ৰাইজৰ প্ৰতিবাদৰ ভয়ত সুৰক্ষা ব্যৱস্থাৰ প্ৰতি লক্ষ্য ৰাখি প্ৰধানমন্ত্ৰীৰ অসম ভ্ৰমণৰ সময়ত গুৱাহাটীৰ বিভিন্ন স্থানক ন’ পাৰ্কিং জ’ন হিচাপে ঘোষণা কৰা হৈছে। ৰাজ্যৰ আৰক্ষী প্ৰশাসনে প্ৰধান মন্ত্ৰীৰ নিৰাপত্তা ব্যৱস্থাত অলপো সুৰুঙা ৰাখিবলৈ বিচৰা নাই।
ৰাজ্যজুৰি অব্যাহত থকা বিধেয়ক বিৰোধী প্ৰতিবাদৰ সময়ত প্ৰধান মন্ত্ৰীৰ এই ভ্ৰমণে যথেষ্ট তাৎপৰ্য্য বহন কৰিছে। সদৌ অসম ছাত্ৰ সন্থাকে ধৰি ৰাজ্যখনৰ বিভিন্ন দল-সংগঠনে মোডীৰ এই ভ্ৰমণৰ সময়ত প্ৰতিবাদী কাৰ্য্যসূচী ঘোষণা কৰিছে। চাংসাৰিত এইমছৰ আধাৰশিলা স্থাপন কৰাৰ বাবে অসমলৈ অহা মোডীৰ ভ্ৰমণৰ সময়ত গুৱাহাটী মহানগৰীৰ নিৰাপত্তা ব্যৱস্থা কটকটীয়া কৰি তোলা হৈছে।
মহানগৰ যান-বাহন আৰক্ষীয়ে বিমানবন্দৰৰ পৰা গুৱাহাটী বিশ্ববিদ্যালয়ৰ ওচৰেৰে পাৰহৈ যোৱা ৰাষ্ট্ৰীয় ঘাইপথত ন’ পাৰ্কিং ঘোষণা কৰিছে, জালুকবাৰীৰ পৰা ভৰলু হৈ ৰাজভৱনলৈ যোৱা সমগ্ৰ পথছোৱাত ন’ পাৰ্কিং ঘোষণা কৰা হৈছে, ৩৭ নং ৰাষ্ট্ৰীয় ঘাইপথৰ খানাপাৰাৰ পৰা জালুকবাৰীলৈ ন’ পাৰ্কি জ’ন হিচাপে চিহ্নিত কৰিছে যান-বাহন আৰক্ষীয়ে।
কাইলৈ ৰাতিপুৱা ৪ বজাৰ পৰা মহানগৰীৰ বিভিন্ন পথত চলাচল কৰিবলগীয়া গধূৰ বাণিজ্যিক বাহন আৰক্ষীয়ে নিয়ন্ত্ৰণ কৰিব। আনহাতে, জালুকবাৰীৰ ৰ’টাৰীতো ন’ পাৰ্কিং জ’ন হিচাপে চিহ্নিত কৰিছে। ৰাইজক এইবোৰ ঠাইত নিজৰ নিজৰ বাহন সমূহ পাৰ্কিং কৰাৰ পৰা বিৰত থকাৰ বাবে আহ্বান জনাইছে মহানগৰ যান-বাহন আৰক্ষীয়ে।