দূৰসংযোগ বিভাগে ৰাজহুৱা স্বাৰ্থ আৰু ৰাষ্ট্ৰীয় নিৰাপত্তাৰ কাৰণ দৰ্শাই ভাৰতত বিশ্বৰ অন্যতম জনপ্ৰিয় ই-ফাইল ট্ৰেন্সফাৰ ছাৰ্ভিচ প্ৰভাইডাৰ We Transferক নিষিদ্ধ কৰিছে। বাতৰিত প্ৰকাশ।
ক’ৰ’না ভাইৰাছৰ বাবে চলি থকা লকডাউনৰ ফলত দেশৰ লাখ লাখ লোকে ঘৰৰ পৰা কাম চলাই খকাৰ সময়ত দেশৰ টেলিকম বিভাগে গ্ৰহণ কৰা এই সিদ্ধান্ত মন কৰিবলগীয়া।
We Transferৰ জৰিয়তে য়ুজাৰসকলে সম্পূৰ্ণ বিনামূলীয়াকৈ ২ জিবি পৰ্যন্ত যিকোনো ধৰণৰ ফাইল স্বেয়াৰ কৰিব পাৰে। যদি কোনো য়ুজাৰে পেইড ভাৰ্ছনটো ব্যৱহাৰ কৰে তেওঁ ২০ জিবি পৰ্যন্ত ফাইল ট্ৰেন্সফাৰ কৰিব পাৰে।
ইয়াৰ বিপৰীতে ই-মেইলৰ জৰিয়তে ইমান ডাঙৰ ফাইল ট্ৰেন্সফাৰ কৰাটো সাধাৰণতে সম্ভৱ নহয়।
Mumbai Mirror-ত প্ৰকাশিত এক বাতৰি মতে, ভাৰতত সেৱা আগবঢ়াই থকা সকলো ইণ্টাৰনেট ছাৰ্ভিচ প্ৰভাইডাৰ (ISP)ক টেলিকম বিভাগে যোৱা ১৮ মে’ত We Transfer ৱেবছাইটৰ মূল URLৰ লগতে ৱেবছাইটোৰ দুটা বিশেষ পে’জৰ URL বাৰণ কৰিবলৈ নিৰ্দেশ দিয়ে।
উল্লেখযোগ্য যে নেডাৰলেণ্ডৰ এমষ্টাৰ্ডামস্থিত ই-প্ৰতিষ্ঠান We Transfer মূলত এক মেছেন্জাৰ সেৱাহে, স্বেয়াৰ কৰা ফাইলৰ তথ্য ই লাভ নকৰে। অৱশ্যে কোনো লোকে এই সেৱাৰ অপব্যৱহাৰৰ লগতে ইয়াৰ জৰিয়তে স্পৰ্শকাতৰ তথ্য (content) ট্ৰেন্সফাৰ কৰিব পাৰে বুলি উল্লেখ কৰি দূৰসংযোগ বিভাগে ইয়াক নিষিদ্ধ কৰিছে।
জানিব পৰা মতে সমগ্ৰ বিশ্বত ৫ কোটিতকৈ অধিক য়ুজাৰে We Transferৰ জৰিয়তে প্ৰতি মাহে ১০০ কোটিতকৈ অধিক ফাইল বিনিময় কৰে।
