নতুন চৰকাৰ গঠনৰ পিছতে উত্তপ্ত হৈ পৰিছে মণিপুৰ। বৃহস্পতিবাৰে সন্ধিয়া মণিপুৰৰ চুৰাচান্দপুৰ আৰু টুইবুং অঞ্চলত নিৰাপত্তাৰক্ষীৰ সৈতে প্ৰতিবাদকাৰীৰ সংঘৰ্ষ ঘটে। নতুন চৰকাৰত যোগদান কৰিছে কুকি-জো জনগোষ্ঠীৰ নেতাসকলে। ইয়াৰ প্ৰতিবাদত কুকি প্ৰভাৱিত অঞ্চলত বন্ধৰ আহ্বান দিয়া হয়।
এই ঘটনাক লৈ প্ৰতিবাদ, পথ অৱৰোধ, অগ্নিসংযোগৰ ঘটনা সংঘটিত হৈছে। আৰক্ষীৰ বাহন আৰু কেইবাটাও চৰকাৰী ভৱনত আক্ৰমণ সংঘটিত হৈছে। আৰক্ষীৰ ওপৰত শিলগুটিও নিক্ষেপ কৰা হয়।
এবছৰ ধৰি মণিপুৰত ৰাষ্ট্ৰপতিৰ শাসন জাপি দিয়া হৈছিল। সেই ৰাষ্ট্ৰপতিৰ শাসন মঙলবাৰে প্ৰত্যাহাৰ কৰা হয়। বুধবাৰে মণিপুৰৰ মুখ্যমন্ত্ৰী হিচাপে শপত গ্ৰহণ কৰে ইউমনাম খেমচান্দ সিঙে। তেওঁৰ লগতে উপ-মুখ্যমন্ত্ৰীও শপত গ্ৰহণ কৰে। উপ-মুখ্যমন্ত্ৰী হিচাপে নিযুক্তি পোৱাসকলৰ ভিতৰত এজন হৈছে নেমচা কিপগেন। তেওঁ কুকি জনগোষ্ঠীৰ নেত্ৰী। তেওঁৰ লগতে কুকি-জো জনগোষ্ঠীৰ আৰু দুজন নতুন মন্ত্ৰীসভাত যোগদান কৰিছে।
ইয়াৰ বিৰুদ্ধে কুকি-জো জনগোষ্ঠীৰ নেতাসকলে প্ৰতিবাদ সাব্যস্ত কৰে। লগতে চৰকাৰত যোগদান আৰু সমৰ্থন কৰা জনগোষ্ঠীটোৰ নেতা-বিধায়কসকলক সামাজিক বৰ্জনৰ আহ্বান জনায়। ইয়াৰ সমান্তৰালকৈ কুকি-জো ক্ষতিগ্ৰস্ত অঞ্চলতো প্ৰতিবাদত বন্ধৰ আহ্বান জনোৱা হয়। তেওঁলোকে দাবী কৰে যে বিধায়কসকলে জনগোষ্ঠীটোৰ জনসাধাৰণক বিশ্বাসঘাতকতা কৰিছে।
বৃহস্পতিবাৰৰ পৰা কুকি-জো জনগোষ্ঠীয়ে প্ৰতিবাদ আৰম্ভ কৰে। ইয়াৰ বাবে চুৰাচান্দপুৰ আৰু টুইবুং অঞ্চলত নিৰাপত্তাৰক্ষীৰ সৈতে সংঘৰ্ষ হয়।
বৃহস্পতিবাৰে পুৱাৰে পৰা আৰম্ভ হয় প্ৰতিবাদ। প্ৰতিবাদৰ অংশ হিচাপে দুজন প্ৰতিবাদকাৰীয়ে আত্মদহনৰ চেষ্টা চলোৱা বুলি অভিযোগ উঠিছে। কিন্তু সময়মতে আৰক্ষী জোৱানৰ হস্তক্ষেপত বাধা আহে। অঞ্চলটোত কটকটীয়া নিৰাপত্তাৰ ব্যৱস্থাও কৰা হয়। অৱশ্যে সন্ধিয়াৰ পিছত পৰিস্থিতি অধিক ভয়াৱহ হ’বলৈ ধৰে। কেইবাটাও অঞ্চলত বিক্ষিপ্ত সংঘৰ্ষৰ খবৰ পোৱা গৈছে। প্ৰতিবাদৰ সময়ত সংঘৰ্ষ আৰু নিৰাপত্তাৰক্ষীক শিলগুটি নিক্ষেপ কৰাৰ ছবিও ছ’চিয়েল মিডিয়াত প্ৰচাৰ হৈছে।
আনহাতে, বিধায়কসকলৰ চৰকাৰত যোগদান কৰাৰ প্ৰতিবাদত শুকুৰবাৰে চুৰাচান্দপুৰ অঞ্চলত সম্পূৰ্ণ বন্ধৰ আহ্বান জনাইছে কুকি ছাত্ৰ সংগঠনটোৱে। ইয়াৰ লগতে সংগঠনটোৱে এক সমাৱেশ অনুষ্ঠিত কৰাৰো কথা ঘোষণা কৰিছে।
নতুনকৈ উদ্ভৱ হোৱা হিংসাত্মক ঘটনা ৰোধ কৰিবলৈ তাত অতিৰিক্ত নিৰাপত্তাৰক্ষীও মোতায়েন কৰা হৈছে।
