উচ্চতম ন্যায়ালয়ৰ সন্মুখত কোনো গোচৰ তুচ্ছ নহয়; কেন্দ্ৰীয় আইন মন্ত্ৰীলৈ দেশৰ মুখ্য ন্যায়াধীশৰ বাৰ্তা!

মোডী চৰকাৰৰ আইন মন্ত্ৰী কিৰেন ৰিজিজুৱে কৈছিল যে উচ্চতম ন্যায়ালয়ৰ জামিন আবেদনৰ শুনানিৰ কোনো প্ৰয়োজন নাই। দেশৰ মুখ্য ন্যায়াধীশ ধনঞ্জয় ৱাই চন্দ্ৰচূড়ে শুকুৰবাৰে উচ্চতম ন্যায়ালয়ত ইয়াৰ প্ৰত্যুত্তৰ দি প্ৰশ্ন কৰে যে ব্যক্তিগত স্বাধীনতা লংঘন হ’লে যদি তেওঁলোকে হস্তক্ষেপ নকৰে, নিষ্পত্তিৰ ব্যৱস্থা কৰিব নোৱাৰে তেন্তে তেওঁলোকে আদালতত কি কৰিবলৈ বহি আছে?

মুখ্য ন্যায়াধীশে লগতে সোঁৱৰাই দিয়ে যে সংবিধানৰ ১৩৬ অনুচ্ছেদৰ অধীনত উচ্চতম ন্যায়ালয়ৰ এই অধিকাৰ আৰু দায়িত্ব আছে। আইন মন্ত্ৰীজনে উচ্চতম ন্যায়ালয় আৰু উচ্চ ন্যায়ালয়ত কিয় দীঘলীয়া বন্ধ থাকিব বুলিও প্ৰশ্ন কৰিছিল। দেশৰ মুখ্য ন্যায়াধীশে এই সন্দৰ্ভত কয় যে শীতকালীন বন্ধ অনুসৰি শনিবাৰ ১৭ ডিচেম্বৰৰ পৰা ১ জানুৱাৰীলৈ উচ্চতম ন্যায়ালয়ত কোনো বিচাৰপীঠ নবহে।

লগতে পঢ়ক: বাধ্যতামূলক নহয় আধাৰৰ সৈতে ভোটাৰ কাৰ্ডৰ সংযোগ; সংসদত স্পষ্ট কৰিলে আইন মন্ত্ৰী ৰিজিজুৱে

তেওঁ যদিও কেন্দ্ৰীয় আইন মন্ত্ৰীৰ মন্তব্যৰ পোনপটীয়াকৈ উল্লেখ কৰা নাছিল, মুখ্য ন্যায়াধীশৰ দুইটা মন্তব্যক আইনজীৱীসকলে মোডী চৰকাৰৰ বাবে বাৰ্তা হিচাপে ধৰি লৈছে। কিয়নো কেইবাদিনো ধৰি আইন মন্ত্ৰীগৰাকীয়ে নিয়মীয়াভাৱে ন্যায়াধীশ নিযুক্তিৰ কলেজিয়াম প্ৰণালীক সমালোচনা কৰি আহিছে।

তেওঁ পুৰণি গোচৰ জমা হোৱাৰ বাবে ন্যায়াধীশ নিযুক্তিৰ সমস্যাকে দোষাৰোপ কৰিছে। ৰিজিজুৱে কৈছিল, “উচ্চতম ন্যায়ালয়ে অৰ্থহীন বিষয়ত জামিন আবেদন আৰু পিআইএলৰ শুনানি ৰখাৰ কোনো প্ৰয়োজন নাই।”

মুখ্য ন্যায়াধীশ চন্দ্ৰচূড়ে শুকুৰবাৰে উচ্চতম ন্যায়ালয়ত জামিন আবেদনৰ শুনানি গ্ৰহণ কৰি আছিল। বিদ্যুৎ চুৰি কৰাৰ অভিযোগত অভিযুক্ত এজন লোকে তিনি বছৰ কাৰাবাস খাটিছে। আৰু ১৫ বছৰ কাৰাবাস খাটিবলৈ বাকী আছে।

মুখ্য ন্যায়াধীশগৰাকীয়ে কয় যে উচ্চতম ন্যায়ালয়ৰ সন্মুখত কোনো গোচৰ তুচ্ছ নহয়। তেওঁ কয়, “যদি আমি ব্যক্তিগত স্বাধীনতাৰ বিষয়ত হস্তক্ষেপ নকৰোঁ আৰু সমাধান নিদিওঁ তেন্তে আমি ইয়াত কি কৰি আছো? উচ্চতম ন্যায়ালয়ে একো নকৰিলে সেয়া সংবিধানৰ ১৩৬ নং অনুচ্ছেদৰ উলংঘন নহয় নেকি? উচ্চতম ন্যায়ালয় এনে আবেদনকাৰীসকলৰ আবেদন শুনিবলৈকে আছে। আমি এনে ধৰণৰ গোচৰৰ বাবে নিশা উজাগৰে থাকো।”

লগতে পঢ়ক: ৰাহুল গান্ধীৰ ‘উপলব্ধি’! ৰাইজৰ পৰা দূৰত্ব সৃষ্টি হৈছিল… কিন্তু আমি ফেচিষ্ট নহয়

ইপিনে, সংসদত এক প্ৰশ্নৰ উত্তৰত কেন্দ্ৰীয় আইন মন্ত্ৰালয়ে কৈছিল যে উচ্চ ন্যায়ালয়ৰ ৰায়ৰ বিৰুদ্ধে উচ্চতম ন্যায়ালয়ৰ ওচৰত এতিয়া ৪৯৮ টা সাংবিধানিক গোচৰ, ৪৮৭ টা নিৰ্বাচনী গোচৰ, ২২০৯ খন ৰিট আৱেদন, ২,৮৭০ টা ৰাজহুৱা স্বাৰ্থৰ মোকৰ্দমা আৰু ৪,৩৩১ টা গোচৰ পৰি আছে। এই অমীমাংসিত গোচৰসমূহৰ পাহাৰ সন্দৰ্ভত আইন মন্ত্ৰীয়ে সংসদত প্ৰশ্ন তুলিছিল- উচ্চতম ন্যায়ালয় আৰু উচ্চ ন্যায়ালয়ত কিয় দীঘলীয়া বন্ধ থাকিব? ইয়াৰ প্ৰতি কোনো কাণসাৰ নিদি মুখ্য ন্যায়াধীশে শুকুৰবাৰে কয় যে শীতৰ বন্ধ যেনেকৈ আছিল তেনেকৈয়ে থাকিব।