কাজিৰঙা ৰাষ্ট্ৰীয় উদ্যানৰ বান পৰিস্থিতি বুজ ল’বৰ বাবে বৃহস্পতিবাৰৰ দিনা কাজিৰঙালৈ আহে মুখ্য মন্ত্রী সর্বানন্দ সোণোৱাল ৷
কাজিৰঙাৰ বিভিন্ন অঞ্চল পৰিদৰ্শন কৰি উদ্যানখনত বানপানীয়ে সৃষ্টি কৰা ক্ষয়-ক্ষতিৰ লগতে বন্যপ্ৰাণীৰ সমস্যাৰো বুজ লয়।
বৃহস্পতি বাৰৰ পুৱাৰ ভাগতে মুখ্য মন্ত্ৰীয়ে কহঁৰাৰ ৰাইজিং চান ইংলিছ স্কুলত স্থাপন কৰা এটা আশ্রয় শিৱিৰ পৰিদর্শন কৰি তাত আশ্রয় গ্রহণ কৰি থকা ৫১ টা বন্যাৰ্ত পৰিয়ালৰ সদস্যৰে মত বিনিময় কৰি তেওঁলোকৰ অৱস্থা আৰু সমস্যাৰ বুজ লয় ৷
পৰৱৰ্তী সময়ত মুখ্য মন্ত্ৰী গৰাকীয়ে কাজিৰঙাৰ বন্যপ্রাণী পুনৰ সংস্থাপন আৰু সংৰক্ষণ কেন্দ্র পৰিদর্শন কৰে।
ৰাষ্ট্ৰীয় উদ্যানখনৰ বিভিন্ন অঞ্চলৰ পৰা বানপানীৰ সময়ত উদ্ধাৰ কৰি অনা বন্যপ্ৰাণীসমুহৰ উপযুক্ত প্ৰতিপালন কৰাৰ বাবে কেন্দ্ৰটোৰ বিষয়ববীয়াসকলক তেওঁ নির্দেশ দিয়ে।
বন্যপ্ৰাণীৰ বাবে অতি গুৰুত্বপূৰ্ণ বুলি বিবেচিত এই কেন্দ্ৰটোত থকা বিভিন্ন ব্যৱস্থাৱলীৰ বুজ লোৱাৰ উপৰিও কেন্দ্ৰটোত প্ৰতিপালিত মাতৃহাৰা এটা গঁড়ৰ পোৱালিক মুখ্য মন্ত্রীয়ে নিজ হাতেৰে দুগ্ধ পানো কৰায় ৷
ইয়াৰ পিছতে মুখ্য মন্ত্ৰীয়ে কাজিৰঙা ৰাষ্ট্ৰীয় উদ্যানৰ বাগৰিত বনাঞ্চলত যন্ত্ৰচালিত নাৱেৰে মৰা ডিফলু নদীৰে কাজিৰঙা ৰাষ্ট্ৰীয় উদ্যানৰ প্লাৱিত এলেকা পৰিদর্শন কৰে।
বানপানীৰ সময়ত বন্যপ্ৰাণীয়ে আশ্রয়ৰ লোৱাৰ বাবে নির্মাণ কৰা হাই লেণ্ডবোৰো পৰিদৰ্শন কৰি তাত আশ্রয় লোৱা বন্যপ্ৰাণীসমুহৰ পৰিদৰ্শন কৰাৰ লগতে ডিফলু নদীৰ দুয়য়োকাষে বানপানীৰ গৰাহত পৰা মৰা ডিফলু, মুৰফুলনি আৰু গৰাকাটি বন শিৱিৰৰ সমীপত উপস্থিত হৈ তেওঁ যন্ত্ৰচালিত নাৱঁৰ পৰাই শিৱিৰ কেইটাৰ বনকৰ্মীসকলৰ সৈতে মত-বিনিময়ো কৰে ৷
কাজিৰঙা পৰিদৰ্শনৰ সময়ত মুখ্য মন্ত্রী সৰ্বানন্দ সোণোৱালৰ লগতে জলসম্পদ মন্ত্রী কেশৱ মহন্ত, কৃষি মন্ত্রী অতুল বৰা, সাংসদ কামাখ্যা প্রসাদ তাচাৰ লগতে কাজিৰঙাৰ সঞ্চালক আৰু বন বিভাগৰ শীর্ষ বিষয়াসকল উপস্থিত থাকে ৷
মুখ্য মন্ত্ৰীয়ে নদীৰ বুকুতেই সাংবাদিকসকলৰ সৈতেও মত-বিনিময় কৰে।
বানপানীৰ সময়ত উদ্যানখনৰ বন্যপ্ৰাণী সমূহৰ সুৰক্ষা সুনিশ্চিত কৰাত আগবঢ়োৱা সহযোগিতাৰ বাবে মুখ্য মন্ত্রীয়ে কাজিৰঙাৰ চৌপাশৰ জনসাধাৰণক ধন্যবাদ জ্ঞাপন কৰে।
মুখ্য মন্ত্রী সৰ্বানন্দ সোণোৱালে শেহতীয়া বানত মৃত্যু হোৱা বোকাখাত মহকুমাৰ দুগৰাকী ব্যক্তি ক্রমে বাবু খেড়ীয়া আৰু সর্বেশ্বৰ দলেৰ পৰিয়ালৰ হাতত ৰাজ্য চৰকাৰে প্রদান কৰা ৪ লাখ টকাৰ এককালীন সাহায্যৰ চেকো প্রদান কৰে।
উল্লেখযোগ্য যে শেহতীয়া বানত বোকাখাত মহকুমাৰ ৬৩ খন গাঁৱৰ প্রায় ৮০,৪০০ গৰাকী লোকে, ২১ হাজাৰ পশুধন আক্রান্ত হোৱাৰ লগতে ১৬১৬ হেক্টৰ কৃষিভূমিৰ শস্য নষ্ট হৈছে।
যাৰবাবে বোকাখাত মহকুমাত ২১ টা আশ্রয় শিৱিৰ আৰু ৯৫ টা সাহায্য বিতৰণ কেন্দ্র স্থাপন কৰা হৈছে । আশ্রয় শিৱিৰসমূহত ৪১২৭ গৰাকী লোকে আশ্রয় গ্রহণ কৰিছে বুলি বিভাগীয় সুত্ৰত প্ৰকাশ।
