বুধবাৰে ভাৰতৰ মুখ্য ন্যায়াধীশ সূৰ্য কান্তে উচ্চতম ন্যায়ালয়ত এক বিৰল আৰু শক্তিশালী বাৰ্তা প্ৰদান কৰে। চিকিৎসা ভৰ্তিৰ গোচৰৰ শুনানিৰ সময়ত তেওঁ কেৱল গোচৰৰ বিষয়বস্তুৰ ওপৰত প্ৰশ্ন উত্থাপন কৰাই নহয়, ন্যায়পালিকাৰ মৰ্যাদাত হস্তক্ষেপ কৰাৰ অভিযোগক লৈও তীব্ৰ ক্ষোভ প্ৰকাশ কৰে।
শুনানিৰ সময়ত মুখ্য ন্যায়াধীশগৰাকীয়ে কয় যে শেহতীয়াকৈ এজন ব্যক্তিয়ে তেওঁৰ ভাতৃৰ সৈতে যোগাযোগ কৰি এই গোচৰত তেওঁ দিয়া এটা আদেশক লৈ প্ৰশ্ন উত্থাপন কৰিছিল। এই ঘটনাক লৈ স্পষ্টভাৱে অসন্তুষ্টি প্ৰকাশ কৰি তেওঁ কয়, “কোনোবাই মোৰ ভাইটিক ফোন কৰি সুধিছে যে মই এই ৰায় কেনেকৈ দিলোঁ? তেওঁ সুধিছে তেওঁৰ বিৰুদ্ধে অৱজ্ঞাৰ গোচৰ কিয় আৰম্ভ নহ’ব?” এই মন্তব্যৰ পিছতে আদালত কক্ষত এক উত্তেজনাপূৰ্ণ পৰিৱেশৰ সৃষ্টি হয়।
হাৰিয়ানা চৰকাৰৰ অধিবক্তাক সম্বোধন কৰি মুখ্য ন্যায়াধীশগৰাকীয়ে লগতে কয় যে, “মই কেনেকৈ ৰায়দান দিম সেই বিষয়ে তেওঁ মোক নিৰ্দেশ দিবনে? বিষয়টো চাওক। আচলতে এজন অধিবক্তা হিচাপে আপোনাৰ প্ৰথম কৰ্তব্য হ’ব লাগে এনে আচৰণৰ পৰা নিজকে আঁতৰাই ৰখা।”
তেওঁৰ মন্তব্যৰ পৰা স্পষ্ট হৈ পৰিছে যে ন্যায়পালিকাৰ স্বাধীনতাত কোনো ধৰণৰ হস্তক্ষেপ তেওঁ সহ্য নকৰে। তেওঁ লগতে সকীয়াই দিয়ে, “তেওঁ দেশৰ বাহিৰত আত্মগোপন কৰি থাকিলেও মই এনে লোকৰ লগত মোকাবিলা কৰিব জানো। যোৱা ২৩ বছৰে মই এনে পৰিস্থিতিৰ সন্মুখীন হৈ আহিছো।” তেওঁৰ এই বক্তব্যক আদালতত হস্তক্ষেপৰ বিৰুদ্ধে এক শক্তিশালী বাৰ্তা হিচাপে দেখা গৈছে।
এটা বিতৰ্কিত চিকিৎসাবিজ্ঞানত নামভৰ্তি গোচৰৰ শুনানিৰ সময়ত এই ঘটনা পোহৰলৈ আহে। উচ্চতম ন্যায়ালয়ত দাখিল কৰা আবেদনৰ ভিত্তিত এই গোচৰটো বৌদ্ধ সংখ্যালঘু কোটা ব্যৱহাৰ কৰি স্নাতকোত্তৰ চিকিৎসা পাঠ্যক্ৰমত নামভৰ্তি বিচাৰিছিল নিখিল কুমাৰ পুনিয়া আৰু একতা পুনিয়া নামৰ দুগৰাকী আবেদনকাৰীয়ে।
উল্লেখ্য যে তেওঁলোকে ইয়াৰ পূৰ্বে সাধাৰণ শ্ৰেণীত আবেদন কৰিছিল। কিন্তু পিছত বৌদ্ধ ধৰ্ম গ্ৰহণ কৰা বুলি দাবী কৰি সংখ্যালঘু কোটাৰ সুবিধা ল’ব বিচাৰিছিল। সংশ্লিষ্ট মহাবিদ্যালয় সুভাৰতী চিকিৎসা মহাবিদ্যালয়খন হৈছে সংখ্যালঘু শিক্ষানুষ্ঠানৰ ৰাষ্ট্ৰীয় আয়োগৰ অনুমোদন লাভ কৰা স্বীকৃতিপ্ৰাপ্ত বৌদ্ধ সংখ্যালঘু প্ৰতিষ্ঠান।
কিন্তু উত্তৰ প্ৰদেশ চৰকাৰৰ অধিসূচনাৰ পিছত তেওঁলোকৰ নামভৰ্তি স্থগিত ৰখা হয়, যাৰ বিৰুদ্ধে তেওঁলোকে উচ্চতম ন্যায়ালয়ত আবেদন জনায়। গোচৰৰ শুনানি গ্ৰহণ কৰি বিচাৰপীঠৰ সদস্যসকলে সমগ্ৰ বিষয়টোক অতি সন্দেহজনক বুলি অভিহিত কৰে।
মুখ্য ন্যায়াধীশে স্পষ্টকৈ কয়, “এয়া নতুন ধৰণৰ প্ৰৱঞ্চনা। আমাক আৰু একো ক’বলৈ বাধ্য নকৰিব।” তেওঁ প্ৰশ্ন উত্থাপন কৰে যে পুনিয়া জাট সম্প্ৰদায়ৰ দৰে সাধাৰণ শ্ৰেণীৰ পৰিয়াল এটাই কেনেকৈ হঠাতে সংখ্যালঘুৰ প্ৰমাণ পত্ৰ লাভ কৰিব পাৰে, বিশেষকৈ যেতিয়া তেওঁলোকে ইয়াৰ আগতে বহুবাৰ সাধাৰণ শ্ৰেণীৰ বাবে আবেদন কৰিছিল।
ইপিনে, সহযোগী ন্যায়াধীশ বাগচিয়েও এই বিষয়ত সন্দেহ প্ৰকাশ কৰে। তেওঁ কয়, “পৰীক্ষাৰ ঠিক আগতে হঠাতে বৌদ্ধ ধৰ্ম গ্ৰহণ কৰিলে?” এই মন্তব্যৰ পৰা অনুমান কৰিব পাৰি যে ধৰ্মান্তৰকৰণ আৰু ইয়াৰ সময়ক লৈ আদালত যথেষ্ট সন্দিগ্ধ।
