কৃষক বিদ্ৰোহৰ দৃঢ়তা তথা অটল স্থিতিত যেন থৰকাছুটি হেৰুৱাৰ উপক্ৰম হৈছে কেন্দ্ৰীয় চৰকাৰৰ।
বিদ্ৰোহী কৃষক সংগঠনৰ দৃঢ় স্থিতিৰ বাবে একেৰাহে ষষ্ঠলানিকৈ আলোচনা ব্যৰ্থ হোৱাৰ পিছত কেন্দ্ৰীয় চৰকাৰ যে শংকিত হৈছে সেয়া স্পষ্ট হৈ পৰিছে কেন্দ্ৰীয় মন্ত্ৰীসকলৰ আচাৰ আচৰণ আৰু কথা বতৰাত।
আলোচনা ব্যৰ্থ হোৱাৰ পিছত ইতিমধ্যে কৃষক সংগঠনসমূহে অব্যাহত থকা আন্দোলনৰ সমান্তৰালভাৱে নতুন কাৰ্যসূচীও ঘোষণা কৰিছে। এই ঘোষণাৰ পিছতে থৰকাছুটি হেৰুৱাৰ উপক্ৰম হৈছে কেন্দ্ৰীয় চৰকাৰৰ।
কৃষক সংগঠনসমূহক সৈমান কৰিবলৈ ব্যৰ্থ হৈ শংকিত হোৱা কেন্দ্ৰীয় চৰকাৰৰ মন্ত্ৰীয়ে এতিয়া কৃষক বিদ্ৰোহক শত্ৰু ৰাষ্ট্ৰ চীন আৰু পাকিস্তানৰ ষড়যন্ত্ৰ ফচল বুলি দাবী কৰিছে।
কেন্দ্ৰীয় ক্ৰেতা সুৰক্ষা, খাদ্য আৰু বিতৰণ ৰাজ্যমন্ত্ৰী ৰাওচাহেব দানৱে-এ বুধবাৰে দাবী কৰিছে যে দেশৰ বিভিন্ন প্ৰান্তত অব্যাহত থকা কৃষক বিদ্ৰোহত ভাৰতৰ শত্ৰু চীন আৰু পাকিস্তানৰ হাত আছে।
কেন্দ্ৰীয় মন্ত্ৰীগৰাকীৰ মতে ভাৰতৰ শত্ৰু দেশসমূহে কৃষকক ভুলকৈ বুজাই তেওঁলোক প্ৰৰোচিত কৰিছে।
দানৱে-এ নিজেই প্ৰৰোচনামূলকভাৱে কয় যে চীন আৰু পাকিস্তানে ভাৰতৰ মুছলমানসকল শংকিত বুলি প্ৰচাৰ কৰি আহিছে। CAA আৰু NRC আহিলে মুছলমানসকলে এই দেশ এৰি যাব লাগিব বুলি কৈ আহিছে।
কিন্তু বিগত ছমাহে এই দেশৰ এজনো মুছলমানে কি দেশ এৰি গৈছ? এই প্ৰশ্ন কৰি মন্ত্ৰী গৰাকীয়ে দাবী কৰে যে মুছলামনক প্ৰৰোচিত কৰা অপচেষ্টা কৰি ব্যৰ্থ হোৱাৰ পিছত এইবাৰ কৃষকসকলক প্ৰৰোচনাত কৰাত নামিছে। এয়া বিদেশী শক্তিৰ ষড়যন্ত্ৰ বুলিও তেওঁ দাবী কৰিছে।
কেন্দ্ৰীয় মন্ত্ৰীগৰাকীৰ এই অদ্ভূত, দায়িত্বহীন আৰু বিতৰ্কিত মন্তব্যই শান্তিপূৰ্ণ কৃষক প্ৰতিবাদী পৰোচিত কৰিব বুলি আশংকা কৰা হৈছে।
কৃষক সংগঠনসমূহে কেন্দ্ৰীয় মন্ত্ৰীগৰাকীৰ এই দায়িত্বহীন তথা বিতৰ্কিত মন্তব্যক কেনেদৰে গ্ৰহণ কৰি সেয়া লক্ষণীয় হ’ব।
