কৰ্ণাটকৰ চিক্কামাগালুৰ জিলাত এখন বেনাৰ স্থাপনক লৈ কংগ্ৰেছৰ দুটা ফৈদৰ মাজত হোৱা হিংসাত্মক সংঘৰ্ষত এজন কংগ্ৰেছ কৰ্মী আৰু এগৰাকী গাঁও পঞ্চায়তৰ সদস্য নিহত হয়। শুক্ৰবাৰে নিশা প্ৰায় ৯:৩০ বজাত কেলমাদেশ্বৰ মঠ ৰোডৰ সমীপত এই ঘটনাটো সংঘটিত হয় বুলি আৰক্ষীৰ সূত্ৰে জানিব পৰা গৈছে।
নিহত ব্যক্তি দুজনৰ ভিতৰত এজনক গণেশ গৌড় (৩৮) বুলি চিনাক্ত কৰা হৈছে। আৰক্ষীৰ মতে, এখন বেনাৰক লৈ হোৱা বিতৰ্কই পিছলৈ সংঘৰ্ষৰ ৰূপ লৈছিল আৰু এই সময়তে গণেশ গৌড়ক চোকা অস্ত্ৰৰে আক্ৰমণ কৰা হয়। তেওঁক গুৰুতৰভাৱে আঘাতপ্ৰাপ্ত অৱস্থাত ততাতৈয়াকৈ চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে। এই সংঘৰ্ষত আন এজন গাঁও পঞ্চায়তৰ সদস্যৰো মৃত্যু ঘটিছে।
আৰক্ষীয়ে এই ঘটনাৰ সন্দৰ্ভত ইতিমধ্যে চাৰিজন অভিযুক্তক আটক কৰিছে আৰু আন তিনি জন পলাতক অৱস্থাত আছে। ঘটনা সন্দৰ্ভত আৰক্ষীৰ অনুসন্ধান অব্যাহত আছে। আৰক্ষীৰ তথ্য অনুসৰি, ঘটনাৰ আগতে চহৰৰ এখন বাৰৰ ওচৰত দুয়োটা দলৰ মাজত মতানৈক্য সৃষ্টি হৈছিল, যিটো পিছলৈ হিংসাত্মক সংঘৰ্ষলৈ পৰিণত হয়।
এই সংঘৰ্ষত বহু লোক গুৰুতৰভাৱে আঘাতপ্ৰাপ্ত হৈছে আৰু তেওঁলোকক চিক্কামাগালুৰ জিলা চিকিৎসালয়ত ভৰ্তি কৰা হৈছে। বৰ্তমানো দুজন লোক চিকিৎসাধীন অৱস্থাত আছে।
জিলাৰ আৰক্ষী অধীক্ষক বিক্ৰম আমাথে জনাইছে যে, তেওঁ ঘটনাস্থলী পৰিদৰ্শন কৰি পৰিস্থিতি নিয়ন্ত্ৰণলৈ আনিছে আৰু দোষীক আটক কৰিবলৈ এটা বিশেষ আৰক্ষী গোট গঠন কৰা হৈছে।
ইফালে, বেংগালুৰুত থকা মুখ্যমন্ত্ৰী সিদ্ধাৰামায়াই এই ঘটনাটোৰ সন্দৰ্ভত চিক্কামাগালুৰ আৰক্ষীৰ পৰা বিস্তৃত তথ্য বিচাৰে আৰু দোষীৰ বিৰুদ্ধে কঠোৰ ব্যৱস্থা লোৱাৰ আশ্বাস দিয়ে। X (পূৰ্বৰ টুইটাৰ) প্লেটফৰ্মত প্ৰকাশ কৰা এটা প’ষ্টত তেওঁ গণেশ গৌড়ৰ হত্যাকাণ্ডৰ তীব্ৰ নিন্দা জনাই কয় যে, গৌড়ৰ মৃত্যুত তেওঁ “নিজ পৰিয়ালৰ এজন সদস্য হেৰুৱাৰ দৰে দুখ পাইছে।”
এই ঘটনাই অঞ্চলটোত তীব্ৰ উত্তেজনাৰ সৃষ্টি কৰিছে আৰু আৰক্ষীয়ে সম্ভাৱ্য পৰিস্থিতি নিয়ন্ত্ৰণ কৰিবলৈ অতিৰিক্ত নিৰাপত্তা ব্যৱস্থা গ্ৰহণ কৰিছে।
