ৰাষ্ট্ৰসংঘৰ বিৰুদ্ধে সৰব হৈ উঠিছে চীন। চীনে ইয়াৰ জিনজিয়াং অঞ্চলত উইঘূৰ আৰু অন্যান্য মুছলমানসকলক “স্বেচ্ছাচাৰী আৰু বৈষম্যমূলক ভাৱে আটক” কৰাটো মানৱতাৰ বিৰুদ্ধে এক অপৰাধ বুলি বুধবাৰে ৰাষ্ট্ৰসংঘৰ বিদায়ী মানৱ অধিকাৰ প্ৰধানজনে এক দীৰ্ঘপ্ৰতীক্ষিত প্ৰতিবেদন প্ৰকাশ কৰাৰ পিছতে জাঙুৰ খাই উঠিছে চীন৷ ৰাষ্ট্ৰসংঘৰ মানৱ অধিকাৰ উচ্চায়ুক্ত মিচেল বেচেলেটে তেওঁৰ চাৰি বছৰীয়া কাৰ্যকাল সমাপ্ত হোৱাৰ কেইমিনিটমান আগতে প্ৰতিবেদনখন প্ৰকাশ কৰে। তেওঁ মে’ মাহত চীন ভ্ৰমণ কৰি লাভ কৰা অভিজ্ঞতাৰ কথা প্ৰতিবেদন খনত উল্লেখ কৰিছিল৷
ৰাষ্ট্ৰসংঘৰ মানৱ অধিকাৰ আয়োগে ৪৮ পৃষ্ঠাৰ প্ৰতিবেদনত কৈছে যে জিনজিয়াঙত “চৰকাৰৰ সন্ত্ৰাসবাদ বিৰোধী আৰু উগ্ৰবাদ বিৰোধী ৰণনীতিৰ প্ৰয়োগৰ পৰিপ্ৰেক্ষিতত” “গুৰুতৰ মানৱ অধিকাৰ উলংঘন হৈছে”।প্ৰতিবেদন খনত কোৱা হৈছে , “২০১৭ চনৰ পৰা পৰিয়াল পৰিকল্পনা নীতি বলপূৰ্বক প্ৰৱৰ্তনৰ জৰিয়তে ইউঘূৰসকলৰ প্ৰজনন অধিকাৰ উলংঘন কৰা হৈছে।”
প্ৰতিবেদনখন প্ৰকাশৰ আগতে নিউয়ৰ্কত থকা ৰাষ্ট্ৰসংঘৰ চীনৰ ৰাষ্ট্ৰদূত ঝাং জুনে কয় যে বেইজিঙে প্ৰতিবেদন খনৰ বিৰোধিতা কৰিছে। তেওঁ কয় যে ৰাষ্ট্ৰসংঘৰ মানৱ অধিকাৰ প্ৰধানে চীনৰ আভ্যন্তৰীণ বিষয়ত হস্তক্ষেপ কৰা উচিত নহয়।
উল্লেখ্য উইঘূৰ গণহত্যাৰ বা অত্যীচাৰৰ অভিযোগ পুনৰ অস্বীকাৰ কৰিছে চীনে। বেইজিঙে ওলোটাই বিশ্ব সম্প্ৰদায়ক কৈছে যে চীনৰ সংখ্যালঘু ইউঘূৰসকলে দেশখনত স্বাধীনভাৱে জীৱন যাপন কৰি আহিছে।
বেইজিঙে দাবী কৰি কয় যে চীনত সংখ্যালঘু ইউঘূৰসকলক ধৰ্মীয় আৰু শ্ৰমৰ স্বাধীনতা প্ৰদান কৰা হৈছে, তেওঁলোকক সকলোধৰণৰ নাগৰিক অধিকাৰ দিয়া হৈছ।ইফালে ৰাষ্ট্ৰসংঘৰ মানৱাধিকাৰ পৰিষদত চীনৰ বৈদেশিক মন্ত্ৰী ওৱাং ইবলেনে কয় যে ইউঘূৰ মুছলাম অধ্যুষিত জিনজিয়াং প্ৰদেশত সন্ত্ৰাসবাদীৰ বিৰুদ্ধেহে অভিযান চলিছে। আৰু এই অভিযান আইন মানি চলোৱা হৈছে বুলিও তেওঁ দাবী কৰিছে।
“যোৱা চাৰে চাৰি বছৰ ধৰি জিনজিয়াঙত সন্ত্ৰাসবাদীৰ আক্ৰমণ সংঘটিত হোৱা নাই। জিনজিয়াঙৰ অৰ্থনৈতিক আৰু সামাজিক উন্নয়নৰ সাক্ষী হৈছে ইউঘূৰ মুছলমানসকল। তাতে গণহত্যা, বন্দীশিবিৰত ধৰ্মীয় উৎপীড়ন চলোৱাৰ যি অভিযোগ কৰা হৈছে সেয়া সম্পূৰ্ণ মিছা।” চীনৰ বৈদেশিক মন্ত্ৰীগৰাকীয়ে কয়।
উল্লেখ্য যে ২০০৯ চনৰ জিনজিয়াং প্ৰদেশত সংঘটিত সাম্প্ৰদায়িক সংঘৰ্ষৰ জেৰ টানি ইউঘূৰ আৰু অন্যান্য মুছলমান জনগোষ্ঠীৰ ওপৰত চীনে দীৰ্ঘদিন ধৰি অত্যাচাৰ চলোৱাৰ অভিযোগ উত্থাপন হৈ আহিছে।
আনকি মুছলমান মহিলাসকলক জোৰকৈ বন্ধ্যাকৰণ কৰাৰ লগতে গৰ্ভপাত কৰাৰ দৰে অমানৱীয় কাম কৰা বুলিও চীনৰ বিৰুদ্ধে অভিযোগ উত্থাপন হৈ আহিছে। যিবোৰ অভিযোগ চীনে পূৰ্বৰে পৰা অস্বীকাৰ কৰি আহিছে।
