মুখ্য মন্ত্ৰী সৰ্বানন্দ সোণোৱালে আজি গুৱাহাটীৰ সৰুসজাই ক্ৰীড়া প্ৰকল্পত স্থাপন কৰা কোৱাৰেণ্টাইন চেণ্টাৰ পৰিদৰ্শন কৰি ইয়াত উপলব্ধ থকা স্ক্ৰীনিং, পঞ্জীয়ন, পৰীক্ষণ ইত্যাদি ব্যৱস্থাসমূহৰ বুজ লয়।
স্বাস্থ্য মন্ত্ৰী ড০ হিমন্ত বিশ্ব শৰ্মাৰ সৈতে উক্ত কোৱাৰেণ্টাইন চেণ্টাৰ পৰিদৰ্শনৰ সময়ত সোণোৱালে কোৱাৰেণ্টাইন চেণ্টাৰত অহৰ্নিশে কৰ্তব্যৰত বিষয়া-কৰ্মচাৰীৰ সৈতে মত-বিনিময় কৰি এই চেন্টাৰত থকা সকলো ব্যক্তিলৈ যথাসম্ভৱ সৰ্বোৎকৃষ্ট সেৱা আগবঢ়োৱাৰ আহ্বান জনায়।
উল্লেখযোগ্য যে, কেন্দ্ৰীয় চৰকাৰৰ নিৰ্দেশনাৰ ভিত্তিত অসম চৰকাৰে কোভিড-১৯ মহামাৰীৰ বিৰুদ্ধে যুঁজ দিয়াৰ বাবে সমগ্ৰ ৰাজ্যতে আঞ্চলিক স্বাস্থ্য পৰীক্ষণ কেন্দ্ৰ আৰু কোৱাৰেণ্টান চেণ্টাৰ স্থাপন কৰিছে।
সৰুসজাই ইনডোৰ ষ্টেডিয়ামত স্থানন কৰা এই কোৱাৰেণ্টাই চেণ্টাৰত এতিয়ালৈ ২২৮৬ গৰাকী ব্যক্তিক কোৱাৰেণ্টাইনৰ সুবিধা প্ৰদান কৰা হৈছে। ইয়াৰে ১১০৯ গৰাকী ব্যক্তিক ইতিমধ্যে ঘৰলৈ যাবলৈ দিয়া হৈছে।
তদুপৰি, অসমৰ বাহিৰৰ পৰা ৰাজ্যখনলৈ বহু সংখ্যক লোকৰ আগমনৰ পৰিপ্ৰেক্ষিতত ৬১ খন হোটেলক কোৱাৰেণ্টাইন চেণ্টাৰ হিচাপে মনোনীত কৰাৰ পদক্ষেপ লোৱা হৈছে বুলিও সোণোৱালে জানিবলৈ দিয়ে।
কোৱাৰেণ্টাইন চেণ্টাৰ পৰিদৰ্শনৰ পাছত ইয়াত উপস্থিত তথা সাংবাদিকসকলৰ সৈতে হোৱা কথা-বতৰাত মুখ্য মন্ত্ৰীয়ে ক’ভিড-১৯-ৰ বিৰুদ্ধে চলোৱা এই যুঁজত চৰকাৰলৈ সকলোধৰণৰ সহায়-সহযোগিতা আগবঢ়োৱাৰ বাবে সকলোকে ধন্যবাদ জ্ঞাপন কৰে।
আজিৰ পৰিদৰ্শনৰ সময়ত স্বাস্থ্য বিভাগৰ জেষ্ঠ বিষয়া, কামৰূপ মহানগৰ জিলাৰ উপায়ুক্ত বিশ্বজিৎ পেগুকে ধৰি বহু শীৰ্ষ পৰ্যায়ৰ বিষয়া উপস্থিত থাকে।
