধে শক্তিশালীভাৱে যুঁজ দিয়াৰ বাবে মনোবল অটুট ৰাখিব লাগিব বুলি উল্লেখ কৰি মুখ্যমন্ত্ৰীয়ে কয় যে ৰাজ্য চৰকাৰে ইতিমধ্যে এই ক্ষেত্ৰত জনসাধাৰণৰ সহযোগত ব্যৱস্থা গ্ৰহণ কৰিছে।
আজিৰ এই বৈঠকত মুখ্যমন্ত্ৰীৰ মিডিয়া উপদেষ্টা হৃষীকেশ গোস্বামী, বিধায়ক ডাঃ নোমল মোমিন, এপিডিচিএল, এপজিচিএল, এইজিচিএলৰ অধ্যক্ষ বিনোদ কুমাৰ পিপাৰচেনীয়া, বিদ্যুৎ বিভাগৰ আটাইকেইটা কোম্পানীৰ পৰিচালন সঞ্চালক প্ৰমুখ্যে শীৰ্ষ বিষয়াসকল উপস্থিত থাকে।