মুখ্য মন্ত্ৰী সৰ্বানন্দ সোণোৱালে আজি কাছাৰ, কৰিমগঞ্জ আৰু হাইলাকান্দি জিলাৰ উপায়ুক্ত কেইগৰাকীক চক্ৰ বিষয়া পৰ্যায়ত ভূমিস্খলন নিৰীক্ষণ আৰু সঁহাৰি গোট গঠন কৰিবলৈ নিৰ্দেশ দিয়ে।
এই গোটত আৰক্ষী, এছ ডি আৰ এফ আৰু বন বিভাগৰ লোককো জড়িত কৰিবলৈ মুখ্য মন্ত্ৰীয়ে নিৰ্দেশ দিয়ে।
আজি বৰাক উপত্যকাৰ বানপানী, ভূমিস্খলন আৰু কোভিড-১৯ পৰিস্থিতিৰ পৰ্যালোচনা কৰাৰ উদ্দেশ্যৰে কাছাৰ জিলা উপায়ুক্ত কাৰ্য্যালয়ৰ সভাকক্ষত অনুষ্ঠিত তিনিখন সুকীয়া সুকীয়া বৈঠকত সোণোৱালে এইদৰে জিলাকেইখনৰ প্ৰশাসনক এই নিৰ্দেশ দিয়ে।
জিলাকেইখনৰ ভূমিস্খলনপ্ৰৱণ স্পৰ্শকাতৰ এলেকাসমূহৰ বাসিন্দাসকলক অতিশীঘ্ৰে সুৰক্ষিত স্থানলৈ স্থানান্তৰৰ ব্যৱস্থা কৰিবলৈও মুখ্য মন্ত্ৰীয়ে জিলা প্ৰশাসনসমূহক নিৰ্দেশ দিয়ে।
ৰাজ্যখনৰ ভূমিস্খলনপ্ৰৱণ এলেকা চিনাক্ত কৰিবলৈ ৰাজ্য চৰকাৰে অতিশীঘ্ৰে ভাৰতীয় ভূতাত্ত্বিক জৰীপ বিভাগৰ জৰিয়তে জৰীপ চলাব যাতে ভূমিস্খলনৰ ফলত জনসাধাৰণৰ প্ৰাণহানিৰ লেখীয়া ঘটনা সংঘটিত হ’ব নোৱাৰে।
মুখ্য মন্ত্ৰীয়ে জনসাধাৰণৰ যাতায়তৰ সুবিধাৰ্থে ৰাজ্যখনত ১.৩২ লাখ খন বাছৰ ব্যৱস্থা কৰা হৈছে বুলিও কয়।
তেওঁ লগতে স্বাস্থ্য বিভাগে কোভিড-১৯ সম্পৰ্কত দিয়া নিৰ্দেশনাৱলী মানি চলাৰ বাবে জনসচেতনতা সৃষ্টিৰ ওপৰতো গুৰুত্ব আৰোপ কৰে।
বৈঠকত শিলচৰ মেডিকেল কলেজৰ অধ্যক্ষগৰাকীয়ে প্ৰতিদিনে ১০০০ গৰাকী ব্যক্তিক কোভিড-১৯ পৰীক্ষা কৰাৰ বিষয়টো মুখ্য মন্ত্ৰীক অৱগত কৰে।
মুখ্য মন্ত্ৰীয়ে খাদ্য আৰু অসামৰিক যোগান বিভাগৰ বিষয়াসকলক গুণগত মান-সম্পন্ন খাদ্য যোগান সুনিশ্চিত কৰাৰ বাবেও নিৰ্দেশ দিয়ে।
আনহাতে, বজ্ৰপাতৰ যাতে আগতীয়া জাননী আধা ঘন্টা আগত লাভ কৰিব পাৰে সেই দিশতো ব্যৱস্থা গ্ৰহণ কৰিবলৈ বিভাগীয় কৰ্তৃপক্ষক নিৰ্দেশ দিয়ে।