ধুবুৰী জিলাৰ ক্ৰীড়া ক্ষেত্ৰত এক নতুন সংযোজনেৰে মুখ্য মন্ত্ৰী সৰ্বানন্দ সোণোৱালে আজি চাপৰ চাহ বাগিচাত বীৰচা মুণ্ডা ষ্টেডিয়াম আৰু বীৰচা মুণ্ডাৰ এতি প্ৰতিমূৰ্তি শুভ উদ্বোধন কৰে।
অইল ইণ্ডিয়া লিমিটেডৰ সামাজিক দায়বদ্ধতা কাৰ্য্যসূচীৰ অংশ হিচাপে ৯৭.৭২ লাখ টকা ব্যয় সাপেক্ষে এই ষ্টেডিয়ামখন নিৰ্মাণ কৰা হৈছে।
এই উপলক্ষে অনুষ্ঠিত অনুষ্ঠানত ভাষণ প্ৰদান কৰি মুখ্য মন্ত্ৰীয়ে কয় যে আদিবাসী তথা চাহ জনগোষ্ঠীৰ লোকসকলে বৃহত্তৰ অসমীয়া জাতিৰ এক অবিচ্ছেদ্য অংগ। অসমীয়া জাতিৰ বিকাশ সাধনত এই জনগোষ্ঠীৰ অৱদান অনস্বীকাৰ্য্য।
চাহ জনগোষ্ঠীৰ লোকসকলৰ উন্নয়নৰ বাবে বৰ্তমানৰ ৰাজ্য চৰকাৰে আৰম্ভণিৰে পৰা বহুতো পদক্ষেপ গ্ৰহণ কৰি আহিছে। চাহ জনগোষ্ঠীৰ ক্ৰীড়া প্ৰতিভাসমূহক বিকশাই তোলাৰ বাবে মুখ্য মন্ত্ৰীয়ে আন্তঃ চাহ বাগিচা ফুটবল প্ৰতিযোগিতাকে ধৰি বিভিন্ন ক্ৰীড়া প্ৰতিযোগিতাসমূহ আয়োজন কৰি অহা হৈছে বুলি কয়।
সোণোৱালে সমগ্ৰ গ্ৰাম্য উন্নয়ন যোজনাৰ অধীনত ৰাজ্যখনৰ ৫০০ খন খেলপথাৰৰ উন্নয়ন সাধন কৰাৰ লগতে চেপন চাহ বাগিচাত মাংৰি ওৰাং আৰ্চাৰী একাডেমী প্ৰতিষ্ঠাকে ধৰি উল্লেখনীয় পদক্ষেপসমূহ গ্ৰহণ কৰা হৈছে বুলি কয়।
