যোৱা ২১ ফেব্ৰুৱাৰীৰ পৰা গোলাঘাট নগৰৰ সমীপৰ শালমৰা চাহ বাগিচাৰ লগতে বিভিন্ন স্থানত হোৱা সুৰাৰ বিষক্ৰিয়াত দুশৰো অধিক লোক আক্ৰান্ত হৈ মৃত্যুক আকোঁৱালি লোৱাৰ ফলত এতিয়া বহু শিশুৱে পিতৃ-মাতৃক হেৰুৱাই অসহায় হৈ পৰিছে।
মাথো কেইটামান মূহুৰ্ততে থানবান হৈ যোৱা এই পৰিয়ালবোৰৰ শিশুসকলৰ ভবিষ্যতকলৈ এক বৃহৎ প্ৰশ্নৰ উদ্ৰেগ ঘটাৰ সময়তে অনাথ শিশুসকলৰ ভবিষ্যত সুৰক্ষিত কৰাৰ উদ্দেশ্যে আগবাঢ়ি আহিছে গোলাঘাট জিলা শিশু কল্যাণ পৰিষদ।
পৰিষদৰ তৰফৰ পৰা অধ্যক্ষ লুকুমণি গোস্বামীয়ে দিয়া তথ্য অনুসৰি দেওবাৰ অৰ্থাৎ ২৪ ফেব্ৰুৱাৰিত তেওঁৰ নেতৃত্বত শালমৰা অঞ্চললৈ যোৱা এটা দলে শালমৰা আৰু ইয়াৰ কাষতে থকা গোলামপট্টি অঞ্চলত ১৮ টি অনাথ শিশুৰ সম্পৰ্কত তথ্য লাভ কৰি যাৱতীয় ব্যৱস্থা গ্ৰহণৰ বাবে প্ৰয়োজনীয় পদক্ষেপ আৰম্ভ কৰিছে।
জানিব পৰা মতে ইয়াৰে দুটা শিশুক আজি বোকাখাতস্থিত শিশু গৃহলৈ প্ৰেৰণ কৰিছে। সুৰা বিষক্ৰিয়া ঘটনাত পিতৃ-মাতৃহীন হোৱা উক্ত শিশু কেইটা হ’ল- দীপালী পূজৰ (১১), বাদল পূজৰ (১০), কুন্দন পূজৰ (৭), চন্দন পূজৰ (৪)। এওঁলোক মৃত দেবেন পূজৰ আৰু সুনিতা পূজৰৰ সন্তান।
ইয়াৰ উপৰি বিক্ৰম পূজৰ (১৪), অবিনাশ পূজৰ (১০), মহেশ্ব পূজৰ( ৯), মঙ্গল পূজৰ (৬), ফোনচু (১৪), ৰিংকি (১৬), বিতো পূজৰ (১১), উপেন পূজৰ (৭) আৰু পৰি পূজৰ (২), ৰমজানি ভক্তা (১৬), লাঠু ভক্তা (১০), ফচু ভক্তা (৮), চান্দীনী ভক্তা (১৩) আৰু নিকিতা (ৰুবিতা)তাঁতী (১২)।
এইসকলৰ ভিতৰত নিকিতা তাঁতী আৰু ৰিংকিক আজি পৰিষদে প্ৰয়োজনীয় সকলো নীতি-নিয়ম সম্পাদনৰ পিছত শিশু গৃহলৈ প্ৰেৰণ কৰা বুলি জানিবলৈ দিছে।
মন কৰিবলগীয়া যে পিতৃ-মাতৃহীন এই শিশুসকলৰ ভৱিষ্যতৰ বাবে মঙলবাৰে শালমৰা অঞ্চলত এক বিশেষ সভা অনুষ্ঠিত কৰিব বুলি অধ্যক্ষগৰাকীয়ে জনাইছে। লগতে কাইলৈ অঞ্চলটোত পুনৰ অনাথ শিশুসকলৰ সম্পৰ্কত অভিযান চলাব বুলি জানিবলৈ দিয়ে।
উল্লেখযোগ্য যে দেওবাৰে উক্ত অভিযানৰ বাবে যোৱা দলত জিলা শিশু কল্যাণ পৰিষদ গোটৰ তৰফৰ পৰা জিলা শিশু সুৰক্ষা বিষয়া বিকাশ ৰঞ্জন কোঁৱৰ, জিলা সমাজ কল্যান বিষয়া স্মৃতিৰেখা দত্ত বৰুৱা, ডি চি পি অ প্ৰণামী দত্ত শইকীয়া, কাউন্সিলাৰ ৰুলি ঠেঙাল, প্ৰশান্ত শইকীয়া, কৰ্মচাৰী দীপক বৰদলৈ আদিয়ে সহযোগ কৰে।
আনহাতে শিশু কল্যাণ পৰিষদৰ তৰফৰ পৰা জিলাখনত সুৰা ট্ৰেজেডিত অনাথ হোৱা কোনো শিশুৰ বিষয়ে কিবা তথ্য থাকিলে পৰিষদৰ সৈতে যোগাযোগ কৰিবলৈ আহ্বান জনাইছে।
