ক্ৰিকেটৰ বেট লৈ নমাৰ অৰ্থ হ’ল কিবা নহয় কিবা এটা অভিলেখ গঢ়ি তোলা। ক্ৰিছ গেইলৰ ক্ষেত্ৰত ছবিখন এনেকুৱাই আছিল। আই পি এল হওক বা আন্তঃৰাষ্ট্ৰীয় ক্ৰিকেট হওক, গেইলৰ ট্ৰেক ৰেকৰ্ড ভংগ হোৱা নাই।
এইবাৰ বৈভৱ সূৰ্যবংশীৰ ক্ষেত্ৰতো একেই ছবি দেখা গৈছে। মাত্ৰ ১৫ বছৰ বয়সত তেওঁ যি ছন্দত খেলিছে, সেয়া অনাগত কেইবছৰমানৰ ভিতৰত যদি তেওঁ কিংবদন্তিগৰাকীৰ অভিলেখ ভংগ কৰে তেন্তে আচৰিত হ’বলগীয়া একো নাথাকিব। উদাহৰণস্বৰূপে, এছ আৰ এইচ মেচত তেওঁ গেইলৰ ছয় মৰাৰ অভিলেখ ভংগ কৰিছে। এইবাৰ ক্ৰিছ গেইলে বৈভৱৰ বিষয়ে মুকলিকৈ কৈছে ।
বৈভৱৰ মেচৰ পৰিসংখ্যাৰ এখন ছবি শ্বেয়াৰ কৰি গেইলে লিখিছে, “আই পি এলত এটা নতুন ছিক্স মেচিন, অসাধাৰণ বৈভৱ।” ইয়াৰ পিছত তেওঁ আন এটা পোষ্ট কৰে। য’ত তেওঁ বৈভৱৰ শতক বঞ্চিত হোৱাৰ বিষয়ে লিখিছে, “আনলাকি, কিন্তু এদিন তুমি শতক পাবা।” এই মেচখনত বৈভৱে মুঠ ১২টা ছয় মাৰে। আৰু ইয়াৰ লগে লগে তেওঁ আই পি এলত মুঠতে চাৰিখন মেচত ১০টাতকৈ অধিক ছয় মাৰে। ইয়াৰ উপৰিও তেওঁ এটা ছিজনত একেৰাহে তিনিখন মেচত ১০টা ছয় মৰা প্ৰথমজন বেটছমেন হিচাপে পৰিগণিত হয়।
অৱশ্যে গেইলৰ অভিলেখৰ বিষয়ে চৰ্চা চলি থকাৰ পিছতো বৈভৱে সনথ জয়সূৰ্য্যৰো অভিলেখ ভংগ কৰিলে। ২০০৮ চনৰ আই পি এল পাৱাৰপ্লে মেচত মুম্বাই ইণ্ডিয়ানছ আৰু চেন্নাই ছুপাৰ কিংছৰ মাজত জয়সূৰ্যই পাৱাৰপ্লেত মুঠ ৭টা ছয় মাৰে। এই মেচত বৈভৱে সেয়া অতিক্ৰম কৰিলে।
সেইদৰে, ডেভিদ ৱাৰ্নাৰৰ অভিলেখকো অতিক্ৰম কৰিলে বৈভৱে। ২০১৬ চনত এছ আৰ এইচৰ হৈ পাৱাৰপ্লেত ৱাৰ্নাৰে মুঠ ৪৬৭ ৰান সংগ্ৰহ কৰিছিল, আৰু এইবাৰ বৈভৱে ৪৯০ ৰান সংগ্ৰহ কৰিছে।
আই পি এল প্লে অফত পাৱাৰপ্লেত ৫০ বা তাতকৈ অধিক ৰান সংগ্ৰহ কৰা খেলুৱৈৰ তালিকাত তেওঁ সুৰেশ ৰাইনা (২০১৪ চনত পঞ্জাব কিংছৰ বিৰুদ্ধে ৮৭ ৰান) আৰু এডাম গিলক্ৰিষ্ট (২০০৯ চনত দিল্লী ডেয়াৰডেভিলছৰ বিৰুদ্ধে ৭৪ ৰান)ৰ সৈতে যোগ দিছে। ২০টাতকৈও কম বলত বৈভৱৰ এয়া পঞ্চম অৰ্ধশতক। তেওঁৰ ওপৰত কেৱল অভিষেক শৰ্মা।
আই পি এলৰ ট্ৰফী তুলি ধৰিবলৈ আৰু দুখন মেচ আছে বৈভৱৰ। যদি তেওঁ সেইটো উঠাব পাৰে, অৰ্থাৎ ৰাজস্থান ৰয়েলছ যদি আই পি এলত জয়ী হয়, তেন্তে আই পি এলৰ ইতিহাসত আই পি এল জয় কৰা আটাইতকৈ কম বয়সীয়া খেলুৱৈ হিচাপে পৰিগণিত হ’ব বৈভৱ সূৰ্যবংশী।
